Ma li Yos kixyobʼtesi laj Tza?

Li naxsume li Santil Hu

Li Santil Hu naxkʼut naq li Yos inkʼaʼ kixyobʼtesi laj Tza, kixyobʼtesi bʼan jun li ánjel li maakʼaʼ xmuxul li kixkʼe ribʼ choʼq aj Tza. Naq li Santil Hu naʼaatinak chirix li Yos naxye: «Aʼan li qaSaqoonak; tzʼaqal re ru joʼnimal naxbʼaanu; chixjunil li xkʼuubʼahom [...] tiikilal. Aʼan jun Yos tiik xchʼool, li inkʼaʼ nabʼalaqʼik» (Deuteronomio 32:3-5, Li Santil Hu, Sociedad Bíblica de Guatemala, SBG). Joʼ naxkʼut li raqal, laj Tza jun chaabʼil ánjel naq kiwank chaq saʼ xtiklajik, kixbʼaanu li tiikilal ut wank chaq joʼ jun rehebʼ li ralal xkʼajol li Yos aran saʼ choxa.

Li Jesús kixye naq laj Tza «inkʼaʼ kixkuy wank saʼ li yaal», aʼin naxkʼut naq kiwank xqʼehil naq xwank chaq saʼ tiikilal ut maakʼaʼ xqʼabʼankil (Juan 8:44, SBG).

Joʼ keʼxbʼaanu chixjunil li xyobʼtesihom li Jehobʼa, li ánjel li kixkʼe ribʼ choʼq aj Tza kiruuk raj ajwiʼ xkʼoxlankil ma tixbʼaanu li us malaj li inkʼaʼ us. Joʼkan bʼiʼ, naq kixkʼe saʼ li xchʼool xqʼetbʼal ribʼ chiru li Yos ut xqʼunbʼesinkil li xbʼeen winq ut ixq re naq teʼxjunaji ribʼ rikʼin, aran naq kixkʼe ribʼ choʼq aj Tza ut li xkʼabʼaʼ naraj xyeebʼal «aj qʼetol ibʼ» (Génesis 3:1-5; Apocalipsis 12:9).