NAʼLEBʼ RE TZOLOK 42
BʼICH 103 Ebʼ laj kʼaakʼalehom qe aʼanebʼ qamaatan
Naqabʼanyoxi naq wankebʼ winq «joʼ maatan»
«Naq aʼan xkoho taqeʼq [ . . . ] kixkʼehebʼ li winq aʼin joʼ maatan» (EFES. 4:8).
RUʼUJIL LI TZOLOM
Kʼaru nekeʼxbʼaanu chiqix ebʼ laj tenqʼanel saʼ li chʼuut, ebʼ li cheekel winq ut ebʼ li cheekel winq li nekeʼulaʼanink chʼuut ut chanru tooruuq xkʼutbʼesinkil naq naqabʼanyoxi li kʼanjel li nekeʼxbʼaanu.
1. Bʼar wank wiibʼ oxibʼ rehebʼ li maatan li naxkʼe qe li Jesús?
MAAJUN li winq kixtenqʼa ebʼ li junchʼol joʼ kixbʼaanu li Jesús. Jun eetalil, naq li Jesús kiwank saʼ Ruuchichʼochʼ kiroksi li xwankil re xbʼaanunkil ebʼ li sachbʼachʼoolej ut re xtenqʼankilebʼ li kristiʼaan (Luc. 9:12-17). Ut kixkʼe qe jun li nimla maatan naq kixqʼaxtesi li xyuʼam saʼ qakʼabʼaʼ (Juan 15:13). Chalen naq kiwakliik chi yoʼyo, li Jesús inkʼaʼ xkanabʼ qatenqʼankil. Joʼ kixyeechiʼi qe kixpatzʼ re li Jehobʼa naq tixkʼe qe li xsantil musiqʼej re qatzolbʼal ut xkʼojobʼankil qachʼool (Juan 14:16, 17; 16:13). Rikʼinebʼ li chʼutam li Jesús nokooxkawresi re xtzolbʼalebʼ li kristiʼaan rikʼin li Santil Hu (Mat. 28:18-20).
2. Anihebʼ wiibʼ oxibʼ rehebʼ li winq li wankebʼ «joʼ maatan»? (Efesios 4:7, 8).
2 Abʼan moko kaʼaj tawiʼ aʼin naxkʼe qe li Jesús joʼ maatan. Joʼ kixtzʼiibʼa li apóstol Pablo, naq li Jesús xkoho saʼ choxa «kixkʼehebʼ li winq [ . . . ] joʼ maatan» (yaabʼasi Efesios 4:7, 8). Laj Pablo kixchʼolobʼ naq li Jesús kixkʼehebʼ re naq teʼtenqʼanq saʼ li chʼuut (Efes. 1:22, 23; 4:11-13). Saʼ li qakutan wiibʼ oxibʼ rehebʼ li «maatan» aʼin, aʼanebʼ laj tenqʼanel saʼ li chʼuut, ebʼ li cheekel winq ut ebʼ li cheekel winq li nekeʼulaʼanink chʼuut.a Ebʼ li winq aʼin moko tzʼaqalebʼ ta re ru li xyuʼam ut nekeʼpaltoʼk (Sant. 3:2). Abʼan jwal oxloqʼ chiqu li maatan li kixkʼe li Jesús re qatenqʼankil.
