NAʼLEBʼ RE TZOLOK 20
BʼICH 7 Li Jehobʼa aʼan linkawilal
Sikʼ li kʼojobʼank chʼoolej li naxkʼe li Jehobʼa
«Chinimaaq ru […] li Yuwaʼbʼej li qʼaxal narahok ut naʼuxtaanank u, ut li Yos, li qʼaxal nakʼojobʼank chʼool» (2 COR. 1:3).
RUʼUJIL LI TZOLOM
Saʼ li tzolom aʼin tqatzol chanru li Jehobʼa xkʼojobʼ xchʼoolebʼ laj judiiy li keʼwank Babilonia.
1. Chanru xwanjikebʼ laj judiiy li xeʼkʼameʼk Babilonia?
CHIRU naabʼal chihabʼ ebʼ laj judiiy rajlal xeʼxtzʼeqtaana li Jehobʼa xbʼaan aʼin li Jehobʼa kixkanabʼ naq ebʼ laj Babilonia teʼrechani li xtenamit ut teʼkʼameʼq chi preexil aran Babilonia. Chanru xeʼrekʼa ribʼ laj judiiy naq xeʼwank Babilonia? (2 Crón. 36:15, 16, 20, 21). Yaal naq xeʼruuk sumlaak, xeʼwank ralal xkʼajol, xeʼkʼanjelak ut xeʼxbʼaanu naabʼal chik li naʼlebʼ (Jer. 29:4-7). Abʼan moko aran ta nekeʼraj wank. Aʼin li kixye jun rehebʼ laj judiiy: «Chirehebʼ li nimaʼ aran Babilonia xoochunlaak ut xooyaabʼak chi xkʼoxlankil li tenamit Sión» (Sal. 137:1). Yaal naq naʼajmank chiruhebʼ laj judiiy naq teʼkʼojobʼaaq xchʼool abʼan, ani tbʼaanunq re?
2, 3. a) Kʼaru kixbʼaanu li Jehobʼa re xkʼojobʼankil xchʼoolebʼ laj judiiy li wankebʼ Babilonia? b) Kʼaru tqil saʼ li tzolom aʼin?
2 Li Jehobʼa aʼan «li Yos, li qʼaxal nakʼojobʼank chʼool» (2 Cor. 1:3). Naxrahebʼ li nekeʼjilok chixkʼatq ut naraj xkʼojobʼankil xchʼoolebʼ. Li Jehobʼa naxnaw naq wiibʼ oxibʼ rehebʼ laj judiiy li xeʼkʼameʼk chi preexil aran Babilonia teʼxkʼulubʼa li xqʼusum ut teʼoq wiʼ chik chi xloqʼoninkil ru joʼ nawulak chiru (Is. 59:20). Joʼkan naq, numenaq jun siʼeent chihabʼ naq toj maajiʼ nekeʼkʼameʼk chi preexil laj judiiy, li Jehobʼa kixbʼaanu naq laj Isaías tixtzʼiibʼa jun li tasal hu li naxkʼam li xkʼabʼaʼ. Chanru tkʼanjelaq chiruhebʼ laj judiiy li hu Isaías? Laj Isaías kixye: «Kʼojobʼomaq xchʼool lintenamit, kʼojobʼomaq xchʼool -chan li Qaawaʼ leeYos» (Is. 40:1). Joʼkan naq li Jehobʼa kiroksi li hu Isaías re xkʼojobʼankil xchʼoolebʼ laj judiiy li wankebʼ chi preexil aran Babilonia.
3 Naʼajmank ajwiʼ chiqu naq teʼxkʼojobʼ qachʼool. Saʼ li tzolom aʼin tqatzʼil rix oxibʼ li naʼlebʼ li kixbʼaanu li Jehobʼa re xkʼojobʼankilebʼ xchʼool laj judiiy li wankebʼ Babilonia: 1) kixye naq tixkuy xmaakebʼ li nekeʼxyotʼ xchʼool, 2) kixkʼe roybʼenihomebʼ laj kʼanjel chiru ut 3) kixtenqʼahebʼ re naq inkʼaʼ teʼxuwaq. Tqil naq saʼ li qakutan li Jehobʼa naroksi li junjunq chi naʼlebʼ aʼin re xkʼojobʼankil qachʼool.
