Kawresi aawibʼ re tzolok

Naq naqatzol li Santil Hu, naqaj naq li tqatzol t-okenq chirix li naqakʼoxla, li naqekʼa ut li naqarahi ru. Naru tqakʼam qe rikʼin laj Esdras, li «kixkʼe xchʼool chi xtzolbʼal li xChaqʼrabʼ li Qaawaʼ» (Esd. 7:10). Kʼaru taabʼaanu re xkʼambʼal aawe rikʼin laj Esdras?

Tijon. Naq toj maajiʼ nakaatikibʼ tzolok, tzʼaama re li Jehobʼa naq tatxtenqʼa re xtawbʼal ru ut xyuʼaminkil li nakaatzol (Sal. 119:​18, 34).

Maanimobʼresi aawankil. Li Yos naxmuq li yaal chiruhebʼ li nekeʼxnimobʼresi xwankil ut li nekeʼxkʼoxla naq inkʼaʼ naʼajmank chiruhebʼ li xtenqʼ re xtawbʼal ru li naxye li Santil Hu (Luc. 10:21). Joʼkan ajwiʼ, mattzolok kaʼajwiʼ re xkʼutbʼal chiruhebʼ li junchʼol joʼkʼihal nakaanaw. Ut wi nakaakʼe reetal naq aajel ru xjalbʼal wiibʼ oxibʼ li naʼlebʼ, maanimobʼresi aawankil ut jal li naʼajmank.

Chaawabʼi jun rehebʼ li qabʼich. Ebʼ li bʼich naxtochʼ qachʼool. Joʼkan naq wi naqabʼi jun li bʼich naq toj maajiʼ naqatikibʼ tzolok, truuq qatenqʼankil re naq tuqtuuq ru qachʼool ut chi joʼkan li tqatzol tixtochʼ qachʼool.