Ma truuq intenqʼankil li paabʼal, li Yos malaj li Santil Hu re naq sa twekʼa wibʼ saʼ linyuʼam?
Li naxsume li Santil Hu
Heeheʼ. Li Santil Hu, aʼan jun li najteril hu, chisaʼ wank naabʼal li chaabʼil naʼlebʼ, naxsume ebʼ li patzʼom li jwal wankebʼ xwankil ut nokooxtenqʼa chi xtawbʼal xyaalal li qayuʼam. Qilaq wiibʼ oxibʼ rehebʼ li patzʼom aʼin.
Ma wank jun laj Yobʼtesinel? Li Santil Hu naxye naq li Yos kiyiibʼank re chixjunil (Apocalipsis 4:11). Ut saʼ xkʼabʼaʼ naq aʼan kiyobʼtesink qe, naxnaw kʼaru naʼajmank chiqu re naq tqataw rusilal li qayuʼam ut xsahil qachʼool.
Ma naxkʼe xchʼool chiwix li Yos? Li Santil Hu inkʼaʼ naxkʼut naq jwal najt wank li Yos; naxye bʼan naq «moko najt ta wank qikʼin chiqajunjunqal» (Hechos 17:27, Li Santil Hu, Sociedad Bíblica de Guatemala, SBG). Naq wank naqakʼul, naxkʼe xchʼool chiqix ut naraj naq us toowanq saʼ li qayuʼam (Isaías 48:17, 18; 1 Pedro 5:7).
Chanru tixkʼe xyaalal li qayuʼam xnawbʼal ru li Yos? Naq li Yos kooxyobʼtesi kixbʼaanu naq tqakʼe reetal naq «naʼajmank li Yos» saʼ li qayuʼam aʼin naraj xyeebʼal naq t-aalaaq saʼ qachʼool xtawbʼal ru li xyaalal ut li rajom li qayuʼam. Ut aʼin naxbʼaanu ajwiʼ naq tqaj xnawbʼal ru laj Yobʼtesinel ut wank choʼq ramiiw (Mateo 4:4). Chʼolchʼo naq li Yos nawulak chiru naq tqakʼe qaqʼe chi xnawbʼal ru, joʼkan naq li Santil Hu naxye: «Jilonqex chi xkʼatq li Yos, ut aʼan taajiloq chekʼatq» (Santiago 4:8, SBG).
Chi miyon ebʼ li poyanam ak xeʼxkʼe reetal naq wank choʼq ramiiw li Jehobʼa kixbʼaanu naq t-usaaq li xyuʼamebʼ ut jwal sahebʼ saʼ xchʼool. Usta yaal naq xnawbʼal ru li Yos inkʼaʼ narisi chixjunil li qachʼaʼajkilal, li chaabʼil naʼlebʼ li wank saʼ li Santil Hu nokooxtenqʼa saʼ li qayuʼam, qilaq wiibʼ oxibʼ li eetalil:
Sa qachʼool saʼ li qajunkabʼal.
Wanko saʼ tuqtuukilal rikʼinebʼ li junchʼol.
Naqanaw xnumsinkil ebʼ li chʼaʼajkilal chirix li rahil chʼoolej, li xmaakʼaʼil li tumin ut li yajel.
Naabʼalebʼ li iklees li nekeʼroksi li Santil Hu inkʼaʼ nekeʼxyuʼami li naxye. Abʼan, li tzʼaqal paabʼal naxyuʼami li naxkʼut chi tzʼaqal li Santil Hu ut aʼin tooxtenqʼa chi xnawbʼal ru chiʼus li Yos.