LI JEHOBʼA NAʼUXTAANANK U UT NAXKUY QAMAAK
4. Chanru kixkʼutbʼesi li Jehobʼa naq naʼuxtaanank u? (Isaías 55:7).
4 Li Jehobʼa aʼan «li Yuwaʼbʼej li qʼaxal narahok ut naʼuxtaanank u» (2 Cor. 1:3). Kixkʼutbʼesi aʼin naq kixye naq tixkuy xmaakebʼ laj judiiy li teʼxyotʼ xchʼool li wankebʼ Babilonia (yaabʼasi Isaías 55:7). Li Jehobʼa kixye: «Nakatinra rikʼin xnimal inrahom» (Is. 54:8). Chanru tixkʼutbʼesi aʼin li Jehobʼa? Usta ebʼ laj judiiy ra teʼxkʼul xbʼaan naq inkʼaʼ xeʼabʼink, li Jehobʼa kixye rehebʼ naq moko junelik ta teʼwanq aran Babilonia. Twulaq xqʼehil naq teʼsutqʼiiq wiʼ chik saʼ li xtenamit (Is. 40:2). Chʼolchʼo naq li yeechiʼom aʼin jwal kixkʼojobʼebʼ xchʼool laj judiiy li xeʼxyotʼ xchʼool.
5. Kʼaʼut chʼolchʼo chiqu naq li Jehobʼa naʼuxtaanank u?
5 Kʼaru naqatzol? Li Jehobʼa naraj xkuybʼal qamaak chi anchal xchʼool. Ebʼ laj judiiy li wankebʼ Babilonia nekeʼxnaw aʼin abʼan laaʼo qʼaxal wiʼ chik chʼolchʼo chiqu. Xbʼaan naq ak naqanaw chixjunil li kixbʼaanu li Jehobʼa re xkuybʼal qamaak. Naabʼal siʼeent chihabʼ moqon naq laj Isaías kiʼaatinak chirix chanru li Jehobʼa nakuyuk maak, li Jehobʼa kixtaqla chaq li Ralal saʼ Ruuchichʼochʼ re xkʼebʼal li xyuʼam re naq teʼkuyeʼq xmaak li nekeʼxyotʼ xchʼool. Li kixbʼaanu kikʼanjelak re naq tkuyeʼq tsacheʼq li qamaak chi junajwa (Hech. 3:19; Is. 1:18; Efes. 1:7). Qʼaxal naʼuxtaanank u li Jehobʼa!
6. Kʼaʼut us naq tqanaʼlebʼa rix li ruxtaan li Jehobʼa? (Chaawil ebʼ li jalam u).
6 Li aatin li natawmank saʼ Isaías 55:7 naru tixkʼojobʼ qachʼool wi toj narahoʼk qachʼool xbʼaan jun li maak li xqabʼaanu usta ak xqayotʼ chik qachʼool. Wankebʼ inkʼaʼ sa nekeʼrekʼa ribʼ xbʼaan naq toj yookebʼ xkʼulbʼal rahilal xbʼaan li xeʼxbʼaanu, abʼan wi ak xqayotʼ qachʼool ut inkʼaʼ chik yooko chi maakobʼk chʼolchʼooq chiqu naq li Jehobʼa ak xkuy chik qamaak. Ut naq naxkuy qamaak inkʼaʼ chik naxjultika li xqabʼaanu (juntaqʼeeta rikʼin Jeremías 31:34). Wi li Jehobʼa moko yook ta chik xjultikankil, laaʼo ajwiʼ inkʼaʼ tqabʼaanu. Li Jehobʼa moko naxkʼe ta saʼ ajl li maak li ak xqabʼaanu, naxkʼe bʼan xchʼool chi rilbʼal li yooko xbʼaanunkil anaqwan (Ezeq. 33:14-16). Ut qajultikaq naq chi seebʼ li Yuwaʼbʼej li naʼuxtaanank u, tixsach chi junajwa li rahilal li naxkʼam chaq li qamaak.
Li Jehobʼa moko naxkʼe ta saʼ ajl li maak li xqabʼaanu, naxkʼe bʼan xchʼool chirix li yooko xbʼaanunkil anaqwan. (Chaawil li raqal 6).
