«Naʼlebʼaqex joʼ naxye li Raatin li Yos»

1, 2. Kʼaʼut sa qachʼool joʼ aj kʼanjel chiru li Jehobʼa? (Santiago 1:​22-25).

LI JEHOBʼA ut li Jesús nekeʼraj naq sahaq qachʼool. Li kitzʼiibʼank re li Salmo 119:2 kixye: «Us xaq rehebʼ li nekeʼxpaabʼ li xtaqlahom ut nekeʼxsikʼ li Yos chi anchalebʼ xchʼool». Ut li Jesús kixye ajwiʼ: «Sahebʼ bʼan saʼ xchʼool li nekeʼrabʼi li raatin li Yos ut nekeʼxyuʼami!» (Luc. 11:28).

² Wank naabʼal xyaalal re naq joʼ aj kʼanjel chiru li Jehobʼa sahaq qachʼool. Jun rehebʼ aʼan naq rajlal naqayaabʼasi li Raatin li Yos ut naqakʼe qachʼool chi xyuʼaminkil li naqatzol (yaabʼasi Santiago 1:​22-25).

3. Kʼaru rusilal naqataw naq naqayuʼami li naxye li Raatin li Yos?

³ Naqataw naabʼal rusilal naq naqayuʼami li «naxye li Raatin li Yos», jun rehebʼ aʼan naq naqasahobʼresi xchʼool li Jehobʼa ut aʼin naxkʼe xsahil qachʼool (Ecl. 12:13). Joʼkan ajwiʼ, xkʼambʼal qe rikʼin li naxye li Raatin li Yos nokooxtenqʼa re xkʼambʼal qibʼ chiʼus rikʼinebʼ li qakomon, ebʼ li qamiiw ut ebʼ li hermaan saʼ li chʼuut. Maare ak xaakʼe reetal aʼin. Joʼkan ajwiʼ, inkʼaʼ naqakʼul li rahilal li nekeʼxkʼul li inkʼaʼ nekeʼxpaabʼ li naxye li Jehobʼa. Joʼ kixye li awabʼej David saʼ jun li bʼich bʼarwiʼ kiʼaatinak chirix li xchaqʼrabʼ li Jehobʼa: «Kʼajoʼ rusil xpaabʼankil aʼan!» (Sal. 19:​8-12).

4. Kʼaʼut wank sut nachʼaʼajkoʼk chiqu xyuʼaminkil li naxye li Raatin li Yos?

⁴ Usta joʼkan, wank sut naq nachʼaʼajkoʼk chiqu xyuʼaminkil li naxye li Raatin li Yos. Abʼanan usta laatzʼ qu tento tqakʼe qahoonal re xyaabʼasinkil ut xtzolbʼal li Santil Hu, chi joʼkan tqanaw kʼaru naraj li Jehobʼa naq tqabʼaanu. Joʼkan naq saʼ li tzolom aʼin tqatzʼil rix wiibʼ oxibʼ li naʼlebʼ li tooxtenqʼa re naq inkʼaʼ tqakanabʼ rilbʼal li Santil Hu rajlal kutan. Tqil ajwiʼ kʼaru tooxtenqʼa re xkʼoxlankil rix li naqayaabʼasi ut chanru tooruuq xyuʼaminkil li naqatzol.

