Li taasikʼ xbʼaanunkil chi xsahobʼresihaq xchʼool li Jehobʼa

1. Kʼaru tento tqabʼaanu chiqajunilo ut kʼaʼut wank sut chʼaʼaj xbʼaanunkil?

RAJLAL kutan tento tqasikʼ kʼaru tqabʼaanu saʼ li qayuʼam. Wank ebʼ li naʼlebʼ li moko chʼaʼaj ta xsikʼbʼal joʼ rilbʼal kʼaru tqawaʼ eqʼla malaj joqʼe tooxik chi wark. Abʼan wank ebʼ li naʼlebʼ li chʼaʼaj xbʼaanunkil. Joʼ eetalil, kʼaru xbʼaanunkil rikʼin junaq li yajel, chanru li qajunkabʼal ut laaʼo tqataw li sahil chʼoolejil malaj chanru tqaloqʼoni ru li Yos. Naqaj naq li tqasikʼ xbʼaanunkil chaabʼil choʼq qe ut choʼq re li qajunkabʼal abʼan li qʼaxal naqaj aʼan naq tixsahobʼresi xchʼool li Jehobʼa (Rom. 12:​1, 2).

2. Kʼaru ebʼ li naʼlebʼ tatxtenqʼa re xsikʼbʼal chiʼus li taabʼaanu?

² Saʼ li tzolom aʼin, tqatzʼil rix oxibʼ li naʼlebʼ li tooxtenqʼa re naq chaabʼil li tqasikʼ xbʼaanunkil saʼ li qayuʼam: 1) xnawbʼal li naʼokenk chisaʼ li naʼlebʼ, 2) xkʼebʼal saʼ ajl li naxkʼoxla li Jehobʼa ut 3) xkʼoxlankil chiʼus li naʼlebʼ li tatruuq xbʼaanunkil. Tqil ajwiʼ kʼaru tooruuq xbʼaanunkil re xkʼaytesinkil qibʼ chi roksinkil chiʼus li qakʼaʼuxl (Prov. 2:11).

CHAANAW LI NAʼOKENK CHISAʼ LI NAʼLEBʼ

3. Chʼolobʼ rikʼin jun eetalil kʼaʼut aajel ru xnawbʼal chixjunil li naʼlebʼ naq toj maajiʼ nakaasikʼ kʼaru xbʼaanunkil.

³ Li taabʼaanu xbʼeenwa re xsikʼbʼal kʼaru xbʼaanunkil aʼan xnawbʼal chixjunil li naʼlebʼ li naʼokenk chisaʼ. Kʼaʼut wank xwankil? Kʼoxla aʼin, jun li kristiʼaan li ra wank naxik rikʼin jun laj bʼanonel abʼan laj bʼanonel moko tixkʼe ta li xbʼan yal chi joʼkan, xbʼeenwa naril malaj naxbʼaanu li patzʼom re xnawbʼal kʼaru wank re. Joʼkan ajwiʼ nakʼulmank naq nakaasikʼ kʼaru xbʼaanunkil, tento naq xbʼeenwa taatzʼil rix chixjunil li naʼlebʼ li naʼokenk chirix li nakaanumsi. Chanru tatruuq xbʼaanunkil?

4. Joʼ naxye Proverbios 18:​13, kʼaru taabʼaanu re xnawbʼal chixjunil li naʼlebʼ? (Chaawil ebʼ li jalam u).

⁴ Naru nakaanaw li yaal wi nakatpatzʼok. Qayeehaq naq xateʼxbʼoq saʼ jun li waʼak malaj ninqʼe. Wi taawaj xik ut inkʼaʼ nakaanaw ru chiʼus laj kʼulul ulaʼ malaj li tixbʼaanu, tento taapatzʼ re: «Bʼar ut joqʼe twanq? Joʼkʼihal li kristiʼaan teʼwulaq? Ani t-iloq re? Anihebʼ teʼwulaq? Kʼaru naʼlebʼ tbʼaanumanq? Ma teʼxkʼe li haʼ li nakaltesink?». Xnawbʼal li xsumenkil ebʼ li patzʼom aʼin tatxtenqʼa re naq us li taasikʼ xbʼaanunkil (yaabʼasi Proverbios 18:13).