3. Chʼolobʼ rikʼin jun eetalil kʼaru tooruuq xbʼaanunkil re xtenqʼankilebʼ li winq li kixkʼe li Jesús joʼ maatan.
3 Li Jesús kixkʼehebʼ li winq aʼin «joʼ maatan» re xkawresinkil ebʼ li chʼuut (Efes. 4:12). Abʼan tooruuq xtenqʼankilebʼ re naq inkʼaʼ teʼchʼaʼajkoʼq chiru xbʼaanunkil li xkʼanjel. Re xtawbʼal ru, qakʼoxlaq jun chʼuut li hermaan li yookebʼ xkabʼlankil jun li Chʼutlebʼaal Kabʼl. Wankebʼ li hermaan li yookebʼ chi kabʼlak ut junchʼol chik nekeʼxkʼam li tzekemq malaj nekeʼxbʼaanu jalan chik li kʼanjel. Joʼkan ajwiʼ, ebʼ laj tenqʼanel saʼ li chʼuut, ebʼ li cheekel winq ut ebʼ li cheekel winq li nekeʼulaʼanink chʼuut nekeʼxbʼaanu jalan jalanq li kʼanjel ut chiqajunilo naru naqatenqʼahebʼ rikʼin li naqaye ut li naqabʼaanu. Qatzʼilaq rix kʼaru rusilal naqataw saʼ xkʼabʼaʼ li kʼanjel li nekeʼxbʼaanu ebʼ li winq aʼin ut qilaq kʼaru tooruuq xbʼaanunkil re xkʼutbʼesinkil chiru li Jesús ut chiruhebʼ li hermaan aʼin naq naqabʼanyoxi naq wankebʼ joʼ maatan.
EBʼ LAJ TENQʼANEL SAʼ LI CHʼUUT «NEKEʼXTENQʼA EBʼ LI JUNCHʼOL»
4. Kʼaru ebʼ li kʼanjel xeʼxbʼaanu laj tenqʼanel saʼ li chʼuut saʼ xkutankilebʼ li apóstol?
4 Saʼ xkutankilebʼ li apóstol, kixaqabʼamank wiibʼ oxibʼ li hermaan joʼ aj tenqʼanel saʼ li chʼuut (1 Tim. 3:8). Chanchan tawiʼ naq aʼanebʼ li «nekeʼxtenqʼa ebʼ li junchʼol» li kiʼaatinak wiʼ laj Pablo saʼ 1 Corintios 12:28. Joʼkan naq ebʼ laj tenqʼanel saʼ li chʼuut nekeʼxbʼaanu jalan jalanq li kʼanjel re naq ebʼ li cheek winq teʼruuq xkʼebʼal xchʼool chi xtzolbʼal ut rilbʼal ebʼ li hermaan. Jun eetalil, maare ebʼ laj tenqʼanel saʼ li chʼuut xeʼtenqʼank re risinkil chi huhil li reetalil li Santil Hu malaj xeʼxloqʼ li naʼajmank re risinkil li reetalil.
5. Kʼaru ebʼ li kʼanjel nekeʼxbʼaanu laj tenqʼanel saʼ li chʼuut saʼ li qakutan?
5 Kʼaru ebʼ li kʼanjel nekeʼxbʼaanu laj tenqʼanel saʼ li chʼuut saʼ li qakutan? (1 Ped. 4:10). Maare nekeʼrajla li tumin re li chʼuut, nekeʼril ebʼ li teep, nekeʼxchʼeʼ ebʼ li kʼanjelobʼaal re bʼideo, nekeʼxbʼaanu wiibʼ oxibʼ li kʼanjel li naʼajmank saʼ li Chʼutlebʼaal Kabʼl malaj nekeʼxpatzʼ ebʼ li tasal hu ut nekeʼxkʼe rehebʼ li hermaan. Chixjunil aʼin naʼajmank re naq us tkʼanjelaq li chʼuut (1 Cor. 14:40). Nakʼemank ajwiʼ rehebʼ li kʼanjel saʼ li chʼutam Qayuʼam ut Qakʼanjel ut ebʼ li seeraqʼ. Maare naxaqabʼamank ebʼ laj tenqʼanel saʼ li chʼuut re naq tixtenqʼa junaq li cheekel winq li naril jun li chʼuut ut maare jun li cheekel winq truuq xpatzʼbʼal re jun aj tenqʼanel saʼ li chʼuut naq taaxik chirix re rulaʼaninkilebʼ li hermaan.