7. Kʼaru tatruuq xbʼaanunkil re naq inkʼaʼ tchʼaʼajkoʼq chaawu xyeebʼal laamaak?
7 Kʼaru tqabʼaanu wi inkʼaʼ sa naqekʼa qibʼ xbʼaan jun li nimla maak li xqabʼaanu ut yooko xmuqbʼal chiruhebʼ li junchʼol? Li Santil Hu naxye naq tento tqapatzʼ qatenqʼ rehebʼ li cheekel winq (Sant. 5:14, 15). Yaal, nachʼaʼajkoʼk chiqu xyeebʼal rehebʼ li xqabʼaanu abʼan qajultikaq naq li Jehobʼa kixxaqabʼ ebʼ li winq aʼin re qatenqʼankil. Joʼkan naq wi naqayotʼ qachʼool ut chʼolchʼo chiqu naq li Jehobʼa ut ebʼ li cheekel winq nekeʼxkʼutbʼesi naq nokooʼeʼxra ut nekeʼruxtaana qu, inkʼaʼ tchʼaʼajkoʼq chiqu aatinak rikʼinebʼ. Qilaq chanru li Jehobʼa kiruxtaana ru ut kixkʼojobʼ xchʼool laj Arthur, li inkʼaʼ sa narekʼa ribʼ xbʼaan li kixbʼaanu.a Laj Arthur naxye: «Maare chiru jun chihabʼ xwil li nekeʼxkʼut ribʼ chi tʼustʼu. Abʼan saʼ jun kutan kiwabʼi jun li seeraqʼ li naʼaatinak chirix li qachʼool, joʼkan naq xinye re li wixaqil ut ebʼ li cheekel winq. Sa xwekʼa wibʼ naq xinʼaatinak rikʼinebʼ abʼan toj ra inchʼool. Ebʼ li cheekel winq xeʼxye naq li Jehobʼa inkʼaʼ xinxtzʼeqtaana ut naq nokooxqʼus xbʼaan naq nokooxra. Ebʼ li aatin aʼin kixtochʼ inchʼool ut xinxtenqʼa re xqʼaxbʼal ru li yibʼru aj naʼlebʼ li nawekʼa». Saʼ li qakutan laj Arthur aj kʼamolbʼe saʼ li puktesink li nekeʼxbʼaanu 50 hoor ut aj tenqʼanel saʼ li chʼuut. Jwal nasahoʼk qachʼool xnawbʼal naq wi naqayotʼ qachʼool li Jehobʼa naxkuy qamaak!
LI JEHOBʼA NAXKʼE QOYBʼENIHOM
8. a) Kʼaru li oybʼenihom kixkʼe li Jehobʼa rehebʼ laj judiiy? b) Joʼ naxye Isaías 40:29-31, chanru xeʼrekʼa ribʼ laj judiiy li xeʼxyotʼ xchʼool xbʼaan li oybʼenihom li kixkʼe rehebʼ li Jehobʼa?
8 Li tenamit Babilonia aʼan jun li tenamit li jwal wank xwankil ut nawbʼil ru xbʼaan naq ebʼ li kristiʼaan li wankebʼ aran chi preexil, inkʼaʼ nekeʼelk. Joʼkan naq, chanchan tawiʼ naq ebʼ laj judiiy maajunwa teʼruuq sutqʼiik saʼ li xtenamit (Is. 14:17). Abʼan li Jehobʼa kixye rehebʼ naq trachʼabʼebʼ ut maaʼani truuq xrambʼal chiru xbʼaanunkil aʼin (Is. 44:26; 55:12). Choʼq re li Jehobʼa li tenamit Babilonia chanchan li pojtzʼ (Is. 40:15). Naq nakaawapu li pojtzʼ, nasach saʼ junpaat. Joʼkan ajwiʼ inkʼaʼ tchʼaʼajkoʼq chiru li Jehobʼa rachʼabʼankil li xtenamit. Chʼolchʼo naq li oybʼenihom aʼin jwal kixkʼojobʼebʼ xchʼool laj judiiy ut moko kaʼaj tawiʼ aʼin. Laj Isaías kixtzʼiibʼa: «Li nekeʼoybʼenink rikʼin li Qaawaʼ junelik kawaqebʼ ribʼ» (yaabʼasi Isaías 40:29-31). Chanchanaqebʼ li tʼiw saʼ choxa, xbʼaan naq li roybʼenihom tixkʼehebʼ xmetzʼew.