KʼE AAHOONAL RE XYAABʼASINKIL LI RAATIN LI YOS

5. Kʼaru ebʼ li kʼanjel naru naxbʼaanu naq laatzʼaq qu?

⁵ Joʼ ak kʼanjel chiru li Jehobʼa junelik laatzʼ qu. Naqakʼe qahoonal re xbʼaanunkil wiibʼ oxibʼ li naʼlebʼ li naxye li Santil Hu naq wank xwankil. Jun eetalil, nokookʼanjelak re xwenteninkil li qajunkabʼal ut re xwenteninkil qibʼ (1 Tim. 5:8). Naabʼalebʼ li hermaan nekeʼril li xkomon li yajebʼ malaj li cheekebʼ chik. Ut chiqajunilo tento tqakʼe qahoonal re xkawresinkil li qajunxaqalil. Joʼkan ajwiʼ wank qakʼanjel saʼ li chʼuut, jun rehebʼ aʼan okenk saʼ li puktesink. Saʼ xkʼabʼaʼ naq wank naabʼal li kʼanjel li tento xbʼaanunkil maare taakʼoxla: «Kʼaru naru tinbʼaanu re xyaabʼasinkil rajlal li Santil Hu, xnaʼlebʼankil rix ut xyuʼaminkil li nintzol?».

6. Kʼaru naru taabʼaanu re naq inkʼaʼ taakanabʼ xyaabʼasinkil li Santil Hu? (Chaawil li jalam u).

⁶ Joʼ aj paabʼanel xyaabʼasinkil li Santil Hu aʼan jun rehebʼ li naʼlebʼ li «qʼaxal wank xwankil», joʼkan naq tento tqabʼaanu (Filip. 1:10). Li xtiklajik li hu Salmos naxye naq sa xchʼool li winq li naxtaw xsahil xchʼool rikʼin xchaqʼrabʼ li Jehobʼa, naxnaʼlebʼa rix li raatin ut naxkʼe xchʼool chi xtzolbʼal chi qʼeq ut chi kutan (Sal. 1:​1, 2). Chʼolchʼo naq tento tqakʼe qahoonal re xyaabʼasinkil li Santil Hu. Abʼanan, bʼar wank li hoonal li jwal chaabʼil re xyaabʼasinkil li Santil Hu? Aʼ yaal li traj li junjunq. Li wank xwankil aʼan naq tqasikʼ jun li hoonal li tooxtenqʼa re naq inkʼaʼ tqakanabʼ xbʼaanunkil aʼin. Laj Víctor jun li hermaan naxye: «Nawulak chiwu xyaabʼasinkil li Santil Hu chiru li eqʼla. Moko nawulak ta chiwu wakliik eqʼla abʼan ninkʼe reetal naq aʼin li hoonal bʼarwiʼ inkʼaʼ naxik inchʼool chirix jalan chik li naʼlebʼ». Ma nakaakʼul laaʼat joʼ naxkʼul laj Víctor? Kʼoxla aʼin: «Choʼq we, bʼar wank li hoonal li qʼaxal chaabʼil re xyaabʼasinkil li Santil Hu?».

KʼOXLA LI YOOKAT XYAABʼASINKIL

7, 8. Chʼolobʼ rikʼin jun eetalil kʼaru inkʼaʼ tqabʼaanu naq tqayaabʼasi li Santil Hu.

⁷ Usta ak xqaxaqabʼ li hoonal bʼarwiʼ tqayaabʼasi li Santil Hu weent tqabʼaanu rikʼin jun chik li naʼlebʼ. Ma xaakʼul jun sutaq naq xaayaabʼasi junaq li naʼlebʼ ut moqon inkʼaʼ chik nakaajultika li xaayaabʼasi? Aʼin naru tqakʼul naq tqayaabʼasi li Santil Hu. Maare ak xqakʼubʼ jarubʼ li tasal re li Santil Hu naqaj xyaabʼasinkil rajlal kutan. Chaabʼil naq naqaj xbʼaanunkil aʼin ut naq naqakʼe qachʼool chi xbʼaanunkil li xqakʼubʼ (1 Cor. 9:26). Abʼan re xtawbʼal rusilal li Santil Hu, wank kʼaru chik tento tqabʼaanu.