6. Kʼaʼut jwal naqabʼanyoxi li kʼanjel li nekeʼxbʼaanu laj tenqʼanel saʼ li chʼuut?
6 Kʼaʼut jwal naqabʼanyoxi li kʼanjel li nekeʼxbʼaanu ebʼ laj tenqʼanel saʼ li chʼuut? Qilaq li nekeʼxye wiibʼ oxibʼ li hermaan. Li xBeberlyb jun li hermaan re Bolivia, naxye: «Kʼajoʼ ninyal xsahil li chʼutam saʼ xkʼabʼaʼ li kʼanjel li nekeʼxbʼaanu ebʼ laj tenqʼanel saʼ li chʼuut. Xbʼaan li nekeʼxbʼaanu ninruuk bʼichank, sumenk, nawabʼi ebʼ li seeraqʼ ut nintzol chirix li bʼideo ut li jalam u. Aʼanebʼ nekeʼxkʼe xchʼool re naq sa tqekʼa qibʼ saʼ li Chʼutlebʼaal Kabʼl ut re naq ebʼ li hermaan teʼruuq rabʼinkil li chʼutam saʼ videoconferencia. Naq naraqeʼk li chʼutam nekeʼtenqʼank saʼ li saabʼesink ut chi rajlankil li tumin ut nekeʼxkʼe xchʼool re naq maajunwa tpaltoʼq li tasal hu li naʼajmank chiqu. Kʼajoʼ ninbʼanyoxi li xkʼanjelebʼ!». Li xLeslie li wank Colombia ut wank joʼ rixaqil jun li cheekel winq, naxye: «Ebʼ laj tenqʼanel saʼ li chʼuut kʼajoʼ nekeʼxtenqʼa linbʼeelom. Saʼ xkʼabʼaʼ naq nekeʼxbʼaanu naabʼal li kʼanjel moko naabʼal ta chik li kʼanjel naxbʼaanu linbʼeelom. Joʼkan naq ninbʼanyoxi rehebʼ naq junelik wankebʼ aran re tenqʼank». Chʼolchʼo naq chiqajunilo naqabʼanyoxi li kʼanjel li nekeʼxbʼaanu (1 Tim. 3:13).
7. Chanru tqakʼutbʼesi naq oxloqʼ chiqu li kʼanjel li nekeʼxbʼaanu laj tenqʼanel saʼ li chʼuut? (Chaawil li jalam u).
7 Usta naqabʼanyoxi li kʼanjel li nekeʼxbʼaanu ebʼ laj tenqʼanel saʼ li chʼuut, li Santil Hu naxye naq tento tqakʼutbʼesi rehebʼ naq oxloqʼ chiqu li nekeʼxbʼaanu (Col. 3:15). Qilaq chanru laj Daavid jun li cheekel winq li wank Finlandia naxbʼaanu aʼin: «Wi jun laj tenqʼanel saʼ li chʼuut kixbʼaanu jun li naʼlebʼ li kixwaklesi inchʼool malaj jalan chik li naʼlebʼ li oxloqʼ chiwu nintzʼiibʼa re jun li esilhu malaj nintaqla jun xmensaaj rikʼin jun raqal re li Santil Hu ut ninye re chi chʼolchʼo ru kʼaʼut oxloqʼ chiwu li kixbʼaanu». Laj Pascal ut li xJael, li wankebʼ Nueva Caledonia, nekeʼtijok chirixebʼ laj tenqʼanel saʼ li chʼuut, aʼanebʼ nekeʼxye: «Naqabʼanyoxi re li Jehobʼa chixjunil li nekeʼxbʼaanu ebʼ laj tenqʼanel saʼ li chʼuut ut naqapatzʼ re naq junelik tixtenqʼahebʼ ut twanq rikʼinebʼ». Li Jehobʼa narabʼi ebʼ li tij aʼin ut chʼolchʼo naq chixjunil li chʼuut naxtaw rusilal (2 Cor. 1:11).
KAW NEKEʼKʼANJELAK EBʼ LI CHEEKEL WINQ
8. Kʼaʼut laj Pablo kiruuk xyeebʼal naq kaw nekeʼkʼanjelak li cheekel winq saʼ xkutankilebʼ li apóstol? (1 Tesalonicenses 5:12, 13).
8 Saʼ xkutankilebʼ li apóstol, ebʼ li cheekel winq jwal kaw nekeʼkʼanjelak (yaabʼasi 1 Tesalonicenses 5:12, 13; 1 Tim. 5:17). Aʼanebʼ nekeʼkʼamok bʼe sa li chʼuut joʼkan naq nekeʼxbʼeresi li chʼutam ut nekeʼxsikʼ kʼaru tbʼaanumanq. Joʼkan ajwiʼ, chi chʼolchʼo ru nekeʼxkʼe xnaʼlebʼ li hermaan abʼan junelik nekeʼxbʼaanu rikʼin rahok re naq kaw teʼwanq saʼ li xpaabʼal (1 Tes. 2:11, 12; 2 Tim. 4:2). Ut aʼanebʼ ajwiʼ nekeʼxkʼe xchʼool re naq kaw teʼwanq saʼ li xpaabʼal ut teʼxchʼolani chiʼus li xjunkabʼal (1 Tim. 3:2, 4; Tito 1:6-9).
