Kʼaru tento tqabʼaanu re naq toowanq saʼ li akʼ Ruuchichʼochʼ?

Saʼebʼ li tzolom li tojeʼ xqil, xqatzol naq li Yos chi seebʼ tixsach li maaʼusebʼ xnaʼlebʼ ut li rahilal li wank saʼ Ruuchichʼochʼ. Kʼaʼut naq chʼolchʼo chiqu aʼin? Xbʼaan naq li Santil Hu naxye:

«Li ruuchichʼochʼ t-osoqʼ» (1 JUAN 2:17, Wy).

Joʼkan ajwiʼ, chʼolchʼo chiqu naq wankebʼ li kristiʼaan li teʼkoleʼq, xbʼaan naq li raqal naxye:

«Abʼanan li ani nabʼaanunk re li naraj li Yos, aʼan wanq chi junelik».

Joʼkan bʼiʼ, re naq tookoleʼq tento naq tooʼabʼinq chiru li Yos. Abʼan re xbʼaanunkil aʼin, xbʼeenwa tento tqanaw ru.

QANAWAQ RU LI YOS RE NAQ TOOKOLEʼQ

Ebʼ li jalam u: 1. Jun li enfermera li lubʼlu naxchunubʼ ribʼ chiru tzʼak. 2. Naq yook chi hilank naxkʼe reetal naq li rechkʼanjel yook chi seʼek naq naril xsaʼ jun rehebʼ li qahu. 3. Li rechkʼanjel naxyaabʼasi re jun xraqal li Santil Hu ut naxkʼe re li hu re jw.org.

Li Jesús kixye: «Aʼan aʼin li junelik yuʼam: naq teʼxnaw aawu laaʼat li junat chi tzʼaqal Yos ut li xataqla chaq, li Jesus aʼ li Kriist» (Juan 17:3). Aajel ru xnawbʼal ru li Yos re naq tookoleʼq saʼ rosoʼjik li Ruuchichʼochʼ ut re naq twanq qayuʼam chi junelik. Aʼin naraj xyeebʼal, naq moko tzʼaqal ta rikʼin xnawbʼal naq wank li Yos ut xnawbʼal wiibʼ oxibʼ li naʼlebʼ chirix. Tento bʼan naq toowanq saʼ tzʼaqal amiiwil rikʼin. Naq naqaj wank saʼ amiiwil rikʼin junaq li kristiʼaan, naqakʼe qahoonal re xnawbʼal ru. Joʼkan ajwiʼ tento tqabʼaanu rikʼin li Yos. Qilaq wiibʼ oxibʼ li naʼlebʼ li wank saʼ li Santil Hu li tooxtenqʼa chi wank saʼ tzʼaqal amiiwil rikʼin li Yos.

Li naxkʼut li Santil Hu

Li Yos junelik xraj naq toowanq saʼ jun li chʼinaʼusil naʼajej.

Li Yos kixyobʼtesi li xbʼeen winq ut li xbʼeen ixq, aʼ laj Adán ut xʼEva, ut kixkʼehebʼ saʼ jun li chʼinaʼusil naʼajej li naxkʼabʼaʼi Edén. Ebʼ aʼan tzʼaqal re ru xyuʼamebʼ ut li Yos kixkʼe rehebʼ chixjunil li naʼajmank, re naq sahaqebʼ saʼ xchʼool. Wi junelik xeʼwank raj choʼq ramiiw li Jehobʼa xeʼruuk raj chi wank chi junelik. Abʼanan, moko aʼan ta xkʼulmank, xeʼxqʼet bʼan ribʼ chiru li Yos.

Kʼaʼut naq naqakʼul li rahilal.

Saʼ xkʼabʼaʼ naq li xbʼeen winq, aʼ laj Adán, inkʼaʼ kiʼabʼink chiru li Yos, kixtzʼeq li maatan re wank chi junelik choʼq re ut choʼq rehebʼ li junchʼol chi qas qiitzʼin. Li Santil Hu naxye: «Relik chi yaal naq xbʼaan jun chi winq kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam xbʼaan naq chixjunilebʼ keʼmaakobʼk» (Romanos 5:12). Joʼ naq junaq li kristiʼaan naru narechani xmaajelal li xnaʼ xyuwaʼ, joʼkan ajwiʼ ebʼ li ralal xkʼajol laj Adán keʼrechani li xmaak. Joʼkan naq chiqajunilo nokootixk ut nokookamk.

Li Yos ak kixkʼubʼ jun li naʼlebʼ re qatenqʼankil.