⁸ Qakʼoxlaq li eetalil aʼin. Li habʼ nakʼanjelak re naq tkʼiiq li awimq. Abʼan wi chiru jun kutan ttʼaneʼq naabʼal li habʼ, li chʼochʼ inkʼaʼ truuq xtzʼubʼal chixjunil. Wi joʼkan raj tkʼulmanq, li haʼ maakʼaʼ t-oq wiʼ. Abʼan wi li haʼ natʼaneʼk chi kachʼinqil, li chʼochʼ truuq xtzʼubʼal li haʼ ut li awimq truuq chi kʼiik. Joʼkan ajwiʼ nakʼulmank naq naqayaabʼasi li Santil Hu, wi naqabʼaanu saʼ junpaat moko tkanaaq ta saʼ qachʼool li yooko xyaabʼasinkil ut moqon inkʼaʼ tqajultika chi moko tqayuʼami (Sant. 1:24).

9. Kʼaru tqabʼaanu wi kʼaynaqo rilbʼal li Santil Hu saʼ junpaat?

⁹ Kʼaru taabʼaanu wi yookat xyaabʼasinkil li Santil Hu ut nakaakʼe reetal naq saʼ junpaat yookat xbʼaanunkil? Naru taayaabʼasi chi kachʼinqil re naq wanq aahoonal re xnaʼlebʼankil rix li yookat xyaabʼasinkil. Wi nakaakʼoxla naq chʼaʼaj xbʼaanunkil aʼin, matxuwak. Naʼlebʼak naraj xyeebʼal xkʼoxlankil li yookat xyaabʼasinkil. Naru 1) taakʼe xkomon aahoonal re tzolok re naq wanq aahoonal re xnaʼlebʼankil rix malaj 2) moko naabʼal ta li raqal re li Santil Hu taayaabʼasi re naq twanq aahoonal re xnaʼlebʼankil rix li xaayaabʼasi. Laj Víctor, li xooʼaatinak wiʼ saʼ li raqal waqibʼ, naxye: «Moko naabʼal ta li raqal li ninyaabʼasi, maare jun tasal ajwiʼ. Saʼ xkʼabʼaʼ naq ninyaabʼasi eqʼla, wank chixjunil li kutan re naq tinnaʼlebʼa rix li xinyaabʼasi». Li wank xwankil moko aʼan ta jarubʼ li tasal li xqayaabʼasi aʼan bʼan naq tqabʼaanu saʼ xyaalal re naq tooruuq xtawbʼal rusilal li yooko xyaabʼasinkil (Sal. 119:97; chaawil li kaaxukuut «Ebʼ li patzʼom li tatxtenqʼa re naʼlebʼak»).

10. Chʼolobʼ rikʼin jun eetalil chanru tatruuq xyuʼaminkil li nakaatzol saʼ li Santil Hu (1 Tesalonicenses 5:​17, 18).

¹⁰ Maakʼaʼ naxye saʼ kʼaru hoonal malaj joʼkʼihal li hoonal nakaakʼe re xtzolbʼal li Santil Hu, tento taakʼe aachʼool chi xyuʼaminkil li nakaatzol. Naq yooqat xyaabʼasinkil jun raqal re li Santil Hu, kʼoxla aʼin: «Kʼaru naru tinbʼaanu re xyuʼaminkil li xintzol saʼ li kutan aʼin malaj saʼ li kutan chalk re?». Jun eetalil, kʼoxla naq xaayaabʼasi 1 Tesalonicenses 5:​17, 18 (yaabʼasi). Moqon, kʼe bʼayaq aahoonal ut kʼoxla chanru nakattijok. Ma nakattijok chi anchal aachʼool? Ma rajlal nakattijok? Bʼar wank ebʼ li naʼlebʼ li nakaabʼanyoxi re li Jehobʼa? Maare tchalq saʼ aachʼool oxibʼ li naʼlebʼ li nakaabʼanyoxi re li Jehobʼa. Wi nakaakʼe bʼayaq aahoonal re xnaʼlebʼankil rix li Raatin li Yos moko kaʼaj tawiʼ yookat rabʼinkil li naxye li Raatin li Yos, timil timil bʼan tat-oq xyuʼaminkil. Ut wi rajlal naq nakaayaabʼasi li Santil Hu nakaabʼaanu aʼin, saʼ xnumikebʼ li kutan taakʼe reetal naq yookat xchaabʼilobʼresinkil laanaʼlebʼ joʼ aj kʼanjel chiru li Jehobʼa. Abʼanan, kʼaru naru taabʼaanu wi nakaakʼe reetal naq wank naabʼal li naʼlebʼ li tento taajal saʼ laayuʼam?