9. Kʼaru ebʼ li kʼanjel nekeʼxbʼaanu li cheekel winq saʼ li qakutan?
9 Saʼ li qakutan, ebʼ li cheekel winq jwal laatzʼ ruhebʼ. Aʼanebʼ nekeʼxpuktesi li chaabʼil esil (2 Tim. 4:5). Nekeʼxkʼe jun chaabʼil eetalil, nekeʼxkʼubʼ chanru twanq li puktesink ut chanru tooruuq xbʼaanunkil li kʼanjel aʼin. Joʼkan ajwiʼ, nekeʼraqok aatin saʼ tiikilal ut nekeʼuxtaanank u. Naq junaq naxbʼaanu jun li nimla maak, nekeʼxkʼe xchʼool chi xtenqʼankil re naq twanq wiʼ chik joʼ ramiiw li Jehobʼa. Abʼan nekeʼxkʼe xchʼool ajwiʼ re naq saqaq ru li chʼuut (1 Cor. 5:12, 13; Gál. 6:1). Li naʼlebʼ li jwal wank xwankil li nekeʼxbʼaanu ebʼ li cheekel winq aʼan wank joʼ aj kʼaakʼalenel re li chʼuut (1 Ped. 5:1-3). Nekeʼxkʼe ebʼ li seeraqʼ li kʼubʼanbʼil chiʼus, nekeʼxkʼe xchʼool re xnawbʼal ruhebʼ li hermaan ut nekeʼrulaʼanihebʼ saʼ rochoch re xwaklesinkil xchʼoolebʼ. Joʼkan ajwiʼ, wankebʼ li cheekel winq li nekeʼtenqʼank saʼ li kabʼlak, re rilbʼal li naʼajmank saʼ li Chʼutlebʼaal Kabʼl, nekeʼxkʼubʼ ebʼ li nimla chʼutam, wankebʼ saʼ li chʼuut li naʼulaʼanink bʼanlebʼaal ut wankebʼ saʼ xyanq ebʼ li cheekel winq li nekeʼrulaʼani ebʼ li yaj. Chʼolchʼo naq naabʼal li kʼanjel nekeʼxbʼaanu ebʼ li cheekel winq.
10. Bʼar wank wiibʼ oxibʼ xyaalal naq naqarahebʼ li cheekel winq?
10 Li Jehobʼa kixye naq ebʼ li cheekel winq teʼxkʼaakʼale chiʼus ebʼ li hermaan ut kixye ajwiʼ: «Maakʼaʼ teʼxxiwa» (Jer. 23:4). Aʼan tzʼaqal li kirekʼa li xJohanna jun li hermaan re Finlandia naq kiyajerk li xnaʼ. Aʼan naxye: «Nachʼaʼajkoʼk chiwu xyeebʼal rehebʼ li junchʼol li nawekʼa. Abʼan jun li cheekel winq li inkʼaʼ ninnaw ru chiʼus, kixkʼe xchʼool chi wabʼinkil, kitijok wikʼin ut kixye we naq li Jehobʼa kʼajoʼ naq nikinxra. Moko ninjultika ta li kixye we abʼan sa chik xwekʼa wibʼ. Chʼolchʼo chiwu naq li Jehobʼa kixtaqla li cheekel winq aʼin re xwaklesinkil inchʼool naq jwal naʼajmank chiwu». Ut laaʼat, chanru xattenqʼaak xbʼaanebʼ li cheekel winq saʼ laachʼuut?
11. Chanru tooruuq xkʼutbʼesinkil rehebʼ li cheekel winq naq naqabʼanyoxi li kʼanjel li nekeʼxbʼaanu? (Chaawil li jalam u).
