NAʼLEBʼ RE TZOLOK 5
BʼICH 20 Xaataqla chaq li Jesús, laaraarokil Alal
Li osobʼtesihom li naqataw saʼ xkʼabʼaʼ naq li Jehobʼa nokooxra
«Li Kristo Jesús kichalk saʼ li ruuchichʼochʼ aʼin re xkolbʼalebʼ laj maak» (1 TIM. 1:15).
RUʼUJIL LI TZOLOM
Kʼaru rusilal naqataw rikʼin li xkamik li Jesús ut chanru tooruuq xkʼutbʼesinkil chiru li Jehobʼa naq nokoobʼanyoxink.
1. Chanru tooruuq xsahobʼresinkil xchʼool li Jehobʼa?
QAKʼOXLAQ naq naqakʼe re jun li kristiʼaan li jwal raaro qabʼaan jun li maatan li chʼinaʼus ut li truuq roksinkil. Peʼyaal naq trahoʼq qachʼool wi li kristiʼaan aʼin tixxok li maatan ut tsachq saʼ xchʼool? Abʼan jwal tsahoʼq qachʼool wi li kristiʼaan tixbʼanyoxi li maatan ut wi tixkʼutbʼesi naq nawulak chiru. Kʼaru naxkʼut chiqu li eetalil aʼin? Li Jehobʼa xqʼaxtesi li Ralal re naq tkamq saʼ qakʼabʼaʼ. Relik chi yaal naq jwal nasahoʼk saʼ xchʼool naq naqakʼutbʼesi naq naqabʼanyoxi li maatan aʼin ut li xrahom chiqix! (Juan 3:16; Rom. 5:7, 8).
2. Kʼaru tqil saʼ li tzolom aʼin?
2 Naq nanumeʼk li kutan, maare inkʼaʼ chik naqil joʼ jun li loqʼlaj maatan. Naq inkʼaʼ chik tqabʼanyoxi li xkamik li Jesús chanchan tawiʼ naq tqakʼe li maatan li xkʼe qe li Jehobʼa saʼ jun li naʼaj bʼarwiʼ inkʼaʼ naqil chi moko naqakʼoxla rix. Re naq inkʼaʼ tqakʼul aʼin rajlal tento naq tqanaʼlebʼa rix li kixbʼaanu li Jehobʼa ut li Jesús chiqix. Aʼan li rajom li tzolom aʼin. Tooʼaatinaq ajwiʼ chirix kʼaru rusilal naqataw rikʼin li xkamik li Jesús anaqwan ut kʼaru rusilal tqataw saʼ li kutan chalk re. Tqil ajwiʼ chanru tooruuq xkʼutbʼesinkil chiru li Jehobʼa naq naqabʼanyoxi li xrahom qʼaxal wiʼ chik saʼ xqʼehil li Xnimankil li Xkamik li Jesús.
KʼARU RUSILAL NAQATAW ANAQWAN
3. Kʼaru jun rusilal naqataw anaqwan saʼ xkʼabʼaʼ li xkamik li Jesús?
3 Ak yooko xtawbʼal rusilal li xkamik li Kriist. Saʼ xkʼabʼaʼ aʼin, li Jehobʼa naxkuy qamaak. Moko naxbʼaanu ta xbʼaan naq minbʼil ru, naxbʼaanu bʼan xbʼaan naq naʼalaak saʼ xchʼool. Xbʼaan naq nabʼanyoxink laj David kixye: «Qʼaxal chaabʼilat, at Qaawaʼ, ut aj kuyulat maak» (Sal. 86:5; 103:3, 10-13).