9. Kʼaru xnimal ru xyaalal wank re naq ebʼ laj judiiy teʼxkʼojobʼ xchʼool rikʼin li Jehobʼa ut li xyeechiʼom?
9 Wank jun xyaalal re naq ebʼ laj judiiy teʼxkʼojobʼ xchʼool rikʼin li Jehobʼa ut li xyeechiʼom xbʼaan naq naabʼal sut xeʼril chanru li propesiiy li naxye li Jehobʼa natzʼaqlok ru. Jun eetalil, nekeʼxnaw naq li awabʼej re Asiria kirechani li lajeebʼ chi teep re li tenamit Israel, ut xeʼkʼameʼk chi preexil li wankebʼ aran (Is. 8:4). Xeʼril chanru ebʼ laj Babilonia xeʼxsach li tenamit Jerusalén ut xeʼkʼameʼk Babilonia (Is. 39:5-7). Ut nekeʼxnaw naq li awabʼej re Babilonia kirisi xsaʼ ru li awabʼej Sedequías ut kikʼameʼk Babilonia (Jer. 39:7; Ezeq. 12:12, 13). Chixjunil li kixye li Jehobʼa kitzʼaqlok ru (Is. 42:9; 46:10). Chʼolchʼo naq chixjunil aʼin kixbʼaanu naq tchʼolaaq chiruhebʼ naq li Jehobʼa tixbʼaanu li kixye ut teʼelq chi preexil.
10. Kʼaru tooxtenqʼa re xkawresinkil li qoybʼenihom saʼebʼ li kutan aʼin?
10 Kʼaru naqatzol? Naq li qoybʼenihom naru tixkʼe qametzʼew ut tixkʼojobʼ qachʼool naq nachʼinaak qachʼool. Yaal naq wanko saʼebʼ li kutan li jwal chʼaʼaj xnumsinkil ut naq wankebʼ li xikʼ nekeʼilok qe abʼan michʼinaak qachʼool, li Jehobʼa naxye qe naq naru toowanq chi junelik saʼ tzʼaqal tuqtuukilal chi maakʼaʼ tqaxuwa. Joʼkan naq aajel ru naq junelik tqajultika li yeechiʼom aʼin. Kʼaru tooxtenqʼa re naq maajunwa tsachq saʼ qachʼool li yeechiʼom aʼin? Tento naq rajlal tqakʼoxla chanruhaq li qayuʼam saʼ li akʼ ruuchichʼochʼ. Qilaq ebʼ li tzolom, ebʼ li bʼideo ut ebʼ li bʼich li nekeʼaatinak chirix li qoybʼenihom. Ut qayeehaq re li Jehobʼa bʼar wank rehebʼ li yeechiʼom li jwal naxkʼe xsahil qachʼool.
11. Chanru naxtaw wiʼ chik xmetzʼew jun li hermaan li nim xyajel?
11 Qilaq li xʼeetalil li xJoy, jun li hermaan li nim xyajel. Aʼan naxye chanru li oybʼenihom naxkʼojobʼ ut naxkawubʼresi xchʼool: «Naq ninkʼoxla naq inkʼaʼ chik ninkuy, ninte linchʼool chiru li Jehobʼa ut ninye re chixjunil li nawekʼa ut chʼolchʼo chiwu naq li Jehobʼa naxtaw ru chanru wankin. Ut naxsume lintij naq naxkʼe we li wankilal li kaʼajwiʼ rikʼin nachalk» (2 Cor. 4:7). Li xJoy rajlal naxjultika chanruhaq li akʼ ruuchichʼochʼ bʼarwiʼ «maajun chik saʼ qayanq tixye: “Yajin”» (Is. 33:24). Wi naqaye re li Jehobʼa chanru naqekʼa qibʼ ut naqakʼe qachʼool chirix li qoybʼenihom, naru tqataw wiʼ chik qametzʼew.
