Anihebʼ li Nekeʼjolomink re Xmolam li Jehobʼa?

Li Nekeʼjolomink re Xmolam li Jehobʼa, aʼanebʼ jun chʼuut aj paabʼanel li kawebʼ saʼ xpaabʼal ut nekeʼxbʼeresi li kʼanjel li nekeʼxbʼaanu ebʼ laj testiiw re li Jehobʼa. Wiibʼ ru li xkʼanjelebʼ:

• Nekeʼxkʼubʼ li naʼlebʼ li t-elq saʼebʼ li tasal hu, saʼebʼ li chʼutam ut saʼ li tzolok rehebʼ laj testiiw re li Jehobʼa (Lucas 12:42).

• Nekeʼxbʼeresi li xkʼanjel rehebʼ laj testiiw re li Jehobʼa saʼ chixjunil li ruuchichʼochʼ. Aʼin naraj xyeebʼal naq nekeʼxbʼeresi li puktesink ut nekeʼril naq t-oksimanq chiʼus li tenqʼ tumin li nakʼulmank.

Li Nekeʼjolomink re Xmolam li Jehobʼa nekeʼxkʼam re «rikʼinebʼ li apóstol ut ebʼ li cheekel winq» li xeʼwank Jerusalén. Ebʼ aʼan keʼxxaqabʼ li naʼlebʼ li wank xwankil saʼ xkʼabʼaʼ li chʼuut (Hechos 15:2, Li Santil Hu, Sociedad Bíblica de Guatemala, SBG). Ebʼ li Nekeʼjolomink re Xmolam li Jehobʼa moko nekeʼxkʼoxla ta naq ebʼ aʼan aj echal re li molam, joʼ ajwiʼ ebʼ li apóstol moko xeʼxkʼoxla ta aʼin. Junelik nekeʼxsikʼ xtenqʼ saʼ li Santil Hu ut chʼolchʼo chiruhebʼ naq li Jehobʼa kixxaqabʼ li Jesús joʼ xjolomil li molam (1 Corintios 11:3; Efesios 5:23).

Anihebʼ li wankebʼ saʼ li chʼuut li Nekeʼjolomink re Xmolam li Jehobʼa?

Li Nekeʼjolomink re Xmolam li Jehobʼa aʼanebʼ aʼin: laj Kenneth Cook, alalbʼej, laj Gage Fleegle, laj Samuel Herd, laj Geoffrey Jackson, laj Jody Jedele, laj Stephen Lett, laj Gerrit Lösch, laj Jacob Rumph, laj Mark Sanderson, laj David Splane ut laj Jeffrey Winder. Chixjunilebʼ nekeʼkʼanjelak saʼ li qanimla molam re Warwick (Nueva York).

Chanru kʼubʼkʼukebʼ li Nekeʼjolomink re Xmolam li Jehobʼa?

Ebʼ li Nekeʼjolomink re Xmolam li Jehobʼa keʼxxaqabʼ waqibʼ li chʼuut re rilbʼal li qakʼanjel ut ebʼ aʼan nekeʼtzʼaqonk saʼ jun malaj wiibʼ rehebʼ li chʼuut aʼin.

• Li chʼuut li naril li chaqʼrabʼ ut li rahilal. Nakʼanjelak naq nekeʼkʼameʼk laj Testiiw chiru chaqʼrabʼ xbʼaan li xpaabʼal, naq nakʼulmank junaq li rahilal ut naq nekeʼrahobʼtesiik ut inkʼaʼ nekeʼxkanabʼ naq teʼxyuʼami li xpaabʼal.

• Li chʼuut li naril li wankebʼ Betel. Nekeʼxkʼe rehebʼ li nekeʼkʼanjelak saʼebʼ li qamolam li naʼajmank chiruhebʼ.

• Li chʼuut li naril ebʼ li hu. Wank saʼ ruqʼ risinkil ut xjekʼinkil ebʼ li qatasal hu, xkabʼlankil ebʼ li Chʼutlebʼaal Kabʼl, li ochoch re jalok aatin ut ebʼ li qamolam.

• Li chʼuut li naril li puktesink. Naxbʼeresi li kʼanjel re xpuktesinkil «li chaabʼil esilal» chirix li Xʼawabʼejilal li Yos (Mateo 24:14, SBG).

• Li chʼuut li naril li natzolmank. Naxkawresi li naʼlebʼ li ttzolmanq saʼebʼ li chʼutam, saʼebʼ li tzolok ut li t-elq saʼ xyaabʼ kuxej ut bʼideo.

• Li chʼuut li naril li naxkawresi li qapaabʼal. Nekeʼxkʼubʼ ut nekeʼxkawresi li naʼlebʼ li t-elq saʼebʼ li junjunq chi tasal hu, li wank saʼ li qanaʼaj saʼ internet ut nekeʼril li kʼanjel re jalok aatin.

Ebʼ li Nekeʼjolomink re Xmolam li Jehobʼa moko kaʼaj tawiʼ nekeʼkʼanjelak saʼebʼ li chʼuut aʼin, rajlal xamaan nekeʼxchʼutubʼ ribʼ re rilbʼal li naʼajmank saʼ li molam. Saʼebʼ li chʼutam aʼin, nekeʼxtzʼil rix li Santil Hu ut nekeʼxkanabʼ naq li xsantil musiqʼej li Yos tbʼeresinq rehebʼ. Chixjunilebʼ nekeʼxkʼulubʼa li tbʼaanumanq (Hechos 15:25).

Ebʼ li nekeʼtenqʼank re li Nekeʼjolomink re Xmolam li Jehobʼa

Wankebʼ li hermaan li kawebʼ saʼ xpaabʼal ut kawresinbʼilebʼ re tenqʼank saʼebʼ li junjunq chi chʼuut xxaqabʼanbʼil xbʼaan li Nekeʼjolomink re Xmolam li Jehobʼa (1 Corintios 4:2). Ebʼ li hermaan aʼin, rajlal xamaan nekeʼxchʼutubʼ ribʼ rikʼin li chʼuut li nekeʼkʼanjelak wiʼ. Usta inkʼaʼ nekeʼxxaqabʼ li tbʼaanumanq, nekeʼxye li nekeʼxkʼoxla ut nekeʼtenqʼank re naq t-uxmanq li kixaqabʼaak xbʼaan li chʼuut ut rajlal nekeʼril chanru yook chi elk li kʼanjel. Wank sut li Nekeʼjolomink re Xmolam li Jehobʼa nekeʼxtaqla ebʼ li nekeʼtenqʼank rehebʼ chi rulaʼaninkil ebʼ laj Testiiw saʼ jalan jalanq chi tenamit malaj teʼtzʼaqonq saʼebʼ li chʼutam joʼ li naʼuxmank rajlal chihabʼ ut naq naraqmank li tzolok re Galaad.