4. Saʼ ani aj kʼabʼaʼ li Jehobʼa kixbʼaanu naq tkamq li Ralal? (Lucas 5:32; 1 Timoteo 1:15).
4 Naabʼalebʼ li kristiʼaan nekeʼxkʼoxla naq moko xkʼulubʼ ta naq li Jehobʼa tixkuyebʼ xmaak. Abʼan li xyaalalil aʼan naq maajun qe xkʼulubʼ naq tkuyeʼq xmaak. Li apóstol Pablo kixye: «Moko inkʼulubʼ ta naq tinkʼabʼaʼiiq joʼ apóstol». Moqon kixye ajwiʼ: «Saʼ xkʼabʼaʼ li xnimal rusilal li Yos, laaʼin apóstol» (1 Cor. 15:9, 10). Naq naqayotʼ qachʼool xbʼaan li qamaak, li Jehobʼa naxkuy qamaak. Naxbʼaanu aʼin moko xbʼaan ta naq qakʼulubʼ, naxbʼaanu bʼan xbʼaan naq nokooxra. Joʼkan naq wi inkʼaʼ sa naqekʼa qibʼ xbʼaan naq naqakʼoxla naq moko qakʼulubʼ ta naq li Jehobʼa tixkuy qamaak qajultikaq naq li Jesús moko kikamk ta saʼ xkʼabʼaʼebʼ li kristiʼaan li tzʼaqalebʼ re ru xyuʼam, kikamk bʼan saʼ xkʼabʼaʼebʼ li kristiʼaan li moko tzʼaqalebʼ ta re ru xyuʼam li nekeʼxyotʼ xchʼool xbʼaan li xmaak (yaabʼasi Lucas 5:32; 1 Timoteo 1:15).
5. Kʼaʼut maaʼani truuq xyeebʼal naq xkʼulubʼ naq t-uxtanaaq ru xbʼaan li Jehobʼa?
5 Maajunwa tqakʼoxla naq li Jehobʼa tento tixkuy qamaak yal saʼ xkʼabʼaʼ naq naabʼal chihabʼ qokik chi kʼanjelak chiru. Li Jehobʼa naroxloqʼi chixjunil li naqabʼaanu saʼ xkʼabʼaʼ (Heb. 6:10). Abʼan li Jehobʼa kixkʼe li Ralal joʼ maatan, moko qatojbʼal ta xbʼaan li kʼanjel li naqabʼaanu chiru. Wi tqaye raj naq ak xqataw li ruxtaan li Jehobʼa, relik chi yaal yooko raj xyeebʼal naq inkʼaʼ naʼajmank naq li Kriist tkamq saʼ qakʼabʼaʼ (juntaqʼeeta rikʼin Gálatas 2:21).
6. Kʼaʼut laj Pablo xbʼaanu chixjunil re kʼanjelak chiru li Jehobʼa?
6 Laj Pablo naxnaw naq usta naabʼal tixbʼaanu chirix li Jehobʼa moko tenebʼanbʼil ta saʼ xbʼeen xkuybʼal xmaak. Joʼkan bʼiʼ, kʼaʼut naq naxbʼaanu chixjunil re kʼanjelak chiru li Jehobʼa? Xbʼaan naq naraj xkʼutbʼesinkil chiru naq naxbʼanyoxi li usilal li nakʼutbʼesiik re xbʼaan li Yos (Efes. 3:7). Joʼkan ajwiʼ naqabʼaanu laaʼo. Nokookʼanjelak chiru li Jehobʼa chi anchal qachʼool xbʼaan naq naqaj xkʼutbʼesinkil chiru naq nokoobʼanyoxink, moko xbʼaan ta naq naqaj xtawbʼal li rusilal.
7. Kʼaru chik rusilal naqataw anaqwan saʼ xkʼabʼaʼ li xkamik li Jesús? (Romanos 5:1; Santiago 2:23).
7 Jun chik li rusilal li naqataw anaqwan saʼ xkʼabʼaʼ li xkamik li Jesús aʼan naq nokooruuk wank saʼ amiiwil rikʼin li Jehobʼa.a Joʼ xqil saʼ li tzolom rubʼelaj, naq xooyoʼlaak moko wanko ta saʼ amiiwil rikʼin li Yos. Abʼan saʼ xkʼabʼaʼ li xkamik li Jesús nokooruuk xtawbʼal li «tuqtuukilal rikʼin li Yos» ut nokoojilok chixkʼatq (yaabʼasi Romanos 5:1; Santiago 2:23).
8. Kʼaʼut tqabʼanyoxi re li Jehobʼa naq nokooruuk tijok chiru?
8 Tijok chiru li Jehobʼa aʼan jun li loqʼlaj naʼlebʼ li tooruuq xbʼaanunkil xbʼaan naq wanko saʼ amiiwil rikʼin li Jehobʼa. Li Jehobʼa moko kaʼaj tawiʼ narabʼi li tij li nabʼaanumank saʼebʼ li chʼutam narabʼi ajwiʼ li nabʼaanumank saʼ junesal. Yaal naq li tij naxbʼaanu naq sa wanko ut tuqtuuq ru qakʼaʼuxl, abʼan li jwal wank xwankil aʼan naq naqakawresi li qamiiwil rikʼin li Yos (Sal. 65:3; Sant. 4:8; 1 Juan 5:14). Naq li Jesús kiwank saʼ Ruuchichʼochʼ, rajlal kitijok chiru li Jehobʼa xbʼaan naq naxnaw naq yook chi abʼiik ut naq li xtij naxbʼaanu naq kawaq li ramiiwil rikʼin (Luc. 5:16). Jwal naqabʼanyoxi naq saʼ xkʼabʼaʼ li xkamik li Jesús nokooruuk wank saʼ amiiwil rikʼin li Jehobʼa ut tijok chiru.