KʼUBʼ LI NAʼLEBʼ LI TATRUUQ XBʼAANUNKIL

11. Kʼaʼut wank sut naru tchʼinaaq aachʼool naq nakaayaabʼasi li Santil Hu? Kʼe jun eetalil.

¹¹ Naq nakaayaabʼasi li Santil Hu, wank sut maare nachʼinaak aachʼool xbʼaan naq nakaakʼe reetal naq wank naabʼal li naʼlebʼ li tento taajal. Qakʼoxlaq aʼin: Saʼ li kutan lunes nakaayaabʼasi ebʼ li raqal li naxye naq moko usta naq toosikʼoq u (Sant. 2:​1-8). Joʼkan naq nakaakʼubʼ chanru taawilebʼ li junchʼol. Jwal chaabʼil aʼin! Saʼ li kutan martes, nakaayaabʼasi jun li raqal bʼarwiʼ naxye naq weent taabʼaanu rikʼin li nakaaye (Sant. 3:​1-12). Nakaakʼe reetal naq wank sut nakaaye ebʼ li aatin li naxtochʼ xchʼool ebʼ li junchʼol, joʼkan naq nakaakʼubʼ naq taachaabʼilobʼresi aʼin ut taaye li aatin li nawaklesink chʼoolej. Saʼ li kutan miércoles nakaayaabʼasi li raqal bʼarwiʼ naxye naq inkʼaʼ tqakʼam qe rikʼin li ruuchichʼochʼ aʼin (Sant. 4:​4-12). Nakaakʼe reetal naq weent taabʼaanu rikʼin li pelikula li nakaawil ut li bʼich li nakaawabʼi. Joʼkan naq saʼ li kutan jueves nachʼinaak aachʼool xbʼaan naq nakaakʼe reetal naq wank naabʼal li naʼlebʼ li tento taajal.

12. Kʼaʼut inkʼaʼ tchʼinaaq aachʼool wi nakaakʼe reetal naq wank ebʼ li naʼlebʼ li tento taajal? (Chaawil ajwiʼ li xyaalal).

¹² Michʼinaak aachʼool wi nakaakʼe reetal naq wank ebʼ li naʼlebʼ li tento taajal. Chaabʼil aʼin xbʼaan naq nakaakʼutbʼesi naq nakaakubʼsi aawibʼ ut naq chaabʼil aanaʼlebʼ.a Jultika naq xtiqibʼankil aawibʼ «rikʼin li akʼ yuʼam» aʼan jun li naʼlebʼ li rajlal taabʼaanu (Col. 3:10). Kʼaru tatxtenqʼa re naq junelik taayuʼami li naxye li Raatin li Yos?

13. Kʼaru naru tatxtenqʼa re xyuʼaminkil li xaatzol? (Chaawil ebʼ li jalam u).

¹³ Jun li naʼlebʼ li tatxtenqʼa aʼan xyuʼaminkil jun malaj wiibʼ li naʼlebʼ li xaatzol naq xaayaabʼasi li Santil Hu (Prov. 11:2). Yal xbʼaanunkil aʼin: tzʼiibʼa junjunq li naʼlebʼ li tento taachaabʼilobʼresi saʼ laayuʼam, xbʼeenwa kʼe aachʼool chirix jun malaj wiibʼ li naʼlebʼ li xaatzʼiibʼa ut moqon naru taakʼe aachʼool chi xbʼaanunkil ebʼ li junchʼol chik chi naʼlebʼ. Chanru taatikibʼ xbʼaanunkil?

