Ma chaabʼilaq laayuʼam wi wank aatzolbʼal ut aatumin?

Naabʼalebʼ li kristiʼaan nekeʼxkʼoxla naq li chaabʼilebʼ xtzolbʼal ut wankebʼ xtumin, us nekeʼelk saʼebʼ li xyuʼam. Naabʼal nekeʼxye naq li ninqi kʼayibʼaal, li junkabʼal ut li teep naxtaw rusilal wi junaq naxik saʼebʼ li nimla tzolebʼaal. Ut nekeʼxkʼoxla ajwiʼ naq, wi junaq chaabʼil xtzolbʼal, chaabʼilaq li xkʼanjel, tixkʼul naabʼal li tumin ut sahaq saʼ xchʼool.

LI NEKEʼXBʼAANU EBʼ LI KRISTIʼAAN

Laj Zhang Chen li wank China naxye: «Ninkʼoxla chaq naq tento tinxik saʼ junaq li nimla tzolebʼaal re naq tintaw junaq li chaabʼil kʼanjel ut chi joʼkan inkʼaʼ chik tinwanq saʼ nebʼaʼil ut sahaq saʼ inchʼool».

Re naq us teʼelq saʼebʼ li xyuʼam, naabʼalebʼ nekeʼraj xik chi tzolok saʼebʼ li nimla tzolebʼaal li nawbʼil ru usta tento teʼxik saʼ jalan chik tenamit. Aʼin nekeʼxbʼaanu chaq naabʼal li kristiʼaan, abʼan naq kichalk li COVID-19 xchʼaʼajkoʼk chik chiruhebʼ. Maare 10 chihabʼ anaqwan jun li molam kixtzʼil rix aʼin ut kixye resil naq numenaq «xyijachil ebʼ li nekeʼtzolok saʼebʼ li nimla tzolebʼaal saʼ jalan chik tenamit nekeʼchalk Asia».

Naabʼalebʼ li naʼbʼej yuwaʼbʼej kaw nekeʼkʼanjelak re naq teʼruuq xtaqlankil ebʼ li ralal xkʼajol chi tzolok saʼebʼ li nimla tzolebʼaal saʼ jalan chik tenamit. Laj Qixiang li wank Taiwán naxye: «Linnaʼ ut linyuwaʼ moko naabʼal ta ebʼ li xtumin. Usta joʼkan, xooʼeʼxtaqla saʼ kahichal chi tzolok saʼ Estados Unidos». Re naq teʼruuq xtojbʼal ebʼ li nimla tzolebʼaal, li xjunkabʼal laj Qixiang, joʼ ajwiʼ ebʼ li jalan chik chi junkabʼal, nekeʼxkʼe ribʼ saʼ kʼas.

LI NAKʼULMANK

Usta wank rusilal li tzolok, naabʼalebʼ nekeʼxkʼe reetal naq nekeʼxkʼul li inkʼaʼ nekeʼroybʼeni. Jun eetalil, usta ak naabʼal chihabʼ rokikebʼ chi kʼanjelak ut chi xkʼebʼal ribʼebʼ saʼ kʼas, inkʼaʼ ajwiʼ nekeʼxtaw li kʼanjel li nekeʼraj. Jun li esil li kixtzʼiibʼa li xRachel Mui re li molam Business Times re Singapur naxye: «Naabʼal li nekeʼelk saʼebʼ li nimla tzolebʼaal inkʼaʼ nekeʼxtaw junaq li xkʼanjel». Laj Jianjie, li kitzolok saʼebʼ li nimla tzolebʼaal ut wank aran Taiwán, naxye: «Naabʼalebʼ nekeʼxkʼulubʼa junaq li kʼanjel usta moko naxchap ta ribʼ rikʼin li xeʼxtzol».

Usta wiibʼ oxibʼ rehebʼ xeʼxtaw junaq li kʼanjel chirix li xeʼtzolok wi, moko sahebʼ ta saʼ xchʼool. Laj Niran li wank Tailandia kitzolok saʼ jun li nimla tzolebʼaal li wank Reino Unido. Naq kisutqʼiik chaq saʼ li xtenamit, kixtaw jun li xkʼanjel chirix li kixtzol chaq. Aʼan naxye: «Saʼ xkʼabʼaʼ li xintzol, xintaw jun li kʼanjel bʼarwiʼ terto nikineʼxtoj. Abʼan, re naq tintaw xkomon intumin tento naq kaw tinkʼanjelaq ut tinkʼe xtzʼaqobʼ linhoonal saʼ linkʼanjel. Moqon, saʼ li naʼaj bʼarwiʼ ninkʼanjelak xeʼrisi naabʼal ebʼ laj kʼanjel, joʼ ajwiʼ laaʼin. Xinkʼe reetal naq maakʼaʼ junaq kʼanjel li truuq xbʼaanunkil naq chaabʼilaq laayuʼam».

Wankebʼ li kristiʼaan li bʼihomebʼ ut chaabʼilebʼ xyuʼam, usta joʼkan, nekeʼxkʼul ebʼ li chʼaʼajkilal, li yajel ut nekeʼxik xchʼool chirixebʼ li xtumin. Laj Katsutoshi li wank Japón naxye: «Usta naabʼal intumin, moko sa ta chaq inchʼool, xbʼaan naq naabʼalebʼ nekeʼxjuntaqʼeeta ribʼ wikʼin, nikineʼxkaqali ut xikʼ nikineʼril». Li xLam li wank Vietnam naxye: «Naabʼalebʼ li kristiʼaan nekeʼxyal xqʼe chi xtawbʼal naabʼal li tumin re naq chaabʼilaq li xyuʼamebʼ. Usta joʼkan, nekeʼok xkʼaʼuxl ut nekeʼyajerk».

Joʼ laj Franklin, naabʼalebʼ xeʼxkʼe reetal naq wank li aajel ru xbʼaanunkil chiru xik saʼebʼ li nimla tzolebʼaal ut xtambʼresinkil ebʼ li xbʼihomal. Wiibʼ oxibʼ rehebʼ li kristiʼaan inkʼaʼ nekeʼxik xchʼool chirix li bʼihomal, nekeʼxyal bʼan xqʼe chi xchaabʼilobʼresinkil li xnaʼlebʼ re naq chaabʼil teʼnaʼlebʼaq rikʼinebʼ li junchʼol. Ma tooxtenqʼa tawiʼ aʼin re naq us tooʼelq saʼ li qayuʼam? Saʼ li jun chik tzolom tqataw li xsumenkil.