Chiqajunilo naqaj naq us tooʼelq saʼ li qayuʼam
Chanru taawaj naq teʼwanq laajunkabʼal saʼ jun kutan? Peʼyaal naq taawaj naq sahaqebʼ saʼ xchʼool, inkʼaʼ teʼyajerq, teʼwanq saʼ tuqtuukilal ut wanq li kʼaru naʼajmank chiruhebʼ. Relik chi yaal, naq chiqajunilo naqaj raj naq joʼkanaq li qayuʼam.
Abʼan, naabʼalebʼ nekeʼxkʼoxla naq chʼaʼaj xtawbʼal aʼin xbʼaan naq wank sut saʼ junpaat najalaak chixjunil. Joʼ yook chi kʼulmank rikʼin li yajel COVID-19, xjal xwanjikebʼ li kristiʼaan, xmaakʼaʼok li tzekemq ut ak xkamsi naabʼal li kristiʼaan. Xbʼaan aʼin, naabʼalebʼ nekeʼxkʼoxla naq maajunwa tchaabʼiloʼq li xyuʼamebʼ.
Xbʼaan naq inkʼaʼ nekeʼxnaw kʼaru xbʼaanunkil nekeʼxsikʼ kʼaru ttenqʼanq rehebʼ. Wankebʼ nekeʼxkʼoxla naq ak wank kʼaru xaqabʼanbʼil saʼ xyuʼamebʼ malaj li suʼeert. Wankebʼ ajwiʼ nekeʼxkʼoxla naq wi chaabʼil laatzolbʼal ut wank aabʼihomal tatruuq xsikʼbʼal kʼaru taawaj saʼ laayuʼam. Junchʼol chik nekeʼxye naq, re naq us tat-elq tento naq chaabʼilaq laanaʼlebʼ.
Ma naru tawiʼ ebʼ li naʼlebʼ aʼin aatenqʼankil re naq chaabʼilaq laayuʼam? Re xnawbʼal xsumenkil, qilaq ebʼ li patzʼom aʼin:
Kʼaru nataqlank saʼ laayuʼam?
Ma chaabʼilaq laayuʼam wi wank aatzolbʼal ut aatumin?
Ma us tat-elq wi chaabʼil laanaʼlebʼ?
Bʼar tatruuq xtawbʼal li naʼlebʼ re naq us tat-elq saʼ laayuʼam?
Li hu aʼin tatxtenqʼa chi xtawbʼal xsumenkil.