Li Santil Hu naxye: «Xbʼaan naq li Yos kʼajoʼ naq kixra li ruuchichʼochʼ: kixkʼe chaq li Ralal jun chiribʼil re naq chixjunil li taapaabʼanq re, inkʼaʼ taasachq, wanq bʼan xyuʼam chi junelik» (Juan 3:16). Li Yos kixtaqla chaq li Jesús saʼ Ruuchichʼochʼ re naq tkamq saʼ qakʼabʼaʼ. Naq kixkʼoxla rix li kixbʼaanu li Yos, laj Prabhakar jun winq li wank 86 chihabʼ re, li wank India, kixye aʼin: «Aʼin naxkʼutbʼesi chiwu naq li Jehobʼaa kʼajoʼ nikinxra. Anaqwan wank li woybʼenihom re naq twanq inyuʼam chi junelik saʼ xkʼabʼaʼ li xnimla rahom li Jehobʼa».

Tooruuq xbʼanyoxinkil li kixbʼaanu li Jehobʼa chiqix.

Li Santil Hu naxye naq naru tqabʼanyoxi re li Yos li kixbʼaanu choʼq qe «wi naqapaabʼ ebʼ li xchaqʼrabʼ» (1 Juan 2:3). Chi anchal xchʼool li Jehobʼa naxkʼut chiqu kʼaru tooruuq xbʼaanunkil re naq tqataw li sahil chʼoolejil saʼebʼ li qakutan (Isaías 48:17, 18). Li Yos inkʼaʼ naraj naq tqakʼul li rahilal, joʼkan naq naxyeechiʼi qe naq wi nokooʼabʼink chiru naru naq sahaq saʼ qachʼool anaqwan ut tooruuq xkʼulbʼal li junelik yuʼam.

QILAQ XSAʼ LI SANTIL HU RAJLAL KUTAN

Naq yook chi waʼak naril xsaʼ li Santil Hu ut naxtaqsi li rilobʼaal. — Wi naqapatzʼ qatenqʼankil rikʼin li Yos ut naqabʼaanu li nawulak chiru tookoleʼq saʼ li rosoʼjik li Ruuchichʼochʼ aʼin.

Re naq wanq qayuʼam, tento naq toowaʼaq rajlal kutan. Abʼan li Jesús kixye: «Moko kaʼaj ta wiʼ rikʼin wa yoʼyooq li winq, rikʼin aj bʼan wiʼ chixjunil li aatin naʼelk chi xtzʼuumal re li Yos» (Mateo 4:4).

Saʼebʼ li qakutan naqataw li raatin li Jehobʼa saʼ li Santil Hu. Naq tqil xsaʼ li Santil Hu, tqatzol li kixbʼaanu li Yos saʼ najter qʼe kutan, li yook xbʼaanunkil anaqwan ut li tixbʼaanu moqon.

QATZʼAAMAQ QATENQʼ RIKʼIN LI YOS

Kʼaru tooruuq xbʼaanunkil wi naqaj xpaabʼankil li Yos, abʼan nachʼaʼajkoʼk chiqu xkanabʼankil junaq li naʼlebʼ li moko us ta? Li tooxtenqʼa aʼan xnawbʼal ru chiʼus li Yos.

Qilaq li kixkʼul li xSakura. Naq kiʼok xtzolbʼal li Santil Hu toj naxyuʼami chaq li tzʼiʼbʼeetalil naʼlebʼ, abʼan kixtzol li naxye li Yos: «Chetzʼeqtaana li koʼbʼeetak ut li yumbʼeetak!» (1 Corintios 6:18). Saʼ xkʼabʼaʼ aʼin, li xSakura kixtzʼaama xtenqʼankil re li Yos ut kiruuk xjalbʼal li xyuʼam. Usta joʼkan, inkʼaʼ naxkanabʼ xyalbʼal xqʼe re xqʼaxbʼal ru li raʼal aʼin. Aʼan naxye: «Naq nachalk junaq li yibʼru aj naʼlebʼ saʼ linkʼaʼuxl, saʼ junpaat nintijok chiru li Jehobʼa xbʼaan naq ninnaw naq injunes inkʼaʼ tinruuq xqʼaxbʼal ru. Li tijok naxbʼaanu naq tinnachʼoq rikʼin li Jehobʼa». Joʼ li xSakura, chi miyon ebʼ li kristiʼaan yookebʼ xnawbʼal ru li Yos ut aʼan naxkʼe li metzʼew li naʼajmank chiruhebʼ re naq teʼxjal li xyuʼam ut teʼruuq chi wank joʼ chanru naraj aʼan (Filipenses 4:13).

Wi naqakʼe qachʼool chi xnawbʼal ru li Yos, aʼan ajwiʼ tixnaw qu ut tooruuq chi wank saʼ tzʼaqal amiiwil rikʼin (Gálatas 4:9; Salmo 25:14). Chi joʼkan tooruuq chi koleʼk saʼ rosoʼjik li Ruuchichʼochʼ aʼin ut tooruuq chi wank chi junelik saʼ li chʼinaʼusil naʼajej li naxyeechiʼi qe. Chanruhaq li Ruuchichʼochʼ aʼan? Li jun chik tzolom tixchʼolobʼ.

a Li Santil Hu naxkʼut naq li xkʼabʼaʼ li Yos aʼan Jehobʼa.