Xeʼxaqabʼaak wiibʼ chik rehebʼ li Nekeʼjolomink re Xmolam li Jehobʼa

SAʼ LI 5 RE OCTUBRE 2024 xkʼemank jun li esil saʼ li chʼutam li nabʼaanumank jun sut chiru li chihabʼ, li hermaan Jody Jedele ut li hermaan Jacob Rumph xeʼxaqabʼaak re wank saʼ xyanqebʼ li Nekeʼjolomink re Xmolam li Jehobʼa. Chiru naabʼal chihabʼ saʼ kabʼichal yookebʼ chaq chi kʼanjelak chi anchalebʼ xchʼool chiru li Jehobʼa.

Li hermaan Jedele xyoʼlaak saʼ Misuri (Estados Unidos). Xtzol li yaal rikʼin li xnaʼ xyuwaʼ ut xeʼwank saʼ jun li teep bʼarwiʼ moko naabʼalebʼ ta laj testiiw re li Jehobʼa. Joʼkan naq kiruuk xnawbʼalebʼ ru li hermaan li nekeʼwulak chi puktesink saʼ li tenamit. Rilbʼal li rahok ut li junajil saʼ xtenamit li Jehobʼa kixbʼaanu naq traj kʼanjelak chiru li Jehobʼa. Xkubʼeek xhaʼ saʼ 15 re octubre 1983. Nawulak chaq chiru li puktesink. Ut naq xraqeʼk chi tzolok saʼ li eskuʼeel, kiʼok joʼ aj kʼamolbʼe saʼ li puktesink saʼ septiembre 1989.

Naq toj kachʼinaqebʼ chaq, rochbʼeen li ranabʼ nekeʼkʼameʼk xbʼaan li xnaʼ xyuwaʼ saʼ Betel. Aʼin xbʼaanu naq saʼ xkabʼichalebʼ xeʼraj kʼanjelak saʼ Betel. Ut saʼ xnumikebʼ li chihabʼ xeʼok chi kʼanjelak aran. Saʼ septiembre 1990 li hermaan kiʼok chi kʼanjelak saʼ Betel re Wallkill. Xbʼeenwa xkʼanjelak saʼ xyanqebʼ li nekeʼril li saabʼesink moqon chik kiwank saʼ xyanq li chʼuut li nekeʼbʼanok saʼ Betel.

Saʼebʼ li kutan aʼan wankebʼ li chʼuut re kaxlan aatin li moko najt ta chixkʼatq Betel aran naʼajmank xtenqʼ ebʼ li hermaan winq. Ut li hermaan Jedele kiʼok chi tenqʼank saʼ jun rehebʼ li chʼuut aʼan ut xtzolbʼal li kaxlan aatin. Moqon kixnaw ru li xDámaris jun aj kʼamolbʼe saʼ li puktesink. Chirix aʼan xeʼsumlaak ut xeʼok chi kʼanjelak saʼ Betel.

Saʼ 2005 xeʼelk saʼ Betel re rilbʼal li xnaʼ li hermaan Jedele ut rilbʼal li xnaʼ xyuwaʼ li xDamaris. Saʼ li hoonal aʼan xeʼkʼanjelak joʼ aj kʼamolbʼe saʼ li puktesink ut li hermaan Jedele kiwank naabʼal sut joʼ aj kʼutunel saʼ li tzolok choʼq rehebʼ laj kʼamolbʼe saʼ li puktesink. Kikʼanjelak ajwiʼ saʼ li chʼuut li naʼulaʼanink bʼanlebʼaal ut saʼ li chʼuut li naril li kʼanjel re kabʼlak li wank saʼ li teep bʼarwiʼ wankebʼ.

Saʼ 2013, xeʼbʼoqeʼk wiʼ chik Betel, abʼan re tenqʼank chi xkabʼlankil Betel saʼ Warwick. Chalen chaq aran xeʼkʼanjelak ajwiʼ saʼ Patterson ut saʼ Wallkill. Li hermaan Jedele kikʼanjelak saʼ xyanqebʼ li nekeʼril li kabʼlak ut li xyiibʼankil ut saʼ xyanqebʼ li nekeʼxkʼe resil li bʼanlebʼaal re li nimla molam. Saʼ marzo 2023 kixaqabʼaak saʼ xyanqebʼ li natenqʼank saʼ li chʼuut li naril li puktesink. Naq naxjultika chixjunil li kʼanjel li ak xbʼaanu chaq, naxye: «Wank sut naq naqakʼul junaq li akʼ kʼanjel, naxkʼe qakʼaʼuxl ut nachʼaʼajkoʼk chiqu. Abʼan, saʼebʼ li hoonal aʼan aajel ru xjultikankil naq qʼaxal wank xwankil xkʼojobʼankil qachʼool rikʼin li Jehobʼa xbʼaan naq aʼan naxbʼaanu li naraj».

