Qoksihaq ebʼ li bʼideo re xtzolbʼalebʼ li qas qiitzʼin chirix li Santil Hu

Ebʼ li tenqʼ li naruhank rilbʼal naxbʼaanu naq tqakʼe qachʼool chirix aʼin ut nokooxtenqʼa chi xtawbʼal ru ut xjultikankil li xqatzol. Li Jehobʼa, li Xnimal ru aj Tzolol qe kiroksi chaq aʼin re xkʼutbʼal ebʼ li naʼlebʼ li wank xwankil (Ge 15:5; Jer 18:1-6). Li Jesus, li Xnimal ru aj Kʼutunel kiroksi ajwiʼ aʼin (Mt 18:2-6; 22:19-21). Saʼ li chihabʼ li tojaʼ xeʼnumeʼk, jun rehebʼ li tenqʼ li jwal yook chi kʼanjelak aʼan ebʼ li bʼideo. Ma yooko roksinkil chiʼus re xtzolbʼalebʼ li qas qiitzʼin chirix li Santil Hu?

Anaqwan, wank 10 li bʼideo li nokooxtenqʼa chi xchʼolobʼankil ebʼ li tzolom re li folleto Li chaabʼil esil li nachalk rikʼin li Yos. Naabʼal rehebʼ li xkʼabʼaʼ li bʼideo aʼan ajwiʼ jun rehebʼ li patzʼom li bʼonbʼil chi qʼeq li wank saʼ li folleto. Saʼ li folleto li natawmank saʼ li qanaʼaj saʼ Internet wank jun reetalil li tixjultika chiqu joqʼe tqoksi li junjunq chi bʼideo. Joʼkan ajwiʼ, wankebʼ jalan chik ebʼ li bʼideo li nekeʼxkʼe xtzʼaqobʼ li wank saʼ li kʼanjelobʼaal re kʼutuk li naqoksi re xtzolbʼalebʼ li qas qiitzʼin chirix li Santil Hu.

Ma nachʼaʼajkoʼk chiru laatzolom xtawbʼal ru junaq li naʼlebʼ chirix li Santil Hu malaj yook xnumsinkil junaq li chʼaʼajkilal? Sikʼ junaq li bʼideo li naru naxtenqʼa saʼ jw.org® malaj saʼ JW Broadcasting®. Maare tatruuq rilbʼal rikʼin ut taatzʼil rix.

Rajlal po nakʼemank jun li akʼ bʼideo. Naq taawil, kʼoxla chanru taawoksi re xtzolbʼalebʼ jalan chik.