KʼARU RUSILAL TQATAW SAʼ LI KUTAN CHALK RE
9. Kʼaru rusilal teʼxtaw laj kʼanjel chiru li Yos saʼ li kutan chalk re saʼ xkʼabʼaʼ li xkamik li Jesús?
9 Kʼaru rusilal teʼxtaw laj kʼanjel chiru li Yos saʼ li kutan chalk re saʼ xkʼabʼaʼ li xkamik li Jesús? Li Jehobʼa tixkʼe rehebʼ li junelik yuʼam. Naabʼalebʼ nekeʼxkʼoxla naq moko naruhank ta wank chi junelik xbʼaan naq ebʼ li kristiʼaan junelik nekeʼkamk. Abʼan li Jehobʼa kixyobʼtesi ebʼ li kristiʼaan re naq teʼwanq chi junelik. Ut usta anaqwan chʼaʼaj xkʼoxlankil naq tooruuq wanq chi junelik, chʼolchʼo naq tooruuq xpaabʼankil naq joʼkan tkʼulmanq xbʼaan naq naqanaw naq li Jehobʼa jwal terto kixtoj re naq tooruuq xtawbʼal li junelik yuʼam saʼ xkʼabʼaʼ li xkamik li Ralal (Rom. 8:32).
10. Kʼaru nekeʼroybʼeni ebʼ li yulbʼilebʼ ru ut ebʼ li junchʼol chik chi karneer?
10 Usta li junelik yuʼam aʼan jun li maatan li tqakʼul saʼ li kutan chalk re, li Jehobʼa naraj naq chalen anaqwan tqakʼoxla rix. Ebʼ li yulbʼilebʼ ru nekeʼroybʼeni chi anchal xchʼool xik saʼ choxa ut awabʼejink saʼ xbʼeen li Ruuchichʼochʼ rochbʼeen li Kristo Jesús (Apoc. 20:6). Ut ebʼ li junchʼol chik chi karneer nekeʼroybʼeni wank saʼ li Chʼinaʼusil Naʼajej arin saʼ Ruuchichʼochʼ, bʼarwiʼ maakʼaʼaq chik rahilal chi moko raaxiikʼ (Apoc. 21:3, 4). Ma nakaawoybʼeni wank chi junelik saʼ Ruuchichʼochʼ? Li maatan aʼin maawaʼ re xkʼojobʼankil aachʼool. Li Jehobʼa kixyobʼtesi ebʼ li kristiʼaan re naq teʼwanq saʼ Ruuchichʼochʼ, joʼkan naq wank chi junelik saʼ Ruuchichʼochʼ tixkʼe xsahil qachʼool.
11, 12. Kʼaru wiibʼ oxibʼ li osobʼtesihom naqarahi ru xtawbʼal? (Chaawil ebʼ li jalam u).
11 Kʼoxla chanruhaq laayuʼam saʼ li akʼ ruuchichʼochʼ. Li yajel ut li kamk inkʼaʼ chik tixkʼe aakʼaʼuxl (Is. 25:8; 33:24). Li Jehobʼa tixkʼe aawe chixjunil li naʼalaak saʼ aachʼool. Ma twulaq raj chaawu xtawbʼal xkomon aanaʼlebʼ chirix li xul? Ma twulaq raj chaawu xtzolbʼal wajbʼak? Ma twulaq raj chaawu xtzolbʼal bʼonok? Relik chi yaal naq t-ajmanq ebʼ li kristiʼaan li teʼxnaw xkʼubʼankil ut xkabʼlankil ebʼ li ochoch. T-ajmanq ajwiʼ li teʼxkʼanjela ut teʼxyiibʼ li tzekemq, teʼxkʼubʼ li kʼaʼaq re ru, teʼraw li uutzʼuʼuj, teʼril ut teʼxbʼaanu jalan chik li kʼanjel (Is. 35:1; 65:21). Naq tatwanq chi junelik twanq aahoonal re xbʼaanunkil ebʼ li naʼlebʼ aʼin ut jalanq chik!