11 Li Jehobʼa naraj naq tqakʼutbʼesi li qarahom rehebʼ li cheekel winq «xbʼaan li kʼanjel li nekeʼxbʼaanu» (1 Tes. 5:12, 13). Li xHenrietta, li wank Finlandia, naxye: «Ebʼ li cheekel winq nekeʼxtenqʼa ebʼ li junchʼol chi sahebʼ saʼ xchʼool abʼan aʼin moko naraj ta xyeebʼal naq moko laatzʼ ta ruhebʼ malaj naq moko wank ta xchʼaʼajkilalebʼ. Joʼkan naq, wank sut ninjilok chixkʼatq junaq ut ninye re: “Nawaj xyeebʼal aawe naq jwal chaabʼil nakaabʼaanu laakʼanjel joʼ cheekel winq”». Li xSera jun li hermaan re Turquía naxye: «Naʼajmank naq teʼwanq xmetzʼew ebʼ li cheekel winq re naq teʼxbʼaanu li xkʼanjel. Joʼkan naq wank sut nintzʼiibʼa ebʼ li esilhu, ninbʼoqebʼ chi waʼak malaj ninpuktesink rikʼinebʼ». Ma nachalk saʼ aachʼool junaq li cheekel winq li xbʼaanu junaq li naʼlebʼ chaawix? Naru taakʼutbʼesi chiru naq nakaabʼanyoxi li kixbʼaanu (1 Cor. 16:18).
Tatruuq xwaklesinkilebʼ xchʼool li hermaan li xaqabʼanbʼilebʼ saʼ li chʼuut. (Chaawil li raqal 7, 11 ut 15).
EBʼ LI CHEEKEL WINQ LI NEKEʼULAʼANINK CHʼUUT NEKEʼXKAWRESI EBʼ LI CHʼUUT
12. Kʼaru chik li maatan kixkʼe li Jesús rehebʼ li chʼuut re xkawresinkilebʼ xchʼool? (1 Tesalonicenses 2:7, 8).
12 Li Jesús kixkʼe chik jun maatan rehebʼ li chʼuut. Kirekʼasi xchʼoolebʼ li cheekel winq re Jerusalén re naq teʼxtaqla laj Pablo, laj Bernabé ut jalanebʼ chik li hermaan joʼ li cheekel winq li naʼulaʼanink chʼuut (Hech. 11:22). Kʼaʼut? Re naq teʼxkawresi ebʼ li chʼuut joʼ nekeʼxbʼaanu ebʼ li cheekel winq ut ebʼ laj tenqʼanel saʼ li chʼuut (Hech. 15:40, 41). Ebʼ li winq aʼin naabʼal xeʼxbʼaanu ut wank sut xeʼxkʼe saʼ xiwxiwal li xyuʼam re xtzolbʼal ut xwaklesinkil xchʼool ebʼ li hermaan (yaabʼasi 1 Tesalonicenses 2:7, 8).
13. Kʼaru ebʼ li kʼanjel nekeʼxbʼaanu li cheekel winq li nekeʼulaʼanink chʼuut?
13 Ebʼ li cheekel winq li nekeʼulaʼanink chʼuut junelik yookebʼ chi bʼihajik. Naq nekeʼraqeʼk rulaʼaninkil jun li chʼuut wankebʼ nekeʼbʼihajik chiru naabʼal hoor re wulak saʼ li jun chik chʼuut. Rajlal xamaan nekeʼxkʼe ebʼ li seeraqʼ, nekeʼrulaʼani ebʼ li hermaan, nekeʼxbʼeresi li chʼutam rikʼinebʼ laj kʼamolbʼe saʼ li puktesink, rikʼinebʼ li cheekel winq re li chʼuut ut li chʼutam re xik chi puktesink. Joʼkan ajwiʼ, nekeʼxkʼubʼ ebʼ li nimla chʼutam ut ebʼ li seeraqʼ li tkʼemanq aran. Nekeʼxkʼubʼ ajwiʼ ebʼ li tzolok choʼq rehebʼ laj kʼamolbʼe saʼ li puktesink ut li chʼutam li nawank jun sut chiru li chihabʼ rikʼinebʼ ut nekeʼril jalan chik li kʼanjel li jwal wank xwankil li nekeʼkʼeheʼk re xbʼaan li xmolam li Jehobʼa.
