Li nimla kʼanjel li twanq saʼ septiembre re xtikibʼankil junaq li tzolom

Saʼ li po septiembre tqayal qaqʼe chi xyeechiʼinkil xtzolbʼal chixjunilebʼ rikʼin li hu Sahaq laachʼool! Saʼ li po aʼin naru tqakʼe 30 hoor re wank joʼ aj kʼamolbʼe saʼ li puktesink. Chanru tqabʼaanu aʼin?

• Raatinankil xbʼeen sut. Oksi li naʼlebʼ li wank chirix li hu re naq teʼraj rabʼinkil li esil ut kʼut chiruhebʼ chanru natzolmank li Santil Hu. Misach saʼ laachʼool rulaʼaninkilebʼ li xeʼxkʼutbʼesi naq xeʼraj rabʼinkil li esil joʼebʼ li nakaawulaʼani wiʼ chik. Usta inkʼaʼ xeʼxkʼulubʼa xtzolbʼal li Santil Hu, maare anaqwan teʼwulaq chiru li hu Sahaq laachʼool! ut chanru natzolmank. Li hu aʼin inkʼaʼ tqakanabʼ saʼebʼ li ochoch bʼarwiʼ maaʼanihebʼ xsaʼ chi moko tqataqla saʼebʼ li esilhu wi inkʼaʼ xeʼraj rabʼinkil. Ebʼ li cheekel winq li nekeʼril li puktesink saʼ li chʼuut naru teʼxkʼubʼ ebʼ li chʼutam re puktesink chiru li po aʼan.

• Joqʼehaq chik. Wi li chʼuut naroksi li kʼanjelobʼaal re puktesink, wanq chisaʼ li hu Sahaq laachʼool! Wi junaq li kristiʼaan nawulak chiru li hu aʼin, chʼolobʼ chiru naq truuq ajwiʼ xtzolbʼal li Santil Hu chi sibʼil. Naru taaye re chanru natzolmank li Santil Hu malaj taakʼutbʼesi chiru joqʼehaq chik. Li cheekel winq li naxkʼubʼ li kʼanjel chirix li puktesink naru naxpatzʼ rehebʼ laj puktesinel li nekeʼxnaw xbʼaanunkil chiʼus aʼin naq teʼxik saʼebʼ li kʼayibʼaal chi xyeechiʼinkil xtzolbʼalebʼ li kristiʼaan. Ut, naq tatpuktesinq yalaq bʼar, naru ajwiʼ taayeechiʼi xtzolbʼalebʼ laawechkʼanjel malaj jalanebʼ chik.

Li Jesús kixye naq tqatzolebʼ li kristiʼaan ut tqakʼehebʼ choʼq xtzolom (Mt 28:19, 20). Naqaj naq li hu Sahaq laachʼool! tooxtenqʼa chi xbʼaanunkil li nimla kʼanjel aʼin.