12 Jwal tsahoʼq saʼ qachʼool xkʼulbʼal ebʼ li teʼwakliiq chi yoʼyo! (Hech. 24:15). Joʼkan ajwiʼ tsahoʼq saʼ qachʼool xtzolbʼal xkomon qanaʼlebʼ chirix li Jehobʼa ut chirix li kʼaʼaq re ru li kixyobʼtesi (Sal. 104:24; Is. 11:9). Li qʼaxal chaabʼil aʼan naq tqaloqʼoni ru chi maakʼaʼ tchʼiʼchʼiʼinq qe. Relik chi yaal naq inkʼaʼ taajal ebʼ li osobʼtesihom aʼin rikʼin «xyalbʼal li sahilal li moko najt ta nawank ut nachalk saʼ li maak» (Heb. 11:25). Li chʼinaʼusil yuʼam li tqataw jwal chʼinaʼusaq chiru yalaq kʼaru li kʼaʼaq re ru li tooruuq xtawbʼal anaqwan ajwiʼ. Jultika naq twulaq li hoonal naq li akʼ ruuchichʼochʼ moko aʼanaq ta jun li yeechiʼom re li kutan chalk re aʼanaq bʼan li naʼaj bʼarwiʼ toowanq rajlal kutan. Ut chixjunil aʼin tooruuq xtawbʼal saʼ xkʼabʼaʼ naq li Jehobʼa xooxra ut kixtaqla chaq li Ralal re naq tkamq saʼ qakʼabʼaʼ.
Kʼaru ebʼ li osobʼtesihom naqarahi ru xtawbʼal? (Chaawil li raqal 11 ut 12).
QAKʼUTBʼESIHAQ CHIRU LI JEHOBʼA NAQ NAQABʼANYOXI LI XRAHOM
13. Chanru tqakʼutbʼesi naq naqabʼanyoxi li xrahom li Jehobʼa? (2 Corintios 6:1).
13 Naq naqakʼe xbʼeenwa saʼ li qayuʼam li xkʼanjel li Jehobʼa, naqakʼutbʼesi naq naqabʼanyoxi naq kixtaqla chaq li Ralal re naq tkamq saʼ qakʼabʼaʼ (Mat. 6:33). Xbʼaan naq li Jesús kikamk «re naq li yoʼyokebʼ inkʼaʼ chik yoʼyoqebʼ choʼq re xjunesebʼ, yoʼyoqebʼ bʼan choʼq re li kikamk saʼ xkʼabʼaʼebʼ ut kiwaklesiik chi yoʼyo» (2 Cor. 5:15). Joʼkan naq inkʼaʼ naqaj xbʼaanunkil junaq li naʼlebʼ li tixbʼaanu naq inkʼaʼ chik tqataw li rusilal li Jehobʼa (yaabʼasi 2 Corintios 6:1).
14. Chanru naqakʼutbʼesi naq wank qapaabʼal naq nokooʼabʼink chiru li naʼlebʼ li naxkʼe qe li Jehobʼa?
14 Jun chik li naʼlebʼ re xbʼanyoxinkil li xrahom li Jehobʼa aʼan naq naqapaabʼ li naʼlebʼ li naxkʼe qe. Naqabʼaanu aʼin naq naqakʼe saʼ ajl li Jehobʼa naq naqasikʼ kʼaru xbʼaanunkil saʼ li qayuʼam joʼ: kʼaru tqatzol malaj kʼaru kʼanjel tqakʼulubʼa (1 Cor. 10:31; 2 Cor. 5:7). Naq naqakʼutbʼesi li qapaabʼal rikʼin li qabʼaanuhom, nakawuuk li qapaabʼal, li qamiiwil rikʼin li Jehobʼa ut li qoybʼenihom (Rom. 5:3-5; Sant. 2:21, 22).
