Ma us tat-elq wi chaabʼil laanaʼlebʼ?

Chiru naabʼal chihabʼ, naabʼal li kristiʼaan nekeʼxkʼoxla naq wi chaabʼil ebʼ li xnaʼlebʼ us teʼelq saʼ li xyuʼam. Jun eetalil, naabʼalebʼ li kristiʼaan li wankebʼ Asia nekeʼnaʼlebʼak joʼ laj Confucio, jun laj kʼutunel li wank xnawom, naq kixye: «Maabʼaanu rehebʼ li junchʼol li moko nakaawaj ta naq teʼxbʼaanu aawe».

LI NEKEʼXBʼAANU

Naabʼalebʼ ajwiʼ nekeʼxye naq, re naq us teʼelq tento naq chaabʼil teʼnaʼlebʼaq. Joʼkan naq nekeʼxyal xqʼe chi oxloqʼink, naʼlebʼak chi chaabʼil, xbʼaanunkil li tenebʼanbʼil saʼ xbʼeenebʼ ut wank chi saq ru xchʼool. Li xLinh li wank Vietnam naxye: «Junelik xinkʼoxla naq, wi inkʼaʼ nintikʼtiʼik ut ninye li yaal us tinʼelq saʼ linyuʼam».

Li ixq ajwiʼ aʼin naxkʼe xtzekemq ebʼ li nebʼaʼ ut maakʼaʼebʼ rochoch.

Wankebʼ nekeʼxyal xbʼaanunkil li us xbʼaan li nekeʼxpaabʼ. Laj Hsu-Yun li wank Taiwán naxye: «Xeʼxkʼut chiwu naq, naq junaq nakamk, naru naq sahaq saʼ xchʼool malaj trahobʼtesiiq aʼ yaal chanru xnaʼlebʼak naq yoʼyo».

LI NAKʼULMANK

Saʼ raqik li kutan, li ixq ajwiʼ aʼin ra xchʼool, lubʼlu ut naxqʼalu li xkʼuulaʼal.

Naq chaabʼil nokoonaʼlebʼak rikʼinebʼ li junchʼol, us ajwiʼ nokooʼelk. Abʼanan, naabʼalebʼ li nekeʼxtenqʼahebʼ li junchʼol nekeʼxkʼe reetal naq wank wiibʼ oxibʼ rehebʼ inkʼaʼ nekeʼroxloqʼi li tenqʼ li nekeʼxkʼul. Li xShiu Ping li wank Hong Kong naxye: «Xinkʼe reetal naq usta chaabʼil tatnaʼlebʼaq wank sut moko us ta tat-elq. Usta xinyal inqʼe chi xwenteninkil linjunkabʼal ut xbʼaanunkil li us, moko us ta xinʼelk saʼ linsumlajik. Linbʼeelom xinxkanabʼ ut xinkanaak injunes rochbʼen linyum».

Naabʼalebʼ ak xeʼxkʼe reetal naq moko chixjunil ta li nekeʼpaabʼank chaabʼilebʼ xnaʼlebʼ. Li xʼEtsuko li wank Japón naxye: «Xinʼok chi kʼanjelak saʼ jun li iklees ut ninbʼaanu jalan jalanq li naʼlebʼ re xtenqʼankilebʼ li saaj. Xinkʼe reetal naq ebʼ li kristiʼaan ebʼ aj yumbʼeet, nekeʼxpleeti ribʼ re xtawbʼal li wankilal ut moko us ta nekeʼroksi li tumin re li iklees».

«Usta xinyal inqʼe chi xwenteninkil linjunkabʼal ut xbʼaanunkil li us, moko us ta xinʼelk saʼ linsumlajik. Linbʼeelom xinxkanabʼ ut xinkanaak injunes rochbʼen linyum» (SHIU PING, HONG KONG)

Wiibʼ oxibʼ li kristiʼaan li kawebʼ saʼ xpaabʼal nekeʼpoʼ naq nekeʼril naq chixjunil li us li xeʼxbʼaanu maakʼaʼ naʼok wiʼ. Joʼkaʼin kirekʼa ribʼ li xVan li wank Vietnam: «Rajlal kutan nawoybʼeni junaq li osobʼtesihom, xbʼaan naq ninkʼe li kiʼil qʼeen, li uutzʼuʼuj ut li tzekemq saʼ xbʼeen li artal li kʼubʼanbʼil choʼq rehebʼ linxeʼtoon. Usta xinbʼaanu chixjunil aʼin, linbʼeelom kiyajerk. Ut moqon, kikamk linkoʼ li wank 20 chihabʼ re, li yook chaq chi tzolok saʼ jalan chik tenamit».