14. Kʼaʼut naqoxloqʼi li kʼanjel li nekeʼxbʼaanu li cheekel winq li nekeʼulaʼanink chʼuut?
14 Kʼaru rusilal nekeʼxtaw ebʼ li chʼuut saʼ xkʼabʼaʼ li nekeʼxbʼaanu ebʼ li cheekel winq li nekeʼulaʼanink chʼuut? Jun li hermaan re Turquía naxye: «Naq nokooʼeʼrulaʼani junelik nekeʼxwaklesi inchʼool re naq tinwanq rikʼinebʼ li hermaan ut re naq tintenqʼahebʼ. Xinnaw ru naabʼal ebʼ li cheekel winq li nekeʼulaʼanink chʼuut abʼan maajun rehebʼ kixye we naq laatzʼ ru ut naq inkʼaʼ naraj aatinak wikʼin». Li xJohanna, li xooʼaatinak wiʼ saʼ li raqal lajeebʼ, kiʼelk chi puktesink rikʼin jun li cheekel winq li naʼulaʼanink chʼuut abʼan maaʼani xeʼxtaw saʼ rochoch. Aʼan naxye: «Usta joʼkan, maajunwa tsachq saʼ inchʼool li kutan aʼan. Wiibʼ linchaqʼ tojeʼ xeʼqʼaxonk saʼ jalan chik naʼaj ut jwal ra inchʼool xbʼaan aʼin. Abʼan li cheekel winq li naʼulaʼanink chʼuut kixwaklesi inchʼool ut xinxtenqʼa chi rilbʼal naq moko junelik ta toowanq chi joʼkan xbʼaan naq saʼ li akʼ ruuchichʼochʼ twanq naabʼal qahoonal re wank saʼ junajil». Chʼolchʼo naq ebʼ li cheekel winq li nekeʼulaʼanink chʼuut raarokebʼ xbʼaanebʼ li hermaan li nekeʼrulaʼani (Hech. 20:37–21:1).
15. a) Chanru tooruuq xkʼambʼal qe rikʼin li naxye 3 Juan 5-8 ut xkʼutbʼesinkil naq naqoxloqʼi li kʼanjel li nekeʼxbʼaanu li cheekel winq li nekeʼulaʼanink chʼuut? (Chaawil li jalam u). b) Kʼaʼut tento tqakʼe saʼ ajl li rixaqil ebʼ li hermaan li xaqabʼanbʼilebʼ saʼ li chʼuut ut chanru tooruuq xbʼaanunkil? (Chaawil li kaaxukuut «Qakʼehaq saʼ ajl li rixaqil ebʼ li hermaan»).
15 Li apóstol Juan kixwaklesi xchʼool laj Gayo re naq tixkʼulebʼ chiʼus ebʼ li hermaan li nekeʼrulaʼani li chʼuut ut kixye re: «Kʼe rehebʼ li tkʼanjelaq chiruhebʼ saʼebʼ li xbʼihaaj ut taabʼaanu joʼ chanru nawulak chiru li Yos» (yaabʼasi 3 Juan 5-8). Chanru tooruuq xkʼambʼal qe rikʼin li naʼlebʼ aʼin? Tooruuq xbʼoqbʼal li cheekel winq li naʼulaʼanink chʼuut re naq twaʼaq qikʼin ut tooruuq tzʼaqonk saʼ li puktesink re li xamaan aʼan. Qilaq li naxbʼaanu li xLeslie, li xooʼaatinak wiʼ saʼ li raqal waqibʼ, re xkʼutbʼesinkil naq naxbʼanyoxi li kʼanjel li naxbʼaanu. Aʼan naxye: «Nintzʼaama re li Jehobʼa naq junelik tixkʼe rehebʼ li naʼajmank chiruhebʼ. Linbʼeelom ut laaʼin naqatzʼiibʼa ebʼ li esilhu bʼar naqaye rehebʼ chanru nekeʼxwaklesi qachʼool naq nokooʼeʼrulaʼani». Misach saʼ qachʼool naq ebʼ li cheekel winq li nekeʼulaʼanink chʼuut nekeʼxnumsi ebʼ li chʼaʼajkilal ut nekeʼlubʼk joʼ laaʼo. Wank sut nekeʼyajerk, nekeʼchʼinaak xchʼool ut nekeʼnumtaak xkʼaʼuxl. Li Jehobʼa naru tatroksi re xsumenkil li xtijebʼ li hermaan aʼin wi tat-aatinaq saʼ tuulanil rikʼinebʼ malaj taakʼe rehebʼ jun li maatan (Prov. 12:25).
