3 | Ebʼ li eetalil li wank saʼ li Santil Hu

SAʼ LI SANTIL HU NATAWMANK: Ebʼ li eetalil chirixebʼ li «winq joʼ laaʼo» (SANTIAGO 5:17, Wy).

Kʼaru naraj xyeebʼal?

Saʼ li Santil Hu natawmank resil chirixebʼ li winq ut ixq li xeʼrekʼa chaq ribʼ joʼ naqekʼa qibʼ laaʼo. Wi naqayaabʼasi li xeʼxkʼul chaq, maare naqataw junaq li kixkʼul chaq joʼ li yooko xkʼulbʼal laaʼo.

Chanru nokooxtenqʼa?

Chiqajunilo naʼajmank chiqu naq ebʼ li junchʼol teʼxtaw ru chanru naqekʼa qibʼ, qʼaxal chik naq wank xyajel li qakʼaʼuxl. Naq naqil li xeʼxkʼul chaq ebʼ li poyanam aʼan, naqakʼe reetal naq xeʼrekʼa ajwiʼ chaq li naqekʼa laaʼo. Aʼin tooxtenqʼa re naq tqakʼe reetal naq ebʼ aʼan xeʼxkʼul ajwiʼ chaq li rahilal xbʼaan li xkʼaʼuxebʼ joʼ naqakʼul ajwiʼ laaʼo.

Li Santil Hu naxkʼut li xeʼxye ebʼ li qas qiitzʼin li xeʼrahoʼk xchʼool ut xeʼrekʼa naq maakʼaʼ chik xmetzʼewebʼ. Ma xaakʼoxla junsutaq aʼin: «Inkʼaʼ chik ninkuy, inkʼaʼ chik ninruuk chi wank chi joʼkaʼin»? Aʼin tzʼaqal li xeʼrekʼa chaq laj Moisés, laj Elías ut laj David (Números 11:14; 1 Reyes 19:4; Salmo 55:5).
Li Santil Hu naʼaatinak chirix li xʼAna, jun li ixq li qʼaxal ra chaq xchʼool xbʼaan naq inkʼaʼ naru chi wank xkokʼal ut kʼajoʼ nahobʼeʼk xbʼaan li rech ixaqilbʼejil (1 Samuel 1:6, 10).
Maare nakaawekʼa aawibʼ joʼ laj Job, jun li winq li naʼaatinak wiʼ li Santil Hu. Usta kaw chaq li xpaabʼal, abʼan kʼajoʼ naq kirahoʼk xchʼool joʼkan naq kixye: «Inkʼaʼ chik ninkuy, inkʼaʼ chik nawaj wank chi yoʼyo» (Job 7:16).

Chixjunilebʼ li kristiʼaan aʼin xeʼruuk xqʼaxbʼal ru li naʼlebʼ li naxkʼe xkʼaʼuxebʼ. Laaʼo ajwiʼ tooruuq xbʼaanunkil aʼin wi naqakʼe reetal li xeʼxbʼaanu.

Chanru kitenqʼaak xbʼaan li Santil Hu laj Kevin

Chanru ninxchʼiʼchʼiʼi li xyajel linkʼaʼuxl

«Naq ok we xketbʼal 50 chihabʼ, xeʼxye we naq wank jun linyajel li naxchʼiʼchʼiʼi linkʼaʼuxl ut naxbʼaanu naq saʼ junpaat najalaak linnaʼlebʼ ut chanru nawekʼa wibʼ (trastorno bipolar). Wank sut nawekʼa naq ninruuk xtuqubʼankil ru yalaq kʼaru chi chʼaʼajkilal, abʼan wank sut ninkʼoxla naq us raj naq tinkamq».

Chanru ninxtenqʼa li Santil Hu

«Nawekʼa wibʼ joʼ li apóstol Pedro. Wank sut kirekʼa ribʼ naq maakʼaʼ naʼok wiʼ xbʼaan li xpaltil li kixbʼaanu chaq. Abʼan, moko xkoho ta xchʼool chirix aʼin, kixsikʼ bʼan xtenqʼ rikʼinebʼ li ramiiw li nekeʼxkʼe xchʼool chirix. Saʼ xkʼabʼaʼ naq wank sut saʼ junpaat najalaak joʼ chanru nawekʼa wibʼ, raachisa ninnumsi li kutan. Ut chiruhebʼ li kutan aʼan qʼaxal naxik chik linchʼool chirix linpaltil ut aʼin naxbʼaanu naq tinkʼoxla naq maakʼaʼ ninʼok wiʼ. Abʼan, joʼ laj Pedro, xintzol chi timil timil xkʼojobʼankil inchʼool rikʼinebʼ linchaabʼil amiiw saʼebʼ li hoonal aʼan. Ebʼ aʼan nikineʼxtenqʼa re naq inkʼaʼ tintʼaneʼq chi junajwa ut naq tinʼelq chi’ub’ej.

»Joʼkan ajwiʼ ninkʼoxla chanru kirekʼa ribʼ li awabʼej David. Naabʼal sut kirahoʼk xchʼool xbʼaan li yook xkʼulbʼal malaj xbʼaan li xpaltil. Wank sut ninkʼul ajwiʼ aʼin: nachalk xrahil inchʼool xbʼaan li kʼaʼaq re ru li xinbʼaanu malaj xinye. Joʼkan naq naxkʼojobʼ tzʼaqal linchʼool li kixtzʼiibʼa laj David saʼ li Salmo 51. Saʼ li raqal 5, kixye: “Ninnaw chi us naq xinqʼet laawaatin, rajlal nanaq saʼ inchʼool li maak xinbʼaanu”. Joʼkan tzʼaqal nawekʼa wibʼ naq qʼaxal ra linchʼool, nawekʼa naq moko us ta naʼelk chixjunil li ninbʼaanu. Abʼan nachalk saʼ inchʼool li kixye laj David li natawmank saʼ li raqal 12: “Kʼe we jun tiikil chʼoolej ut saq ru; chinaaʼakʼobʼresi aj tawiʼ saʼ linmusiqʼ”. Chanchan ajwiʼ aʼin li ninpatzʼ re li Yos: naq chinxtenqʼaq re naq sa twekʼa wibʼ. Ut li raqal 19 qʼaxal naxkʼe xkawubʼ linchʼool. Aran naxye: “laaʼat inkʼaʼ nakatzʼeqtaana li nayotʼeʼk xchʼool ut naxkubʼsi ribʼ chawu, at Qaawaʼ”. Rajlal naq nawil aʼin, ninjultika naq li Jehobʼa nikinxra.

»Naq ninkʼoxla rix ebʼ li eetalil li natawmank saʼ li Santil Hu ut chixjunil li naxkʼe we li Yos, nakawuuk li woybʼenihom. Xpaabʼankil li naxyeechiʼi we li Santil Hu nikinxtenqʼa chi xkuybʼal ut re naq inkʼaʼ tchʼinaaq inchʼool».