KʼAʼUT NAQ MOKO KAʼAJ TAWIʼ CHAABʼILAQ LI QANAʼLEBʼ

Usta aajel ru naq chaabʼil toonaʼlebʼaq rikʼinebʼ li junchʼol aʼin moko naraj ta xyeebʼal naq chaabʼil tooʼelq saʼ li qayuʼam. Kʼaʼut? Qilaq li naxye li Santil Hu.

MOKO CHIXJUNILEBʼ TA NEKEʼRAJ NAʼLEBʼAK CHIʼUS.

«Li ani inkʼaʼ us xnaʼlebʼ naxpoʼ ru li us» (ECLESIASTÉS 9:18, Wy).

Usta nakaayal aaqʼe chi naʼlebʼak chiʼus, li nekeʼxbʼaanu ebʼ li junchʼol naru naxpoʼ laanaʼlebʼ. Jun eetalil, naq nachalk junaq li yajel maare naqayal qaqʼe chi abʼink chiru li nekeʼxye ebʼ li awabʼej ut inkʼaʼ nokoonachʼok rikʼinebʼ li junchʼol. Abʼanan, wi inkʼaʼ nekeʼabʼink ebʼ li junchʼol, li nekeʼxbʼaanu naru naxkʼe saʼ xiwxiwal li xyuʼam ebʼ li nekeʼraj xbʼaanunkil li us.

NAABʼALEBʼ INKʼAʼ NEKEʼXNAW KʼARU LI US UT LI INKʼAʼ US.

«Wankebʼ bʼe li tiikebʼ nekeʼkʼutunk saʼ xtiklajik, abʼan aʼ li kamk nekeʼraqeʼk wiʼ» (PROVERBIOS 14:12).

Naabʼalebʼ li kristiʼaan nekeʼxkʼoxla naq nekeʼxbʼaanu li us, abʼan saʼ xnumikebʼ li kutan nekeʼxkʼe reetal naq moko us ta peʼ li xeʼxbʼaanu. Usta xeʼxkʼoxla naq us raj li yookebʼ xbʼaanunkil, abʼanan xeʼxkʼul rahilal xbʼaan li xeʼxbʼaanu.

MAAʼANI NAXNAW LI TIXKʼUL SAʼ LI XYUʼAM.

«Inkʼaʼ nekenaw kʼaru teekʼul wulaj» (SANTIAGO 4:14).

Yalaq joqʼe naru nakamk junaq li kristiʼaan li chaabʼil xnaʼlebʼ. Jun eetalil, saʼ xkʼabʼaʼ li yajel COVID-19, naabʼalebʼ li xeʼxyeechiʼi ribʼ chi xtenqʼankil li junchʼol, xeʼkamk. Qilaq li kixkʼul li xLiting li wank China. Aʼan naxye naq li xyuwaʼ kikamk saʼ jun li bʼelebʼaal chʼiichʼ. Naxye ajwiʼ: «Inkʼaʼ nintaw ru kʼaʼut kikamk linyuwaʼ usta chaabʼil xnaʼlebʼ. Aʼan kaw nakʼanjelak, naxkubʼsi ribʼ, naxye li yaal ut kaʼajwiʼ aʼan li kikamk».

Joʼkan bʼiʼ, wi moko tzʼaqal ta rikʼin naq chaabʼil qanaʼlebʼ re naq us tooʼelq saʼ li qayuʼam, kʼaru chik tento xbʼaanunkil? Re xtawbʼal xsumenkil, aajel ru naq tqasikʼ ebʼ li naʼlebʼ li tixsume ebʼ li qapatzʼom ut tixkʼut chiqu chanru naʼlebʼak re naq us tooʼelq saʼ li qayuʼam. Bʼar tqataw li naʼlebʼ aʼin?