12. Kʼaru xyaalal wank re naq tqakʼojobʼ qachʼool rikʼin li Jehobʼa ut li xyeechiʼom? (Chaawil ebʼ li jalam u).
12 Joʼebʼ laj judiiy li wankebʼ Babilonia, wank ajwiʼ xyaalal re naq tqakʼojobʼ qachʼool rikʼin li Jehobʼa ut li xyeechiʼom. Qakʼoxlaq ebʼ li propesiiy li yookebʼ chi tzʼaqlok ru saʼ li qakutan. Jun eetalil, wank jun awabʼejihom li yiijach kaw ribʼ «ut yiijach inkʼaʼ» (Dan. 2:42, 43). Rajlal naqabʼi ajwiʼ naq wank ebʼ li «ninqi hiik saʼ naabʼal chi naʼajej» ut nokopuktesink saʼ «chixjunil li ruuchichʼochʼ» (Mat. 24:7, 14). Rilbʼal chanru nekeʼtzʼaqlok ru ebʼ li propesiiy aʼin ut jalanebʼ chik naxkʼojobʼ qachʼool ut naxkawubʼresi li qapaabʼal naq ebʼ li junchʼol chik chi propesiiy teʼtzʼaqloq ru.
Ebʼ li propesiiy li nekeʼtzʼaqlok ru saʼebʼ li qakutan naxbʼaanu naq tqakʼojobʼ qachʼool rikʼin li xyeechiʼom li Jehobʼa. (Chaawil li raqal 12).
LI JEHOBʼA NOKOOXTENQʼA RE NAQ INKʼAʼ TOOXUWAQ
13. a) Kʼaru ebʼ li chʼaʼajkilal teʼxnumsi ebʼ laj judiiy naq yook chi nachʼok li kutan naq teʼelq Babilonia? b) Joʼ naxye Isaías 41:10-13, chanru li Jehobʼa kixkʼojobʼebʼ xchʼool ebʼ laj judiiy?
13 Li Jehobʼa kixkʼe rehebʼ laj judiiy jun li chʼinaʼusil oybʼenihom, abʼan naxnaw naq jwal teʼchʼaʼajkoʼq li xwanjik naq tnachʼoq li xkutankil naq teʼelq Babilonia. Li Jehobʼa kixye naq jun li awabʼej li jwal kaw ribʼ trechani ebʼ li tenamit li wank chi xsutam ut moqon tixsach li tenamit Babilonia (Is. 41:2-5). Abʼan moko wank ta xyaalal re naq ebʼ laj judiiy teʼxuwaq xbʼaan naq li Jehobʼa ak kixye ebʼ li aatin aʼin: «Matxiwak, xbʼaan naq wankin aawikʼin; matkʼoxlak xbʼaan naq laaʼin laaYos» (yaabʼasi Isaías 41:10-13). Kʼaʼut li Jehobʼa kixye rehebʼ: «Laaʼin laaYos»? Moko kixbʼaanu ta aʼin re xyeebʼal rehebʼ naq tento teʼxloqʼoni ru, kixye bʼan re naq teʼxjultika naq aʼan junelik twanq rikʼinebʼ re xtenqʼankilebʼ (Sal. 118:6).
14. Kʼaru chik kixbʼaanu li Jehobʼa re naq ebʼ laj judiiy inkʼaʼ teʼxuwaq?
14 Jun chik li naʼlebʼ li kixbʼaanu li Jehobʼa re naq ebʼ laj judiiy inkʼaʼ teʼxuwaq aʼan xjultikankil naq li xnawom ut li xwankil maajunwa t-osoʼq. Li Jehobʼa kixye rehebʼ naq teʼiloq saʼ choxa ut kixjultika rehebʼ naq moko kaʼaj tawiʼ kixyobʼtesi ebʼ li chahim, naxnaw ajwiʼ li xkʼabʼaʼ li junjunq (Is. 40:25-28). Joʼkan naq chʼolchʼo naq naxnaw ajwiʼ li xkʼabʼaʼ ebʼ laj kʼanjel chiru. Ut wi kiwank xwankil re xyobʼtesinkilebʼ li chahim, wank ajwiʼ xwankil re xtenqʼankil li xtenamit. Joʼkan naq moko wank ta xyaalal re naq ebʼ laj judiiy teʼxuwaq.
