Li Jehobʼa naxkʼe xchʼool chirixebʼ laj kʼanjel chiru

1. Kʼaʼut naq li Jesús kixtzʼaama re li Xyuwaʼ naq tixkolebʼ li xtzolom?

JUN QʼOQYINK chik ma nakamk, li Jesús kixtzʼaama re li xchoxahil Yuwaʼ: naq trilebʼ laj kʼanjel chiru (Juan 17:15, 20). Yaal, li Jehobʼa junelik narilebʼ ut naxkolebʼ laj kʼanjel chiru. Abʼanan, li Jesús naxnaw naq laj Tza qʼaxal tixrahobʼtesihebʼ wiʼ chik li xtzolom, joʼkan naq kixpatzʼ xtenqʼ re li Jehobʼa.

2. Joʼ naxye Salmo 33:18-20, kʼaʼut naq inkʼaʼ tqaxuwa ru li chʼaʼajkilal?

² Li xruuchichʼochʼ laj Tza kʼajoʼ naxminebʼ ru ebʼ li tzʼaqal aj paabʼanel. Ebʼ li chʼaʼajkilal naru narisi xsahil qachʼool ut tixyal rix li qapaabʼal. Saʼ li tzolom aʼin tqil, kʼaʼut naq inkʼaʼ tooxuwaq. Xbʼaan naq li Jehobʼa nokooxkʼaakʼale, naraj xyeebʼal, naril chixjunil li naqakʼul ut yoʼon wank re qatenqʼankil. Tqatzʼil rix wiibʼ li naʼlebʼ li wank saʼ li Santil Hu bʼarwiʼ naxye naq «li Qaawaʼ naxkʼaakʼalehebʼ li nekeʼxuwank ru» (taayaabʼasi Salmo 33:18-20).

NAQ NAQEKʼA QIBʼ QAJUNES

3. Joqʼe tqekʼa qibʼ qajunes?

³ Usta wanko saʼ xyanq li xjunkabʼal li Yos, wank sut naqekʼa qibʼ qajunes. Maare ebʼ li saaj nekeʼrekʼa ribʼ xjunes naq nekeʼxkol li xpaabʼal saʼ li tzolebʼaal malaj naq nekeʼxjal li xchʼuut. Maare wank sut narahoʼk saʼ qachʼool ut naqakʼoxla naq maakʼaʼ nokooʼok wiʼ, ut aʼin naru naxbʼaanu naq tqakʼoxla naq wanko qajunes chi xqʼaxbʼal ru li chʼaʼajkilal. Aʼin tixbʼaanu naq inkʼaʼ tqaj aatinak chirix li qachʼaʼajkilal xbʼaan naq maare tqakʼoxla naq ebʼ li junchʼol inkʼaʼ nekeʼxtaw ru li naqekʼa. Malaj inkʼaʼ nekeʼxkʼe xchʼool chiqix. Joʼkan ajwiʼ, maare tqekʼa qibʼ naq yal qajunes wanko ut aʼin tixkʼe xrahil qachʼool. Abʼanan, li Jehobʼa moko naraj ta naq tqekʼa qibʼ kamaʼan, kʼaʼut naqaye aʼin?

