«Ma juntaq’eetaq li xwanjikeb’ li kristi’aan sa’ junaq kutan?»
Sa’ chixjunil li Ruuchich’och’ eb’ li poyanam neke’xmululi rib’ xb’aan naq q’axal terto chixjunil. Li COVID-19 kixb’aanu naq tnumtaaq wi’ chik a’in ut kixyoob’ xjosq’ileb’ li poyanam. Jo’kan ajwi’ li tz’apam, naq xmaak’a’o’k li tzekemq ut naq xch’a’ajko’k xik sa’ li b’anleb’aal, naxk’utb’esi naq moko juntaq’eet ta na’ilmank li neb’a’ rik’in li b’ihom.
Ma t-oso’q sa’ junaq kutan li ch’a’ajkilal chirix li tumin, li naxk’am chaq rahilal sa’ xb’eeneb’ li poyanam? Jo’kan. Li Santil Hu naxch’olob’ li tixb’aanu li Yos re xtuqub’ankil ru chixjunil eb’ li ch’a’ajkilal a’in.
Eb’ li ch’a’ajkilal chirix li tumin li tixtuqub’ ru li Yos
Li ch’a’ajkilal: Eb’ li kristi’aan maaji’ neke’ruuk roksinkil chi’us li tumin re xchaab’ilob’resinkil ru li xwanjikeb’.
Li xtuqub’ankil ru: Li Yos tixsacheb’ ru li awab’ej ut tixxaqab’ li X’awab’ejilal sa’ xna’ajeb’, li nawb’il ru jo’ li X’awab’ejilal li Yos. Li Awab’ejilal a’in li wank sa’ choxa tixjolomi chixjunil li Ruuchich’och’ (Daniel 2:44; Mateo 6:10).
Li rusilal: Sa’ xk’ab’a’ naq li X’awab’ejilal li Yos tixjolomi chixjunil li Ruuchich’och’, tixb’aanu chi tz’aqal re ru. Xb’aan a’in, eb’ li poyanam ink’a’ chik te’xnumsi li neb’a’il chi moko te’oq xk’a’uxeb’ chirix li tumin. (Salmo 9:7-9, 18). Te’xyal xsahil li xk’anjeleb’, twanq rusilal xyu’ameb’ ut sahaqeb’ xch’ool rochb’eneb’ li xjunkab’al. Sa’ li Santil Hu naqataw li yeechi’om a’in: «Eb’ li poyanam te’kab’laq ut te’wanq chisa’; te’awq uub’ ut te’xtzeka li ru. Moko te’kab’laq ta ut jalan ta chik taawanq chisa’, chi moko te’awq ut jalan chik taayaloq xsahil li ru» (Isaías 65:21, 22, Li Santil Hu, Sociedad Bíblica de Guatemala, SBG).
Li ch’a’ajkilal: Eb’ li poyanam maak’a’ neke’ruuk xb’aanunkil rik’in junjunq eb’ li na’leb’ li naxk’am chaq rahilal sa’ xb’eeneb’ ut naxram chiruheb’ xtawb’al li na’ajmank sa’ li xyu’am.
Li xtuqub’ankil ru: Li Yos troksi li X’awab’ejilal re xsachb’al chixjunil li naxk’e xxiw li poyanam re naq sa chik te’wanq.
Li rusilal: Li Yos trisi chixjunil li rahilal li naxmaq’ chiruheb’ li poyanam ut li xjunkab’al li na’ajmank sa’ xyu’ameb’. Jo’ eetalil, maajun sut chik twanq li yalok u, ink’a’ chik tmaak’a’o’q li tzekemq ut maak’a’aq chik li nimla yajel (Salmo 46:9; 72:16; Isaías 33:24). Li Yos naxye: «Lintenamit taahilanq sa’ tuqtuukilal ut maak’a’ taach’i’ch’i’inq reheb’ sa’eb’ li ochoch wanqeb’ wi’» (Isaías 32:18, SBG).
Li ch’a’ajkilal: Rajlal, eb’ li poyanam li neke’xk’oxla rib’ xjunes ut neke’xrahi ru li b’ihomal neke’numtaak sa’ xb’eeneb’ li junch’ol.
Li xtuqub’ankil ru: Li te’wanq rub’el li X’awab’ejilal li Yos, te’xtzol xsik’b’al li us cho’q reheb’ li junch’ol maawa’ cho’q reheb’ xjunes (Mateo 22:37-39).
Li rusilal: Naq li X’awab’ejilal li Yos tixjolomi li Ruuchich’och’, chixjunileb’ te’xk’utb’esi li xrahom li Yos, li «ink’a’ naxsik’ li xchaab’ilal xjunes» (1 Corintios 13:4, 5) Li Santil Hu naxye: «Sa’ chixjunil linsantil tzuul maajun taab’aanunq maa’usilal malaj taarahob’tesinq ras riitz’in, xb’aan naq chixjunileb’ te’xnaw chik ru li Qaawa’a jo’ naq li ha’ naxtamresi li palaw» (Isaías 11:9, SBG).
Li Santil Hu naxye naq wanko sa’ roso’jik li ruuchich’och’ a’in ut naq chi seeb’ ttz’aqloq ru li xyeechi’om li Yos re xsachb’al eb’ li ch’a’ajkilal chirix li tumin (Salmo 12:5).b Usta toj maaji’ natz’aqlok ru a’in, eb’ li na’leb’ li wank sa’ li Santil Hu naru nokooxtenq’a anaqwan re xq’axb’al ru li ch’a’ajkilal awe’. Chaawil eb’ li na’leb’ «Chanru tqak’os b’ayaq li qasachom» ut «Miqak’e naab’al xwankil li tumin».
a Li Santil Hu naxye naq li xk’ab’a’ li Yos a’an Jehob’a (Salmo 83:18).
b Wi taawaj xnawb’al k’a’ut naru taak’ojob’ aach’ool rik’in li Santil Hu, chaawilaq li na’leb’ «Li Santil Hu naxye li yaal».