NAʼAJMANK EBʼ LI WINQ RE NAQ TEʼWANQ «JOʼ MAATAN»
16. Kʼaru tento teʼxkʼoxla ebʼ li hermaan winq? (Proverbios 3:27).
16 Saʼ chixjunil li ruuchichʼochʼ, naʼajmank ebʼ li winq li teʼwanq «joʼ maatan» saʼebʼ li chʼuut. Wi ak xkubʼeek aahaʼ, ma naru tattenqʼanq chi joʼkan? (yaabʼasi Proverbios 3:27). Ma yookat xkʼebʼal aaqʼe re wank joʼ aj tenqʼanel saʼ li chʼuut? Ut wi wankat chik joʼ aj tenqʼanel saʼ li chʼuut, ma ak xaakʼoxla wank joʼ cheekel winq?c Ma naru taajal wiibʼ oxibʼ li naʼlebʼ saʼ laayuʼam re naq tatruuq xik saʼ li Tzolok chirix li Xʼawabʼejilal li Yos? Saʼ xkʼabʼaʼ li tzolok aʼin, li Jesús naru tatroksi chiʼus. Wi nakaakʼoxla naq moko tatruuq ta xbʼaanunkil aʼin, aatinan rikʼin li Jehobʼa. Tzʼaama re naq tixkʼe aawe li xsantil musiqʼej re naq tatruuq xbʼaanunkil chiʼus yalaq kʼaru li kʼanjel li taakʼeheʼq aawe (Luc. 11:13; Hech. 20:28).
17. Kʼaru naxkʼutbʼesi li kʼanjel li nekeʼxbʼaanu ebʼ li winq li kixkʼe li Jesús joʼ maatan?
17 Li kʼanjel li nekeʼxbʼaanu ebʼ li winq li kixkʼe li Jesús «joʼ maatan» naxkʼutbʼesi naq aʼan yook xbʼeresinkil li qakʼanjel saʼ li qakutan (Mat. 28:20). Li Qaʼawabʼej kʼajoʼ nokooxra, nokooxtenqʼa, naxkʼe xchʼool chirix li naʼajmank chiqu ut naxkʼe qe ebʼ li hermaan li kʼajoʼ nokooʼeʼxtenqʼa. Peʼyaal naq kʼajoʼ naqabʼanyoxi ebʼ li maatan aʼin? Joʼkan naq qasikʼaq chanru xkʼutbʼesinkil naq oxloqʼ chiqu chixjunil aʼin. «Chixjunil li chaabʼil maatan ut chixjunil li maatan li tzʼaqal re ru nachalk taqeʼq» joʼkan naq misach saʼ qachʼool xbʼanyoxinkil re li Jehobʼa (Sant. 1:17).
BʼICH 109 Choorahoq chi anchal qachʼool
a Ebʼ li cheekel winq li wankebʼ saʼ xyanq li Nekeʼjolomink re Xmolam li Jehobʼa, li nekeʼtenqʼank rehebʼ li Nekeʼjolomink re Xmolam li Jehobʼa, li wankebʼ saʼ li chʼuut li naril li qakʼanjel ut jalanebʼ chik li cheekel winq li tenebʼanbʼil saʼ xbʼeenebʼ wiibʼ oxibʼ li kʼanjel, wankebʼ ajwiʼ joʼ maatan.
b Xjalmank wiibʼ oxibʼ li kʼabʼaʼej.
c Taataw xkomon li naʼlebʼ chirix chanru tatruuq wank joʼ aj tenqʼanel saʼ li chʼuut malaj joʼ cheekel winq saʼebʼ li tzolom «Ex hermaan winq, ma teeraj wank joʼ aj tenqʼanel saʼ li chʼuut?» ut «Ex hermaan winq, ma teeraj wank joʼ cheekel winq?» li wank saʼ li hu Laj Kʼaakʼalehom noviembre 2024.