Li naʼlebʼ li nakʼanjelak saʼebʼ li chʼutam re puktesink

Ebʼ li chʼutam re puktesink, joʼ ajwiʼ ebʼ li qachʼutam, aʼan jun li maatan li naxkʼe qe li Jehobʼa re xkʼutbʼesinkil li rahok ut xbʼaanunkil li chaabʼil naʼlebʼ (Heb 10:24, 25). Li chʼutam aʼin tento tbʼaanumanq chiru 5 malaj 7 kʼasal, chalen naq tkʼubʼamanq li junjunq chi chʼuut, xyeebʼal bʼar tpuktesimanq ut li tijok. Tento tkʼosmanq li hoonal wi t-uxmanq naq tojaʼ traqeʼq jun chik li chʼutam. Li tbʼeresinq re li chʼutam aʼin tento tixsikʼ junaq li naʼlebʼ li tkʼanjelaq chiruhebʼ li teʼpuktesinq saʼ li kutan aʼan. Maare saʼ li kutan sábado nekeʼelk naabʼal ebʼ li hermaan li inkʼaʼ xeʼruuk chi elk chi puktesink chiru li xamaan, joʼkan naq maare tkʼanjelaq chiruhebʼ xjultikankil junaq li naʼlebʼ li teʼroksi saʼ li puktesink. Kʼaru chik li naʼlebʼ naru tkʼanjelaq?

• Ebʼ li eetalil re aatinak saʼ Xhuhil li qachʼutam Qayuʼam ut Qakʼanjel joʼ aj Paabʼanel.

• Chanru roksinkil junaq li naʼlebʼ malaj junaq li esil li tojaʼ xkʼulmank re xtikibʼankil aatinak?

• Chanru xsumenkil junaq li naʼlebʼ li nekeʼxye saʼ li teep naq inkʼaʼ nekeʼraj rabʼinkil li esil?

• Chanru xsumenkil li inkʼaʼ naxpaabʼ naq wank jun li Yos, li naxye naq chixjunil kiyoʼlaak xjunes, li jalan raatinobʼaal malaj li moko nawbʼil ta ru li xpaabʼal saʼ li teep?

• Chanru roksinkil li qanaʼaj jw.org, li kʼanjelobʼaal JW Library^® malaj li Santil Hu?

• Chanru roksinkil li wank saʼ li kʼanjelobʼaal re kʼutuk?

• Puktesink saʼ li selular, rikʼin esilhu, bʼarwiʼ nekeʼnumeʼk naabʼal li poyanam, rulaʼaninkil malaj xtzolbʼal junaq li poyanam.

• Xjultikankil li naʼlebʼ re naq maakʼaʼ tqakʼul, tqoksi li teʼraj rabʼinkil, chaabʼilaq qanaʼlebʼ, tqawaklesihebʼ xchʼool malaj jalan chik.

• Jun li tzolom malaj jun li bʼideo re li hu Tzol chiʼus ilok ru hu ut kʼutuk.

• Chanru tqawaklesi xchʼool ut tqatenqʼa li nokoorochbʼeni chi puktesink?

• Jun li raqal li naxchap ribʼ rikʼin li puktesink malaj jun li eetalil li nawaklesink chʼoolej.