4. Kʼaʼut kixye li propeet Elías «kaʼajin aj chik xinkanaak»?

⁴ Qilaq li kixkʼul li propeet Elías. Aʼan kiʼelelik chiru 40 kutan xbʼaan naq li xJezabel naraj xkamsinkil (1 Rey. 19:1-9). Xjunes kiwank saʼ jun li ochoch pek, bʼarwiʼ kixye re li Jehobʼa: «Kaʼajin aj chik xinkanaak» (1 Rey. 19:10). Kixkʼoxla tana naq kaʼaj chik aʼan li propeet saʼ li tenamit, abʼanan moko joʼkan ta. Laj Abdías kixkol 100 chi propeet saʼ ruqʼ li xJezabel (1 Rey. 18:7, 13). Kʼaʼut kirekʼa ribʼ chi joʼkaʼin? Kixkʼoxla tana naq xeʼkamk chixjunilebʼ li propeet li kixkolebʼ laj Abdías. Maare kirekʼa ribʼ xjunes naq kiril naq maaʼani kipaabʼank re li Jehobʼa chirix li kikʼulmank rikʼinebʼ li xpropeet laj Baal saʼ li tzuul Carmelo. Kixkʼoxla tana naq maaʼani kiʼilok re naq wank saʼ xiwxiwal li xyuʼam ut naq maaʼani naxkʼe xchʼool chirix. Li Santil Hu inkʼaʼ naxye kʼaru kixkʼoxla, abʼan li naqanaw aʼan naq li Jehobʼa naxtaw ru naq laj Elías narekʼa ribʼ xjunes ut kixnaw xtenqʼankil.

5. Kʼaru kixbʼaanu li Jehobʼa re xkʼutbʼesinkil chiru laj Elías naq moko wank ta xjunes?

⁵ Li Jehobʼa naabʼal sut kixtenqʼa laj Elías. Kixwaklesi xchʼool naq kixye re chixjunil li narekʼa. Wiibʼ sut li Jehobʼa kixpatzʼ re: «Kʼaru yookat arin, a Elías?» (1 Rey. 19:9, 13). Kaʼsut li Jehobʼa kixkʼe xchʼool chi rabʼinkil. Li Jehobʼa kixye re naq aran wank ut naq aʼan jun li Yos wank xwankil. Kixye re naq saʼ li tenamit Israel toj wankebʼ li nekeʼxloqʼoni ru li Jehobʼa (1 Rey. 19:11, 12, 18). Chʼolchʼo naq laj Elías sa kirekʼa ribʼ naq kixye re chixjunil aʼin ut rabʼinkil naq kisumeek. Joʼkan ajwiʼ, li Jehobʼa kixkʼe wiʼ chik li xchʼinaʼusil kʼanjel: tixyul ru laj Hazael choʼq awabʼej re Siria, laj Jehú choʼq awabʼej re Israel ut laj Eliseo choʼq propeet (1 Rey. 19:15, 16). Naq kikʼeheʼk re li kʼanjel aʼin, laj Elías kisahoʼk saʼ xchʼool ut kikʼeheʼk ajwiʼ jun li rochbʼen, aʼ laj Eliseo. Kʼaru tooruuq xbʼaanunkil wi naqekʼa qibʼ qajunes ut naʼajmank chiqu li xtenqʼ li Jehobʼa?

6. Kʼaru tqaye re li Jehobʼa wi naqekʼa qibʼ qajunes? (Salmo 62:9).

⁶ Li Jehobʼa naraj naq tooʼaatinaq rikʼin saʼ li qatij. Aʼan naxnaw li naqekʼa ut naru nokootijok chiru yalaq kʼaru hoonal (1 Tes. 5:17). Nasahoʼk saʼ xchʼool chi qabʼinkil (Prov. 15:8). Kʼaru tooruuq xyeebʼal re li Jehobʼa? Naru naqaye re chixjunil, joʼ laj Elías (taayaabʼasi Salmo 62:9). Qayehaq re li naxkʼe xkʼaʼuxl qachʼool. Qapatzʼaq qatenqʼ re, re xnawbʼal kʼaru tooruuq xbʼaanunkil. Wi laaʼat jun li saaj, kʼaru tatruuq xbʼaanunkil wi nakaawekʼa aawibʼ aajunes ut nakatxuwak chi aatinak chirix li Jehobʼa saʼ li tzolebʼaal? Naru nakaatzʼaama re naq tixkʼe xkawilal aachʼool ut aanaʼlebʼ re xchʼolobʼankil li nakaapaabʼ (Luc. 21:14, 15). Kʼaru tatruuq xbʼaanunkil wi nakaawekʼa naq maakʼaʼ nakat-ok wiʼ? Tzʼaama re li Jehobʼa re naq tatxtenqʼa chi aatinak rikʼin jun laj paabʼanel li kaw saʼ xpaabʼal ut naq li Jehobʼa tixtenqʼa li hermaan aʼin chi xtawbʼal ru li nakaawekʼa. Tqate qachʼool chiru li Jehobʼa, tqil chanru nokooxsume ut tqakʼulubʼa li xtenqʼ ebʼ li junchʼol chi joʼkan inkʼaʼ tqekʼa qibʼ qajunes.