5. Kʼaru tento taabʼaanu naq ak nakaanaw chixjunil li naʼlebʼ?

⁵ Moqon naq nakaanaw chixjunil li tbʼaanumanq, kʼoxla chiʼus chixjunil li naʼlebʼ. Jun eetalil, ut wi nakaanaw naq teʼwulaq li poyanam li inkʼaʼ nekeʼroxloqʼi li xchaqʼrabʼ li Jehobʼa malaj maaʼani t-iloq re joʼkʼihal li haʼ li nakaltesink tkʼemanq? Ma naru naq ebʼ li kristiʼaan teʼnaʼlebʼaq saʼ joʼmajoʼil? (1 Ped. 4:3). Malaj xik saʼ li ninqʼe aʼin tixbʼaanu naq inkʼaʼ tatxik saʼ li chʼutam malaj xik chi puktesink? Xnawbʼal chixjunil aʼin tixbʼaanu naq us li taasikʼ xbʼaanunkil. Abʼan toj wank li taabʼaanu. Chʼolchʼo chaawu li nakaakʼoxla chirix aʼin, abʼan kʼaru naxkʼoxla li Jehobʼa? (Prov. 2:6).

CHAAKʼE SAʼ AJL LI NAXKʼOXLA LI JEHOBʼA

6. Joʼ naxye Santiago 1:​5, kʼaʼut aajel ru xtzʼaamankil re li Jehobʼa naq tooxtenqʼa?

⁶ Tzʼaama re li Jehobʼa naq tatxtenqʼa re xtawbʼal ru li naxkʼoxla. Li Jehobʼa naxye naq tixkʼe li xchoxahil naʼlebʼ «chi yoʼon re chixjunilebʼ ut inkʼaʼ napoʼk rikʼinebʼ li nekeʼpatzʼok» (yaabʼasi Santiago 1:5). Li choxahil naʼlebʼ aʼin tooxtenqʼa re xtawbʼal ru wi li tqasikʼ xbʼaanunkil tixsahobʼresi xchʼool malaj inkʼaʼ.

7. Chanru taanaw li naxkʼoxla li Jehobʼa? Kʼe jun eetalil.

⁷ Naq ak xaapatzʼ aatenqʼ re li Jehobʼa, chaakʼe reetal li xsumenkil. Jun eetalil, wi nakatxik chi bʼeek ut nakatsach maare taapatzʼ aatenqʼ re junaq li wank saʼ li teep aʼan. Abʼan inkʼaʼ tatxik wi toj maajiʼ nakaawabʼi li tixye aawe, chʼolchʼo naq taakʼe aachʼool chi rabʼinkil li tixye aawe. Joʼkan ajwiʼ nakʼulmank naq nakaapatzʼ aachoxahil naʼlebʼ re li Jehobʼa, yal xtawbʼal li xsumenkil laatij saʼ li Santil Hu rikʼin li chaqʼrabʼ ut li naʼlebʼ li naxchap ribʼ rikʼin li yookat xnumsinkil. Qakʼoxlaq wiʼ chik chirix li ninqʼe li xooʼaatinak wiʼ. Naq taakʼoxla wi tatxik malaj inkʼaʼ tento taakʼe saʼ ajl li naxye li Santil Hu chirix li ninqʼe bʼarwiʼ ebʼ li kristiʼaan nekeʼxpoʼ qanaʼlebʼ, nekeʼnaʼlebʼak saʼ joʼmajoʼil ut li rusilal re xkʼebʼal xbʼeenwa li Xʼawabʼejilal li Yos chiru li naqaj (Mat. 6:33; Rom. 13:13; 1 Cor. 15:33).

8. Kʼaru taabʼaanu wi taawaj aatenqʼ re xtawbʼal li naʼlebʼ li yookat xsikʼbʼal? (Chaawil li jalam u).

⁸ Abʼanan, maare wank sut taawaj aatenqʼ re xtawbʼal li naʼlebʼ li yookat xsikʼbʼal. Naru taataw aanaʼlebʼ rikʼin jun li hermaan li kaw saʼ xpaabʼal. Abʼan us ajwiʼ naq aajunes taatzʼil rix li naʼlebʼ. Wank naabʼal li tenqʼ saʼ Li hu li natenqʼank rehebʼ laj testiiw re li Jehobʼa ut li tasal hu Li Raatin li Yos naxbʼeresi qayuʼam. Chiwanq saʼ aachʼool naq li taasikʼ xbʼaanunkil tento tixsahobʼresi xchʼool li Jehobʼa.

9. Chanru tqanaw naq li tqasikʼ xbʼaanunkil tixsahobʼresi xchʼool li Jehobʼa? (Efesios 5:17).

⁹ Chanru tqanaw naq li tqasikʼ xbʼaanunkil naxsahobʼresi xchʼool li Jehobʼa? Xbʼeenwa, aajel ru naq tqanaw ru chiʼus li Jehobʼa. Saʼ Proverbios 9:10 naxye naq «wi nakanaw ru Li nim xsantilal, aʼan reetalil naq seebʼ aakʼaʼuxl». Aʼin naraj xyeebʼal naq re xtawbʼal chiʼus li naʼlebʼ tento tqanaw li xnaʼlebʼ li Jehobʼa, li rajom, li nawulak chiru ut li xikʼ naril. Kʼoxla aʼin: «Rikʼin li ninnaw chirix li Jehobʼa, kʼaru naʼlebʼ tixsahobʼresi xchʼool?» (yaabʼasi Efesios 5:17).