Li hermaan Rumph kiyoʼlaak saʼ li tenamit California (Estados Unidos). Naq toj kachʼin chaq, li xnaʼ xkanabʼ xik saʼ li chʼutam. Abʼanan kixyal xqʼe chi xkʼutbʼal chiru li yaal. Rajlal chihabʼ li hermaan Rumph narulaʼani chaq li xnaʼchin li tiik xchʼool chiru li Jehobʼa ut aʼan kitenqʼank re, re naq traj xnawbʼal xkomon li yaal. Naq wank chaq 13 chihabʼ re kixpatzʼ xtzolbʼal chirix li Santil Hu. Ut kikubʼeek xhaʼ saʼ 27 re septiembre 1992. Moqon li xnaʼ kiʼok wiʼ chik chi xik saʼebʼ li chʼutam. Ut chixjunil li xjunkabʼal xeʼok chi kʼiik saʼebʼ li xpaabʼal, ut xeʼxsubʼ ribʼ saʼ haʼ.

Naq toj saaj chaq li hermaan Rumph kixkʼe reetal naq ebʼ laj kʼamolbʼe saʼ li puktesink sahebʼ saʼ xchʼool. Joʼkan naq, naq xraqeʼk chi tzolok saʼ li tzolebʼaal, kiʼok joʼ aj kʼamolbʼe saʼ li puktesink saʼ septiembre 1995. Chiru li chihabʼ 2000, xqʼaxonk saʼ li tenamit Ecuador, bʼarwiʼ naʼajmank naabʼal ebʼ laj puktesinel. Aran kixnaw ru li xʼInga jun aj kʼamolbʼe saʼ li puktesink re Canadá, moqon chik xeʼsumlaak. Naq xeʼsumlaak xeʼkanaak chi kʼanjelak saʼ jun tenamit re Ecuador bʼarwiʼ wank wiibʼ oxibʼ aj puktesinel anaqwan li chʼuut aʼin kawebʼ chik saʼ xpaabʼal.

Moqon chik xeʼxaqabʼaak chi kʼanjelak joʼ li nekeʼroksi chixjunil li xhoonal saʼ li puktesink ut xeʼwank joʼ li nekeʼulaʼanink chʼuut. Saʼ li 2011 xeʼbʼoqeʼk saʼ li Tzolok re Galaad ajl 132. Ut naq xeʼxraq li xtzolbʼal xeʼtaqlaak saʼ jalan jalanq ebʼ li tenamit, xeʼwank chi kʼanjelak saʼ Betel, joʼ aj puktesinel li taqlanbʼilebʼ saʼ jalan chik tenamit ut joʼ li nekeʼulaʼanink chʼuut. Li hermaan Rumph kiwank ajwiʼ joʼ aj kʼutunel saʼ li Tzolok chirix li Xʼawabʼejilal li Yos.

Saʼ xkʼabʼaʼ li COVID-19, xeʼsutqʼiik Estados Unidos. Xeʼbʼoqeʼk re kʼanjelak saʼ Betel re Wallkill, ut li hermaan Rumph kikawresiik re naq twanq saʼ xyanqebʼ li chʼuut li naril li puktesink. Chirix chik aʼan xeʼtaqlaak saʼ li qamolam li wank Ecuador, re kʼanjelak saʼ li chʼuut li naril li qakʼanjel. Saʼ 2023, xeʼtaqlaak Warwick ut saʼ enero 2024 kixxaqabʼaak joʼ aj tenqʼanel saʼ li chʼuut li naril li puktesink. Naq naxjultika li naʼaj bʼarwiʼ xkʼanjelak, naxye: «Moko wank ta xwankil bʼar tookʼanjelaq chiru li Jehobʼa, li wank bʼan xwankil aʼan kʼanjelak rochbʼeenebʼ li hermaan».

Naqoxloqʼi chi tzʼaqal xkʼanjelebʼ li hermaan aʼin, chi kʼajoʼ xsahil qachʼool junelik tqakʼutbʼesi naq qʼaxal naqarahebʼ (Filip. 2:29).