7. Kʼaru nakaatzol rikʼin laj Mauricio?

⁷ Li Jehobʼa naxkʼe qakʼanjel li wank xwankil. Aʼan naril ut naroxloqʼi li naqabʼaanu saʼ li chʼuut ut saʼ li puktesink (Sal. 110:3, Wy). Naq laatzʼ qu saʼ li xkʼanjel li Jehobʼa inkʼaʼ naqekʼa qibʼ qajunes. Kʼaʼut? Qilaq li naxye laj Mauricio.b Naq tojeʼaq kixsubʼ ribʼ saʼ haʼ, jun rehebʼ li ramiiw kiʼok xkanabʼankil li Jehobʼa. Aʼan naxye: «Rilbʼal naq li wamiiw xkanabʼ li Jehobʼa kiʼok inkʼaʼuxl ut xwekʼa wibʼ injunes, ut ninkʼoxla ma tinruuq xbʼaanunkil li xinyeechiʼi re li Jehobʼa ut wank junelik saʼ li xjunkabʼal. Nawekʼa wibʼ injunes, ninkʼoxla naq maaʼani ttawoq ru li nawekʼa». Kʼaru kitenqʼank re, re naq inkʼaʼ trekʼa ribʼ chi joʼkan? Aʼan naxye: «Li kitenqʼank we aʼan xkʼebʼal xkomon inhoonal saʼ li puktesink, inkʼaʼ chik tinkʼoxla wibʼ injunes ut joʼkan ajwiʼ inkʼaʼ t-oq inkʼaʼuxl. Puktesink rikʼinebʼ li junchʼol naxkʼe xsahil inchʼool ut inkʼaʼ chik nawekʼa wibʼ injunes». Joʼkan ajwiʼ naqekʼa naq inkʼaʼ nokoopuktesink rochbʼenebʼ li hermaan saʼ kristiʼaanil abʼan tento toopuktesinq rikʼin li esilhu ut saʼ selular, aʼin naxkʼe xkawil qachʼool. Kʼaru chik kitenqʼank re laj Mauricio? Aʼan naxye: «Xinʼok chi kʼanjelak chi kaw saʼ li chʼuut. Ninyal inqʼe chi xkawresinkil wibʼ re xkʼebʼal junaq li kʼanjel saʼ li chʼuut. Saʼ xkʼabʼaʼ aʼin kiwekʼa xrahom li Jehobʼa ut ebʼ li hermaan».

NAQ EBʼ LI CHʼAʼAJKILAL NAXKʼE XRAHIL QACHʼOOL

8. Chanru tqekʼa qibʼ naq tqanumsi ebʼ li chʼaʼajkilal?

⁸ Chiqajunilo naqanaw naq tqakʼul ebʼ li chʼaʼajkilal xbʼaan naq wanko saʼ rosoʼjikebʼ li kutan (2 Tim. 3:1). Abʼanan, maare tsachq qachʼool xkʼulbʼal ebʼ li chʼaʼajkilal li inkʼaʼ naqoybʼeni. Maare chirix li tumin, tooyajerq malaj tkamq junaq li qakomon malaj li qamiiw. Aʼin tixkʼe xrahil qachʼool, qʼaxal chik wi naqil naq saʼ reqaj ribʼ naqakʼul ebʼ li chʼaʼajkilal. Abʼanan, li Jehobʼa yoʼon wank chi qatenqʼankil ut rikʼin li xtenqʼ tooruuq xnumsinkil yalaq kʼaru chi chʼaʼajkilal.