15. Kʼaru kixye li Jehobʼa naq tento tixbʼaanu li xtenamit naq twulaq li kutan naq teʼelq Babilonia?
15 Li Jehobʼa kixye ajwiʼ rehebʼ laj judiiy kʼaru teʼxbʼaanu naq twulaq li hoonal naq teʼelq Babilonia. Saʼ li tasal rubʼelaj re li hu Isaías, kixye re li tenamit: «Okan saʼ laamuhebʼaal ut tzʼap li okebʼaal chawix. Chamuq aawibʼ jun kʼamokaq tojaʼ re naq taanumeʼq xjosqʼil li Qaawaʼ» (Is. 26:20). Maare ebʼ laj judiiy keʼxkʼam rehebʼ rikʼin li aatin aʼin naq li awabʼej Ciro kirechani li tenamit Babilonia. Laj Jenofonte, jun li winq aj griego li naxtzʼil rix li kikʼulmank chaq junxil, kixye naq saʼ li hoonal naq laj Ciro kiʼok Babilonia, kixye rehebʼ laj puubʼ naq «teʼxkamsi li moko wankebʼ ta [saʼ rochoch]» (Ciropedia, traducción de Ana Vegas Sansalvador). Kʼajoʼ tana keʼxuwak ebʼ laj Babilonia! Abʼanan ebʼ laj judiiy keʼkoleʼk xbʼaan naq xeʼxpaabʼ li kixye li Jehobʼa.
16. Kʼaʼut inkʼaʼ tooxuwaq naq tqakʼoxla rix li nimla rahilal? (Chaawil li jalam u).
16 Kʼaru naqatzol? Chi seebʼ ttiklaaq li nimla rahilal ut naq ttiklaaq ebʼ li kristiʼaan moko teʼxnaw ta kʼaru xbʼaanunkil ut yooqebʼ xxiw. Abʼan laaʼo inkʼaʼ, xbʼaan naq naqanaw naq li Jehobʼa aʼan li Qayos. Inkʼaʼ tooxuwaq xbʼaan naq naqanaw naq «ak xnachʼok chaq» li qakolbʼal (Luc. 21:28). Ut junelik tqakʼojobʼ qachʼool rikʼin li Jehobʼa usta jun chʼuut chi tenamit tooxrahobʼtesi. Li Jehobʼa tixkʼe qanaʼlebʼ ut troksi ebʼ li ánjel re qakolbʼal. Kʼaru troksi li Jehobʼa re xyeebʼal qe li tqabʼaanu? Toj maajiʼ naqanaw. Maare troksi ebʼ li chʼuut re xyeebʼal qe kʼaru tento tqabʼaanu. Maare ebʼ li chʼuut aʼanaqebʼ li muhebʼaal bʼarwiʼ tqataw li kolbʼa ibʼ. Wi naqaj naq kawresinbʼilaqo aajel ru naq nachʼ toowanq rikʼinebʼ li hermaan, tooʼabʼinq chiru li naʼlebʼ li naxkʼe li xmolam li Jehobʼa ut chʼolchʼooq chiqu naq li Jehobʼa nabʼeresink re li xtenamit (Heb. 10:24, 25; 13:17).
Xkʼoxlankil naq li Jehobʼa nim xwankil tooxtenqʼa re naq inkʼaʼ tooxuwaq chiru li nimla rahilal. (Chaawil li raqal 16).b
17. Kʼaru tatruuq xbʼaanunkil re xtawbʼal li kʼojobʼank chʼoolej li naxkʼe li Jehobʼa?
17 Usta chʼaʼaj li xwanjikebʼ laj judiiy li wankebʼ Babilonia, li Jehobʼa junelik kixkʼojobʼ xchʼoolebʼ ut joʼkan ajwiʼ tixbʼaanu qikʼin. Joʼkan naq junelik kʼojobʼ aachʼool rikʼin li Jehobʼa aʼ yaal kʼaru tkʼulmanq. Jultika naq li Jehobʼa naʼuxtaanank u. Misach saʼ aachʼool laawoybʼenihom. Ut jultika naq li Jehobʼa aʼan Laayos, xbʼaan aʼin maakʼaʼ taaxuwa.
BʼICH 3 Nakaakʼojobʼ ut nakaakawubʼresi linchʼool
a Xjalmank wiibʼ oxibʼ li kʼabʼaʼej.
b XCHʼOLOBʼANKIL LI JALAM U: Wiibʼ oxibʼ li hermaan chʼutchʼukebʼ. Kʼojkʼo xchʼoolebʼ naq li Jehobʼa wank xwankil ut naru xkolbʼalebʼ laj kʼanjel chiru, maakʼaʼ naxye bʼar wankebʼ.