Ebʼ laj paabʼanel ut li yalok u | Kʼaru naxye li Santil Hu?

Joʼ ak xqil li yalok u saʼ li tenamit Ucrania naxkʼutbʼesi chi tzʼaqal re ru naq ebʼ li nekeʼkʼamok bʼe saʼ li bʼalaqʼil paabʼal nekeʼokenk saʼ li yalok u. Tqakʼe reetal chanru ebʼ li nekeʼkʼamok bʼe saʼ li bʼalaqʼil paabʼal nekeʼokenk saʼ kaʼpakʼal:

• Laj Epifanio I re Kiev li nakʼamok bʼe saʼ li iklees, kixye: «Naqaj xbʼanyoxinkil rehebʼ ut xkʼebʼal xloqʼal chixjunilebʼ li nekeʼokenk chi xkolbʼal li xtenamit chiruhebʼ li xikʼ nekeʼilok re [...]. Junelik tqatenqʼahebʼ ut tootijoq chirixebʼ» (The Jerusalem Post, 16 re marzo 2022).

• «Saʼ li domingo aʼin, li nakʼamok bʼe saʼ li Iklees ortodoxa re li tenamit Rusia kixkʼe jun li miix choʼq rehebʼ li soldaad re li tenamit Rusia bʼarwiʼ kixtzʼaama rehebʼ naq teʼxkol li tenamit, «joʼ chanru xeʼkʼuteʼk chiru» ut li tenamit Moscú toj yook xyalbʼal xqʼe chi yalok rikʼin li tenamit Ucrania» (Reuters, 3 re abril 2022).

Ma tento raj teʼokenq ebʼ laj paabʼanel saʼ li yalok u? Kʼaru naxye li Santil Hu?

Li naxye li Santil Hu

Li Santil Hu naxye naq chixjunilebʼ li nekeʼtaqenk re li Jesukriist inkʼaʼ nekeʼokenk saʼ li yalok u.

• «Kʼe wiʼ chik laachʼiichʼ saʼ xnaʼaj, xbʼaan naq chixjunilebʼ li teʼxchap xchʼiichʼ, chi chʼiichʼ ajwiʼ teʼosoʼq» (Mateo 26:52, Li Santil Hu, Sociedad Bíblica de Guatemala, SBG).

  Wi junaq li kristiʼaan naxkʼulubʼa li yalok u malaj naʼokenk chisaʼ, ma relik chi yaal yook xpaabʼankil li kixye li Jesús?

• «Jun akʼ chaqʼrabʼ ninkʼe eere: naq chera eeribʼ cheribʼil eeribʼ. Joʼ naq xexinra laaʼin, joʼkan ajwiʼ naq chera eeribʼ cheribʼil eeribʼ. Rikʼin aʼin chixjunilebʼ teʼnawoq re naq laaʼex intzolom: wi nekera eeribʼ cheribʼil eeribʼ» (Juan 13:34, 35, SBG).

  Wi junaq li kristiʼaan naʼokenk saʼ junaq li yalok u, ma relik chi yaal yook xkʼutbʼesinkil li rahok li kixye li Jesús naq tkʼutbʼesinq re naq aʼanebʼ li xtzolom?

Re xnawbʼal xkomon, chaawil li naʼlebʼ «Ma naxchap ribʼ li paabʼal rikʼin li yalok u?».

Ebʼ laj paabʼanel saʼebʼ li qakutan ut li yalok u

Ma wank tawiʼ xwankil naq ebʼ laj paabʼanel saʼebʼ li qakutan inkʼaʼ teʼokenq saʼ li yalok u? Heeheʼ. Li Santil Hu kixye naq saʼebʼ li qakutan twanq jun li qʼehil li tkʼabʼaʼiiq li rosoʼjikebʼ li kutan bʼarwiʼ ebʼ li kristiʼaan re chixjunil li tenamit inkʼaʼ chik «teʼxkawresi ribʼ re yalok» joʼ kixye li Jesús (Isaías 2:2, 4, SBG).

• Re xnawbʼal xkomon, chaawil ebʼ li naʼlebʼ saʼ li hu Laj Kʼaakʼalehom «Kʼaru naxkʼoxla li Yos chirix li yalok u?», maakʼaʼ saʼ qʼeqchiʼ.

Chi seebʼ li Jehobʼa,a «li Yos li nakʼehok li tuqtuukil usilal» troksi li Xʼawabʼejilal li wank saʼ choxa re xkolbʼalebʼ li kristiʼaan «saʼ li raasa ut li rahobʼtesiik» (Filipenses 4:9, SBG; Salmo 72:14, SBG).

• Re rilbʼal chanru tixbʼaanu, chaawil li bʼideo Kʼaru tzʼaqal Xnimajwal Awabʼejilal li Yos?