9. Bʼar wank junjunq li chʼaʼajkilal li kixnumsi laj Job?

⁹ Qilaq li kixkʼul laj Job. Saʼ reqaj ribʼ kixkʼul naabʼal li rahilal. Keʼkamk li xwakax, ebʼ li xmoos ut li qʼaxal ra wiʼ chik, aʼan naq keʼkamk li ralal xkʼajol li raarokebʼ xbʼaan (Job 1:13-19). Toj maajiʼ ajwiʼ nanumeʼk xrahil xchʼool, kichapeʼk xbʼaan jun li nimla yajel (Job 2:7). Kʼajoʼ xrahil yook xkʼulbʼal, joʼkan naq kixye: «Inkʼaʼ chik ninkuy, inkʼaʼ chik nawaj wank chi yoʼyo» (Job 7:16).

10. Kʼaru kixbʼaanu li Jehobʼa re xtenqʼankil laj Job chi xnumsinkil ebʼ li chʼaʼajkilal? (Chaawil li jalam u chiru li hu).

¹⁰ Li Jehobʼa naril chixjunil li yook xkʼulbʼal laj Job. Ut, saʼ xkʼabʼaʼ naq naxra, kixkʼe li naʼajmank chiru re naq truuq xnumsinkil ebʼ li chʼaʼajkilal ut inkʼaʼ tixtzʼeqtaana li Yos. Li Jehobʼa ajwiʼ kiʼaatinak rikʼin laj Job, kixye re li xchoxahil naʼlebʼ ut chanru naxrahebʼ li xyobʼtesihom. Kiʼaatinak chirix wiibʼ oxibʼ ebʼ li xul (Job 38:1, 2; 39:9, 13, 19, 27; 40:15; 41:1, 2). Joʼkan naq, kixtaqla laj Elihú re xkʼojobʼankil ut xwaklesinkil xchʼool laj Job. Li saaj aʼin kixjultika chiru naq li Yos narosobʼtesihebʼ li wankebʼ xkuyum. Li Jehobʼa kiraj ajwiʼ naq tixkʼe xnaʼlebʼ. Laj Elihú kixtenqʼa re naq moko kaʼaj tawiʼ tixkʼoxla ribʼ xjunes kixye re naq inkʼaʼ tixjuntaqʼeeta ribʼ rikʼin li Jehobʼa xbʼaan naq aʼan laj Yobʼtesinel re chixjunil (Job 37:14). Li Jehobʼa kixye ajwiʼ re laj Job naq ttijoq chirixebʼ li oxibʼ chi ramiiw li xeʼmaakobʼk (Job 42:8-10). Saʼebʼ li qakutan, li Jehobʼa ajwiʼ nokooxtenqʼa chi xnumsinkil yalaq kʼaru chi chʼaʼajkilal.

