Chanru roksinkil li hu Kʼaru naxchʼolobʼ? li inkʼaʼ chʼaʼaj xtawbʼal ru

Li tasal hu What Can the Bible Teach Us? chanchan li hu Kʼaru naxchʼolobʼ? Li wiibʼ chi hu aʼin ttawmanq saʼ naabʼal chi aatinobʼaal. Ut juntaqʼeet tusbʼil ut chʼolobʼanbʼil li yaal. Abʼan li akʼ hu aʼin, moko chʼaʼaj ta kʼubʼanbʼil ut chʼolobʼanbʼil. Ut kʼubʼanbʼil choʼq rehebʼ li nekeʼchʼaʼajkoʼk chiruhebʼ xtawbʼal ru li tasal hu Kʼaru naxchʼolobʼ? Saʼ raqik li tasal hu naxchʼolobʼ xyaalal ebʼ li aatin ut ebʼ li naʼlebʼ li wank saʼ li junjunq chi tasal ut moko chʼaʼaj ta chʼolobʼanbʼil. Saʼ li junjunq chi tasal maakʼaʼ chik ebʼ li patzʼom saʼ xtiklajik chi moko ebʼ li kaaxukuut re xjultikankil li xqatzol. Ut choʼq reqaj aʼin, natawmank li rusilal li xtzʼilmank saʼebʼ li raqal. Joʼ nabʼaanumank rikʼin li hu Kʼaru naxchʼolobʼ? li hu aʼin naru naqayeechiʼi yalaq joqʼe, usta jalan chik li hu li yook chi yeechiʼimank chiru li po. Chanru tooruuq roksinkil chiʼus li jalan jalanq chi naʼlebʼ li wank saʼ li tasal hu aʼin naq tqatzol junaq li poyanam?

RUSILAL EBʼ LI TASAL. Rikʼin naabʼalebʼ li poyanam tooruuq chi tzolok joʼ chanru ak yooko xbʼaanunkil, xyaabʼasinkil ebʼ li raqal li hu Kʼaru naxchʼolobʼ? ut xbʼaanunkil ebʼ li patzʼom. Abʼan wi li poyanam inkʼaʼ naxnaw chiʼus li aatinobʼaal li yook wiʼ chi tzolok malaj inkʼaʼ naxnaw ilok ru hu chiʼus? Wi joʼkan, laj puktesinel naru naroksi li hu Kʼaru naxchʼolobʼ? li inkʼaʼ chʼaʼaj xtawbʼal ru. Truuq roksinkil li rusilal li tasal re xtzolbʼal li poyanam ut naru tixye re li xtzolom naq tril xjunes ebʼ li raqal re li tasal. Re xchʼolobʼankil jun li yaal li wank saʼ li Santil Hu naʼajmank 15 kʼasal. Saʼ li rusilal li tasal moko naabʼal ta li naʼlebʼ wank chisaʼ chiru li wank saʼebʼ li tasal. Aʼin naraj xyeebʼal naq laj puktesinel tento tixkʼubʼ chiʼus li tixkʼut ut tixkʼoxla joʼnimal truuq xtawbʼal ru li xtzolom. Ut wi troksi ebʼ li raqal re li tasal, laj puktesinel truuq roksinkil li rusilal li tasal re xjultikankil li ak xeʼxtzol.

XYAALAL EBʼ LI AATIN. Ebʼ li aatin ut ebʼ li naʼlebʼ li wank arin tusbʼilebʼ ru joʼ chanru natawmank saʼebʼ li tasal. Laj puktesinel yaal re ma ttzʼilmanq rix xyaalal ebʼ li aatin naq yooqebʼ xtzolbʼal li tasal hu.