Qatzolaq qe rikʼinebʼ li nekeʼxnaw puktesink

Ebʼ laj paabʼanel li nekeʼxnaw puktesink oxloqʼ ruhebʼ. Wankebʼ ak junxil nekeʼok xloqʼoninkil li Jehobʼa. Ut jalanebʼ chik tojaʼ xeʼxtzol chiʼus li puktesink. Chixjunilebʼ nekeʼxnaw naq saʼ rosoʼjik li Jesukriist yook xjolominkil li chʼuut, ut yook xbʼeresinkil li kʼanjel chirix li puktesink ut xtzolbʼalebʼ li qas qiitzʼin (Mat. 28:19, 20). Saʼ xkʼabʼaʼ naq naabʼal chihabʼ rokikebʼ chi puktesink, xeʼxtaw «li xnimal ru wankilal [...] nachalk rikʼin li Yos», ut aʼan natenqʼank rehebʼ chi xnumsinkil ebʼ li chʼaʼajkilal (2 Cor. 4:7). Ut nekeʼwulak chiru xkʼutbʼal chiruhebʼ li qas qiitzʼin li nekeʼxnaw ut laaʼo naru naqakʼam qe rikʼinebʼ (Sal. 71:18). Chanru tooruuq xbʼaanunkil aʼin?

Naq yooqo chi puktesink: Re naq teʼxtzol puktesink ebʼ li akʼ, li ak junxil teʼtzoloq rehebʼ. Naru xtzolbʼal aʼin yal rikʼin rilbʼal chanru nekeʼxbʼaanu li nekeʼxnaw puktesink. (Chaawil li tasal hu La Atalaya 15 re Febrero 2015 bʼarwiʼ naxye: «Cómo mantener el entusiasmo en la predicación», saʼ li rox raqal re li naʼlebʼ «Ayude a los nuevos».) Kʼaru rusilal nakaataw naq nakatpuktesink rochbʼenebʼ li ak junxil nekeʼok puktesink?

Us raj naq taaye re junaq laj puktesinel aʼin naq tatrochbʼeni chi puktesink. Ut wi yaj laj puktesinel, naru nakaakʼam laatzolom chi tzolok saʼ rochoch. Naq ak xexraqeʼk xtzolbʼal, taapatzʼ re laj puktesinel chanru xril li tzolok ut taapatzʼ re wiibʼ oxibʼ aanaʼlebʼ.

Chaakʼe aahoonal rehebʼ: Kʼe aachʼool chi xnawbʼal ruhebʼ laj puktesinel aʼin. Naru nakaabʼoq jun rehebʼ re naq texrochbʼeni naq yooqex xloqʼoninkil li Yos saʼ junajil joʼ junkabʼal. Ut taapatzʼ re chanru xnaw li yaal, chanru naʼosobʼtesiik xbʼaan li Jehobʼa, kʼaru xjalanil li chʼuut chalen naq kiʼok choʼq aj Testiiw ut kʼaru li chaabʼil naʼlebʼ naxtaw naq yook chi kʼanjelak chiru li Yos. Wi yaj laj puktesinel, maare naru nakatxik saʼ rochoch re naq aran teeloqʼoni li Yos saʼ junajil joʼ junkabʼal.

Maapatzʼ rehebʼ li inkʼaʼ teʼruuq xbʼaanunkil. Joʼ naqakʼul laaʼo, li ak junxil nekeʼok chi puktesink jalan jalanq rusilal li xkʼanjelebʼ (Rom. 12:6-8). Ut saʼ xkʼabʼaʼ naq wankebʼ ak cheekebʼ chik maare inkʼaʼ teʼruuq xkʼebʼal chixjunil li hoonal. Usta joʼkan, tooruuq xtzolbʼal qe rikʼin li xnawomebʼ ut chirix li xkʼanjelebʼ chiru li Jehobʼa.