11. Chanru naxkʼojobʼ qachʼool li Santil Hu naq naqakʼul ebʼ li chʼaʼajkilal?

¹¹ Li Jehobʼa inkʼaʼ chik naʼaatinak qikʼin, joʼ kixbʼaanu chaq rikʼin laj Job. Abʼanan naroksi li Santil Hu (Rom. 15:4). Re xkʼojobʼankil qachʼool ut naxkʼe qoybʼenihom. Qilaq wiibʼ oxibʼ li naʼlebʼ li naqataw saʼ li Santil Hu li naxkʼojobʼ qachʼool naq naqanumsi ebʼ li chʼaʼajkilal. Saʼ li Santil Hu, li Jehobʼa naxye qe naq maakʼaʼ «naru taajachoq qe rikʼin li xrahom li Yos» (Rom. 8:38, 39). Naxye ajwiʼ naq «nachʼ wank […] rikʼinebʼ li nekeʼyaabʼank li xkʼabʼaʼ» malaj narabʼihebʼ li xtij (Sal. 145:18). Li Jehobʼa naxye ajwiʼ qe, naq wi naqakʼojobʼ qachʼool rikʼin, naru naqakuy ebʼ li chʼaʼajkilal ut naq sahaq saʼ qachʼool (1 Cor. 10:13; Sant. 1:2, 12). Li Santil Hu ajwiʼ naxjultika chiqu naq ebʼ li chʼaʼajkilal yal numelebʼ chiru li osobʼtesihom li naxyeechiʼi li Jehobʼa, aʼ li junelik yuʼam (2 Cor. 4:16-18). Li Jehobʼa naxye ajwiʼ, naq chi seebʼ trisi chixjunil li nakʼamok chaq re li rahilal: aʼ laj Tza ut li chanchanebʼ joʼ aʼan (Sal. 37:10). Ma ak xaaxok saʼ aachʼool wiibʼ oxibʼ xraqal li Santil Hu li tatxtenqʼa re xnumsinkil li chʼaʼajkilal li naru taakʼul saʼ junaq kutan?

12. Kʼaru tento tqabʼaanu re xtawbʼal rusilal li tenqʼ li naxkʼe qe li Jehobʼa saʼ li Santil Hu?

¹² Re xtawbʼal rusilal li tenqʼ li naxkʼe li Jehobʼa rikʼin li Santil Hu naroybʼeni naq tqil xsaʼ wulaj wulaj, tqanaʼlebʼa rix ut tqayuʼami li naqatzol, li qapaabʼal ut li qamiiwil tkawuuq. Joʼkan ajwiʼ, tixkʼe qametzʼew re naq tooruuq xnumsinkil ebʼ li chʼaʼajkilal. Wi naqakʼojobʼ qachʼool rikʼin li Santil Hu, li Jehobʼa tixkʼe qe li xsantil musiqʼej. Ut aʼin tixkʼe «li xnimal ru wankilal [...] nachalk rikʼin li Yos» re xnumsinkil yalaq kʼaru chi chʼaʼajkilal (2 Cor. 4:7-10).

13. Chanru nokooxtenqʼa chi xkuybʼal li chʼaʼajkilal li naʼlebʼ naxkʼe qe «li moosej tiik xchʼool ut wank xnaʼlebʼ»?

¹³ Rikʼin xtenqʼ li Jehobʼa, «li moosej tiik xchʼool ut wank xnaʼlebʼ» naxkʼe naabʼal li qamaatan, joʼ li bʼich, li tasal hu ut ebʼ li bʼideo li nokooxtenqʼa re naq kawaqo saʼ li qapaabʼal ut aj ajaq qu (Mat. 24:45). Joʼkan naq, aajel ru naq tqoxloqʼi chixjunil li maatan aʼin li nawulak saʼ li hoonal bʼarwiʼ naʼajmank chiqu. Jun li hermaan, li wank Estados Unidos, kixbʼanyoxi li naʼlebʼ li naxkʼe li moosej tiik xchʼool. Kixye: «Chiru li 40 chihabʼ wokik chi kʼanjelak chiru li Jehobʼa, rajlal nayaleʼk rix linpaabʼal». Li hermaan aʼin kixnumsi naabʼal li chʼaʼajkilal. Jun laj kalajenaq kixkamsi li xyuwaʼchin, li xnaʼ xyuwaʼ xeʼkamk xmaak jun li nimla yajel ut li hermaan aʼin kaʼsut kichapeʼk xbʼaan li kanser. Kʼaru kitenqʼank re? Aʼan naxye: «Li Jehobʼa junelik nikinxtenqʼa. Li naʼlebʼ li naxkʼe qe li moosej tiik xchʼool ut wank xnaʼlebʼ kʼajoʼ nikinxtenqʼa re naq tinruuq xkuybʼal chixjunil li rahilal aʼin. Joʼkan naq, ninruuk xyeebʼal joʼ kixye chaq laj Job: “Chalen toj saʼ linkamik [...] laaʼin junelik tinye naq maakʼaʼ inmaak [“tzʼaqal ru inchʼool”, TNM]”» (Job 27:5).