10. Kʼaʼut jwal wank xwankil li naʼlebʼ li wank saʼ li Santil Hu chiru li naʼlebʼ li kʼaynaqebʼ xbʼaanunkil saʼ li qajunkabʼal malaj saʼ li qateep?

¹⁰ Re xsahobʼresinkil xchʼool li Jehobʼa wank sut tento tqabʼaanu junaq li naʼlebʼ li tixchʼina xchʼool li qajunkabʼal malaj ebʼ li qamiiw. Jun eetalil, maare junaq li naʼbʼej yuwaʼbʼej traj naq li rixqaʼal tsumlaaq rikʼin junaq li winq li wank xtumin, ak re naq naraj naq inkʼaʼ tixnumsi rahilal. Abʼan, ani ttenqʼanq re chi xkawresinkil li ramiiwil rikʼin li Yos? Kʼaru naxkʼoxla li Jehobʼa? Naqataw li xsumenkil saʼ Mateo 6:​33, bʼarwiʼ naxye naq ebʼ laj paabʼanel tento teʼxsikʼ «xbʼeenwa li Xʼawabʼejilal li Yos». Usta naqoxloqʼi li qanaʼ qayuwaʼ ut ebʼ li poyanam li wankebʼ saʼ li qateep, li jwal wank xwankil aʼan xsahobʼresinkil xchʼool li Jehobʼa.

KʼOXLA CHIʼUS LI NAʼLEBʼ LI TATRUUQ XBʼAANUNKIL

11. Joʼ naxye Filipenses 1:​9, 10, kʼaru naʼlebʼ tatxtenqʼa re xkʼoxlankil chiʼus li tatruuq xbʼaanunkil?

¹¹ Naq ak xaatzʼil rix li naʼlebʼ li naxye li Santil Hu chirix li taawaj xbʼaanunkil tento taakʼoxla chiʼus li naʼlebʼ li tatruuq xbʼaanunkil (yaabʼasi Filipenses 1:​9, 10). Chanru tatruuq xbʼaanunkil aʼin? Roksinkil chiʼus laakʼaʼuxl tatxtenqʼa chi rilbʼal li naru tkʼulmanq rikʼin li jalan jalanq chi naʼlebʼ li taabʼaanu. Wank sut moko tchʼaʼajkoʼq ta chaawu xsikʼbʼal li taabʼaanu abʼan wank sut tchʼaʼajkoʼq chaawu. Joʼkan naq, roksinkil chiʼus laakʼaʼuxl tatxtenqʼa re naq us li taasikʼ xbʼaanunkil usta jwal chʼaʼaj.

12, 13. Chanru roksinkil chiʼus laakʼaʼuxl tatxtenqʼa re xsikʼbʼal junaq li kʼanjel?

¹² Kʼoxla aʼin: yookat xsikʼbʼal jun li kʼanjel re xwenteninkil laajunkabʼal ut nakaataw wiibʼ li kʼanjel bʼarwiʼ inkʼaʼ taaqʼet li xchaqʼrabʼ li Jehobʼa. Nakaatzʼil rix chiʼus chixjunil joʼ li hoonal, li xnajtil ut jalan chik ebʼ li naʼlebʼ. Maare twulaq chaawu jun rehebʼ li kʼanjel xbʼaan naq us tateʼxtoj abʼan wank jalan chik li naʼlebʼ li tento taakʼe saʼ ajl naq toj maajiʼ nakaasikʼ kʼaru xbʼaanunkil.

¹³ Jun eetalil, ma jun rehebʼ li kʼanjel tixram chaawu wulak saʼ li chʼutam? Ma maakʼaʼaq chik aahoonal re xtenqʼankil laajunkabʼal rikʼin li naʼajmank chiru ut re xkawresinkil li xpaabʼal? Xbʼaanunkil ebʼ li patzʼom aʼin tatxtenqʼa re xkʼebʼal chiʼubʼej li wank xwankil: xloqʼoninkil ru li Jehobʼa ut li naʼajmank chiru laajunkabʼal ut inkʼaʼ li rusilal li naxkʼam chaq li bʼihomal. Wi taabʼaanu aʼin, li Jehobʼa trosobʼtesi li taasikʼ xbʼaanunkil.

