Chanru roksinkil li xyaabʼ kuxej
1. Usta wank ebʼ li tasal hu, kʼaru chik li kʼanjelobʼaal naru naqoksi?
1 Saʼ xkʼabʼaʼ li jw.org, naabʼalebʼ nekeʼxtaw rusilal rilbʼal li chaabʼil aatin chi tzʼaqal re ru (Ecl. 12:10). Abʼan, ma ak aawabʼihom li xyaabʼ kuxej? Naabʼal rehebʼ li tasal hu li wank saʼ li naʼaj aʼin ak wank saʼ yaabʼ kuxej. Kʼaru rusilal aʼin?
2. Chanru tooruuq roksinkil li xyaabʼ kuxej naq yooqo xtzolbʼal qibʼ ut re li qajunkabʼal?
2 Re xtzolbʼal aawibʼ ut laajunkabʼal. Jun rehebʼ li naʼlebʼ re roksinkil chiʼus li qahoonal aʼan rabʼinkil li xyaabʼ kuxej re li Santil Hu, li hu La Atalaya ut ¡Despertad! malaj junaq chik li tasal hu naq yooqo chi xik saʼ bʼelebʼaal chʼiichʼ malaj naq yooqo chi kʼanjelak saʼ ochoch (Efes. 5:15, 16). Re xjalbʼal bʼayaq ru li naʼlebʼ li naqabʼaanu re xloqʼoninkil li Jehobʼa saʼ junajil joʼ junkabʼal naru naqakʼe chi ekʼank li xyaabʼ kuxej ut yooqo ajwiʼ rilbʼal chiru hu li naxye. Rabʼinkil ebʼ li xyaabʼ kuxej naq yooqo xtzolbʼal qibʼ naru nokooxtenqʼa re ilok ru hu chiʼus malaj re xtzolbʼal junaq chik li aatinobʼaal.
3. Re chixjunilebʼ li naqatawebʼ saʼ li puktesink, chiru ani naru nakʼanjelak li xyaabʼ kuxej?
3 Re li puktesink. Naabʼalebʼ li naqatawebʼ saʼ li puktesink nekeʼxkʼoxla naq maakʼaʼebʼ xhoonal re rilbʼal junaq li hu, abʼan maare teʼraj rabʼinkil li xyaabʼ kuxej. Wankebʼ nekeʼaatinak saʼ jalan chik aatinobʼaal ut maare teʼxkʼulubʼa li yaal wi nekeʼrabʼi saʼ li raatinobʼaal (Hech. 2:6-8). Wankebʼ li tenamit nekeʼwulak chiru rabʼinkil li xkʼulmank chaq. Qilaq jun li eetalil, ebʼ laj Hmong nekeʼwulak chiru xseeraqʼinkil chirixebʼ li xeʼtoon. Ut ebʼ li yuwaʼbʼej nekeʼxnumsi aʼin chiruhebʼ li xkokʼal, ut aʼin natenqʼank rehebʼ chi xjultikankil saʼ junpaat li nekeʼrabʼi. Saʼ naabʼal rehebʼ li naʼaj re Africa, ebʼ li qas qiitzʼin nekeʼwulak chiru tzolok rikʼin yal rabʼinkil li xkʼulmank chaq.
4. Wi tqoksi li xyaabʼ kuxej saʼ li puktesink, kʼaru li patzʼom tento tqakʼoxla xbʼeenwa?
4 Qakʼoxlaq laateep, ma us raj roksinkil junaq li xyaabʼ kuxej re naq li qas qiitzʼin trabʼi saʼ li raatinobʼaal? Ma nakaanaw ru junaq li poyanam li tixtaw rusilal junaq li xyaabʼ kuxej wi naqataqla saʼ korreo? Wi junaq li qas qiitzʼin xwulak chiru li esil, ma us raj xkubʼsinkil xyaabʼ kuxej chirix junaq li tasal hu ut xnumsinkil saʼ CD ut xkʼebʼal ajwiʼ re chi huhil? Naq naqakʼe junaq li tasal hu, folleto, tratado malaj junaq chik li hu saʼ CD naru naqatzʼiibʼa saʼ li hu li naqaqʼaxtesi rajlal po. Ebʼ li xyaabʼ kuxej moko kaʼaj tawiʼ nakʼanjelak re xtzolbʼal qibʼ, nakʼanjelak ajwiʼ re rawbʼal li yaal saʼ xchʼoolebʼ li qas qiitzʼin (1 Cor. 3:6).