14. Chanru naroksihebʼ li Jehobʼa li hermaan naq naqakʼul li chʼaʼajkilal? (1 Tesalonicenses 4:9).

¹⁴ Li Jehobʼa nokooxtzol re naq tqara qibʼ ut tqakʼojobʼ qachʼool chiqibʼil qibʼ naq naqanumsi ebʼ li chʼaʼajkilal (2 Cor. 1:3, 4; taayaabʼasi 1 Tesalonicenses 4:9). Ebʼ li qahermaan chanchanebʼ laj Elihú, nekeʼraj qatenqʼankil re naq tiikaq qachʼool chiru li Jehobʼa naq naqanumsi ebʼ li chʼaʼajkilal (Hech. 14:22). Li xDiane, jun li hermaan, kiril tzʼaqal aʼin. Naq kiyajerk li xbʼeelom, li chʼuut kixtenqʼa re naq kawaq saʼ li xpaabʼal. Naxye: «Ra xqakʼul chiruhebʼ li po aʼin, abʼan li Jehobʼa xooxtenqʼa xbʼaan naq li chʼuut kʼajoʼ xooxtenqʼa, nokooʼeʼrulaʼani, nokooʼeʼxbʼoq... Ut, saʼ xkʼabʼaʼ naq inkʼaʼ ninnaw xbʼeresinkil li bʼelebʼaal chʼiichʼ, xeʼxkʼubʼ ribʼ re naq tineʼxkʼam saʼ li chʼutam ut saʼ li puktesink, naq naxkʼe ribʼ chiwu». Peʼyaal naq chʼinaʼus naq wanko saʼ jun li junkabʼal bʼarwiʼ qʼaxal nekeʼrahok?

NAQABʼANYOXI NAQ LI JEHOBʼA NOKOOXRA

15. Kʼaʼut chʼolchʼo chiqu naq tooruuq xqʼaxbʼal ruhebʼ li chʼaʼajkilal?

¹⁵ Chiqajunilo naqanumsi ebʼ li chʼaʼajkilal. Abʼanan, moko qajunes ta wanko. Joʼ jun li yuwaʼbʼej li qʼaxal narahok, li Jehobʼa yoʼon wank chi rabʼinkil li qatij naq naqatzʼaama qatenqʼ re (Is. 43:2). Tooruuq xnumsinkil ebʼ li chʼaʼajkilal xbʼaan naq li Jehobʼa qʼaxal naxkʼe xchʼool chi qatenqʼankil ut naxkʼe qe chixjunil re xkawresinkil li qapaabʼal: joʼ li Santil Hu, li tijok, ebʼ li qatasal hu ut ebʼ li qahermaan li kʼajoʼ nokooʼeʼxra chi anchalebʼ xchʼool.

16. Kʼaru tooruuq xbʼaanunkil re naq li Jehobʼa junelik tooril?

¹⁶ Qʼaxal naqabʼanyoxi naq wank jun li qaraarokil Yuwaʼ li nokooril. «Rikʼin aʼan nasahoʼk li qachʼool» (Sal. 33:21). Chanru tqakʼutbʼesi naq naqabʼanyoxi naq aʼan nokooril chi anchal xchʼool? Tqoksi chiʼus chixjunil li tenqʼ li naxkʼe qe. Joʼkan ajwiʼ, tento tqayal qaqʼe chi abʼink ut xbʼaanunkil li nawulak chiru. Wi naqabʼaanu, aʼan maajunwa tooxkanabʼ (1 Ped. 3:12).