14. Chirix kʼaru naru taakʼe aachʼool?

¹⁴ Xbʼeenwa naru taakʼe aachʼool chi xbʼaanunkil junaq li naʼlebʼ li moko jwal chʼaʼaj ta choʼq aawe malaj li naʼlebʼ li aajel ru naq taachaabʼilobʼresi. Naq ak chʼolchʼo chaawu bʼar wank ebʼ li naʼlebʼ aʼin, naru taasikʼ aanaʼlebʼ saʼ li naʼaj RE TATRUUQ CHI TZOLOK Watchtower malaj Li hu li natenqʼank rehebʼ laj testiiw re li Jehobʼa. Tzʼaama re li Jehobʼa li xtenqʼ re naq tixbʼaanu naq t-alaaq saʼ aachʼool joʼ ajwiʼ tixkʼe aametzʼew re naq tatruuq xbʼaanunkil li nawulak chiru (Filip. 2:13). Moqon kʼe aachʼool chi xyuʼaminkil li xaatzol. Naq taakʼe reetal naq us yookat chi elk, chʼolchʼo naq aʼin t-ekʼasinq aawe re naq taachaabʼilobʼresi jalan chik li naʼlebʼ. Ut chʼolchʼo ajwiʼ naq li naʼlebʼ li ak xaachaabʼilobʼresi, tatxtenqʼa re xyuʼaminkil li junjunq chi naʼlebʼ li xaatzʼiibʼa.

KANABʼ NAQ LI RAATIN LI YOS TATXTENQʼA

15. Kʼaʼut naq moko juntaqʼeetebʼ ta ebʼ laj kʼanjel chiru li Jehobʼa rikʼinebʼ li kristiʼaan li yal nekeʼxyaabʼasi li Santil Hu? (1 Tesalonicenses 2:13).

¹⁵ Wankebʼ li kristiʼaan li nekeʼxye naq ak naabʼal sut xeʼxyaabʼasi li Santil Hu. Abʼan, ma nekeʼxpaabʼ li naxye ut nekeʼxkanabʼ naq li xeʼxtzol tixjal li xyuʼamebʼ? Ra xyeebʼal, abʼan naabʼal sut moko nakʼulmank ta aʼin. Abʼanan joʼ aj kʼanjel chiru li Jehobʼa moko joʼkan ta nokoonaʼlebʼak. Joʼebʼ laj paabʼanel li xeʼwank saʼ xkutankilebʼ li apóstol, naqakʼulubʼa li Santil Hu «joʼ raatin li Yos». Joʼkan naq naqakʼe qachʼool chi xkʼutbʼesinkil naq naqakanabʼ naq tooxtenqʼa saʼ li qayuʼam (yaabʼasi 1 Tesalonicenses 2:13).

16. Kʼaru tooxtenqʼa chi xyuʼaminkil li naxye li Raatin li Yos?

¹⁶ Wank sut nachʼaʼajkoʼk bʼayaq xyaabʼasinkil ut xyuʼaminkil li naxye li Raatin li Yos. Maare wank sut maakʼaʼ qahoonal re xyaabʼasinkil malaj naqayaabʼasi saʼ junpaat ut moqon chik inkʼaʼ naqajultika li xqatzol. Malaj nachʼinaak qachʼool saʼ xkʼabʼaʼ chixjunil li tento tqajal saʼ li qayuʼam. Aʼ yaal bʼar wank li nachʼaʼajkoʼk chaawu, li Jehobʼa naru tatxtenqʼa. Kʼulubʼa li xtenqʼ, maakʼoxla naq tzʼaqal rikʼin rabʼinkil li Raatin li Yos ut naq inkʼaʼ tsachq saʼ aachʼool. Kʼe bʼan aachʼool chi xyuʼaminkil li nakaatzol. Chʼolchʼo naq xyaabʼasinkil li Santil Hu ut xyuʼaminkil li xaatzol, tixkʼe xsahil aachʼool (Sant. 1:25).