14. Chanru li rahok ut roksinkil chiʼus li qakʼaʼuxl tooxtenqʼa re naq inkʼaʼ tqakʼehebʼ chi tichkʼok ebʼ li junchʼol?

¹⁴ Roksinkil chiʼus li qakʼaʼuxl tooxtenqʼa re xkʼebʼal saʼ ajl li nekeʼxkʼoxla ebʼ li junchʼol naq tqasikʼ kʼaru xbʼaanunkil re naq chi joʼkan inkʼaʼ tqakʼehebʼ «chi tichkʼok» (Filip. 1:10). Aʼin jwal wank xwankil naq naqasikʼ chanru xtiqibʼankil qibʼ ut xyiibʼankil qibʼ. Jun eetalil, maare nawulak chiqu wiibʼ oxibʼ li tʼirk abʼan, ut wi naxtochʼ xchʼoolebʼ li junchʼol? Roksinkil chiʼus li qakʼaʼuxl tooxtenqʼa re xkʼebʼal saʼ ajl li nekeʼrekʼa ebʼ li junchʼol. Ut li rahok toorekʼasi re xsikʼbʼal li us «choʼq rehebʼ li junchʼol» (1 Cor. 10:​23, 24, 32; 1 Tim. 2:​9, 10). Chi joʼkaʼin li tqasikʼ xbʼaanunkil tixkʼutbʼesi naq naqara ut naqoxloqʼi ebʼ li junchʼol.

15. Kʼaru tento taakʼoxla naq toj maajiʼ nakaasikʼ xbʼaanunkil jun li naʼlebʼ li jwal wank xwankil?

¹⁵ Ut wi li taasikʼ xbʼaanunkil jwal wank xwankil, kʼoxla li naʼajmank re naq ttzʼaqloq ru li taawaj. Li Jesús kixkʼut naq tento xbʼirbʼal rix li sachomq (Luc. 14:28). Joʼkan naq kʼoxla chixjunil li hoonal ut li naʼajmank re naq taabʼaanu li nakaawaj. Wank sut tento tat-aatinaq rikʼin laajunkabʼal re rilbʼal li tento tixbʼaanu li junjunq re naq us t-elq li yookat xkʼoxlankil xbʼaanunkil. Kʼaʼut us xbʼaanunkil aʼin? Maare xbʼaan naq tento taajal wiibʼ oxibʼ li naʼlebʼ li ak xaasikʼ xbʼaanunkil malaj taakʼe reetal naq wank chik jun li naʼlebʼ li jwal chaabʼil. Joʼkan ajwiʼ, wi taakʼe saʼ ajl li nekeʼxkʼoxla laajunkabʼal aʼanebʼ chi sahebʼ saʼ xchʼool teʼtenqʼanq re naq us t-elq li xaasikʼ xbʼaanunkil (Prov. 15:22).

SIKʼ XBʼAANUNKIL LI US

16. Kʼaru tento taabʼaanu re naq us t-elq li taasikʼ xbʼaanunkil? (Chaawil li kaaxukuut «Kʼaru tinbʼaanu re naq us li tinsikʼ xbʼaanunkil»).

¹⁶ Wi ak xaabʼaanu li naʼlebʼ li xooʼaatinak wiʼ, kawresinbʼilat re naq us li taasikʼ xbʼaanunkil. Ak nakaanaw li naʼokenk chisaʼ li naʼlebʼ ut xaatzʼil rix li tixsahobʼresi xchʼool li Jehobʼa. Joʼkan naq anaqwan tento taatzʼaama re li Jehobʼa naq tatxtenqʼa re naq us t-elq li xaasikʼ xbʼaanunkil.

17. Kʼaru natenqʼank re naq us li tqasikʼ xbʼaanunkil?

¹⁷ Maare junxil us xʼelk li xaasikʼ xbʼaanunkil. Abʼan jultika naq li wank xwankil re xsikʼbʼal junaq li naʼlebʼ moko aʼan ta li xseebʼal laachʼool malaj laanawom aʼan bʼan naq taakʼojobʼ aachʼool rikʼin li choxahil naʼlebʼ li nachalk rikʼin li Jehobʼa. Kaʼajwiʼ rikʼin aʼan nachalk li tzʼaqal nawom, xtawbʼal ru chiʼus li naʼlebʼ ut roksinkil chiʼus li kʼaʼuxej, ebʼ li naʼlebʼ aʼin naʼokenk saʼ li choxahil naʼlebʼ (Prov. 2:​1-5). Joʼkan bʼiʼ, li Jehobʼa truuq aatenqʼankil re naq li taasikʼ xbʼaanunkil tixsahobʼresi xchʼool (Sal. 23:​2, 3).