Ani li Yos?
Naabʼalebʼ nekeʼxye naq nekeʼxpaabʼ li Yos, abʼan, naq napatzʼmank rehebʼ ani aʼan, moko juntaqʼeet ta nekeʼxkʼoxla. Wankebʼ nekeʼxkʼoxla naq li Yos jwal kaw naraqok aatin ut nawulak chiru xkʼebʼalebʼ chi xtojbʼal xmaak ebʼ li qas qiitzʼin. Wankebʼ chik nekeʼxye naq aʼan jun li Yos aj rahonel li junelik naxkuy qamaak maakʼaʼ naxye kʼaru tqabʼaanu. Wankebʼ ajwiʼ nekeʼxkʼoxla naq najt wank ut inkʼaʼ naxkʼe xchʼool chiqix. Saʼ xkʼabʼaʼ naq wank jalan jalanq li kʼaʼuxej chirix aʼin, maare joʼkan naq naabʼalebʼ nekeʼxye naq maajunwa tooruuq xnawbʼal ru li Yos.
Ma wank xwankil xnawbʼal ru li Yos? Joʼkan tzʼaqal. Wi nakaanaw ru chiʼus li Yos, taatzol kʼaru aj e naq wankat arin (Hechos 17:26-28). Naq tatjiloq chixkʼatq li Yos, qʼaxal tatxra ut tatxtenqʼa (Santiago 4:8). Wi taanaw ru chiʼus, naru twanq aayuʼam chi junelik (Juan 17:3).
Chanru tatruuq xnawbʼal ru li Yos? Kʼoxla junaq li poyanam li nakaanaw ru chiʼus, junaq laachaabʼil amiiw. Chanru kikawuuk laaʼamiiwil? Xbʼeenwa xaanaw li xkʼabʼaʼ ut moqon chik chanru li xnaʼlebʼ, li nawulak chiru ut li inkʼaʼ nawulak chiru, li kixbʼaanu chaq ut li traj xbʼaanunkil. Xnawbʼal chixjunil aʼin kixbʼaanu naq tatwanq tzʼaqal choʼq ramiiw.
Joʼkan ajwiʼ, laaʼat tatruuq xnawbʼal ru li Yos wi taatzol chanru xsumenkil ebʼ li patzʼom aʼin:
ANI XKʼABʼAʼ LI YOS?
CHANRU LI YOS?
KʼARU AK KIXBʼAANU?
KʼARU TIXBʼAANU?
CHANRU TATXTENQʼA XNAWBʼAL RU LI YOS?
Li hu aʼin kʼubʼanbʼil re naq taanaw chanru li Santil Hu naxsume ebʼ li patzʼom aʼin. Ebʼ li naʼlebʼ li tqil tatxtenqʼa xnawbʼal ani li Yos ut chanru taataw rusilal wi tatwanq choʼq ramiiw.