15. Chanru tooruuq xkʼutbʼesinkil naq nokoobʼanyoxink saʼ xqʼehil li Xnimankil li Xkamik li Jesús?
15 Jun chik li naʼlebʼ re xkʼutbʼesinkil naq naqabʼanyoxi li xkamik li Jesús ut li xrahom li Jehobʼa aʼan naq naqabʼaanu chixjunil li wank saʼ quqʼ saʼ xqʼehil li Xnimankil li Xkamik li Jesús. Naqakʼubʼ wulak saʼ li kutan aʼin ut naqabʼoqebʼ li junchʼol re naq tooʼeʼrochbʼeeni (1 Tim. 2:4). Naq taabʼoqebʼ chʼolobʼ chiruhebʼ kʼaru nabʼaanumank saʼ li chʼutam aʼan. Tatruuq ajwiʼ xkʼutbʼal chiru ebʼ li bʼideo Kʼaʼut kikamk li Jesús? ut Qajultikaq li xkamik li Jesús li wank saʼ jw.org. Ebʼ li cheekel winq nekeʼxbʼoq ebʼ li inkʼaʼ chik nekeʼwulak saʼebʼ li chʼutam. Ma nakaakʼoxla li sahil chʼoolejil li twanq saʼ choxa ut saʼ Ruuchichʼochʼ naq wiibʼ oxibʼ laj kʼanjel chiru li Jehobʼa teʼalaaq saʼ xchʼool tzʼaqonk wiʼ chik saʼebʼ li chʼutam? (Luc. 15:4-7). Saʼ li Xnimankil li Xkamik li Jesús naru naq tqakʼe xsahil xchʼool chixjunilebʼ li teʼwulaq, qʼaxal wiʼ chik li toj akʼebʼ malaj ebʼ li naabʼal chihabʼ maajiʼ nekeʼwulak saʼ li chʼutam. Qabʼaanuhaq chixjunil re naq sa teʼrekʼa ribʼ! (Rom. 12:13).
16. Kʼaʼut tento tqakʼoxla xkʼebʼal xkomon qakʼanjel saʼ xqʼehil li Xnimankil li Xkamik li Jesús?
16 Tooruuq roksinkil li xqʼehil li Xnimankil li Xkamik li Jesús re xkʼebʼal xkomon qakʼanjel chiru li Jehobʼa? Aʼin jun li naʼlebʼ re xkʼutbʼesinkil naq naqabʼanyoxi li kixbʼaanu li Jehobʼa ut li Jesús chiqix. Naq nokoopuktesink naqil li xtenqʼ li Jehobʼa ut qʼaxal wiʼ chik nakawuuk li xkʼojobʼankil qachʼool rikʼin (1 Cor. 3:9). Qajultikaq xyaabʼasinkil ebʼ li raqal choʼq re Xnimankil li Xkamik li Jesús, li natawmank saʼ li hu Qatzʼilaq rix li Raatin li Yos wulaj wulaj ut li kaaxukuut li wank saʼ Xhuhil li qachʼutam. Joʼkan ajwiʼ tooruuq roksinkil li raqal aʼin naq tootzoloq.
17. Kʼaru naxbʼaanu naq li Jehobʼa sahaq saʼ xchʼool qikʼin? (Chaawil li kaaxukuut «Ebʼ li naʼlebʼ re xbʼanyoxinkil li xrahom li Jehobʼa»).
17 Matkʼoxlak wi xbʼaan laawanjik inkʼaʼ nakatruuk xbʼaanunkil ebʼ li naʼlebʼ li natawmank saʼ li tzolom aʼin? Jultika naq li Jehobʼa inkʼaʼ nakatxjuntaqʼeeta rikʼinebʼ li junchʼol. Aʼan naroxloqʼi li rahom li nakaakʼutbʼesi chiru ut sa saʼ xchʼool xbʼaan naq nakaabʼanyoxi li xkamik li Jesús (1 Sam. 16:7; Mar. 12:41-44).
18. Kʼaʼut jwal nokoobʼanyoxink chiru li Jehobʼa ut li Jesús?
18 Saʼ xkʼabʼaʼ li xkamik li Jesús naru nakuyeʼk qamaak, nokoowank joʼ ramiiw li Jehobʼa ut nokooruuk wank chi junelik. Junelik qakʼutbʼesihaq naq naqabʼanyoxi li xrahom li Jehobʼa li kiʼekʼasink re chi xkʼebʼal qe chixjunil ebʼ li osobʼtesihom aʼin (1 Juan 4:19). Qakʼutbʼesihaq naq jwal naqabʼanyoxi naq li Jesús xooxra ut kixkʼe li xyuʼam saʼ qakʼabʼaʼ (Juan 15:13).
BʼICH 154 Li rahok maajoqʼe naʼosoʼk