Ma naru nikinxtenqʼa li Santil Hu wi nawaj xkamsinkil wibʼ?
Li naxsume li Santil Hu
Naru aatenqʼankil xbʼaan naq aʼan Raatin li Yos ut naxkʼojobʼ xchʼool li ra wankebʼ (2 Corintios 7:6). Usta li Santil Hu moko kitzʼiibʼaak ta re xchʼolobʼankil chanru nakʼanjelak li qakʼaʼuxl, naxwaklesi bʼan xchʼoolebʼ li nekeʼraj xkamsinkil ribʼ ut naxtenqʼahebʼ re naq teʼxjal chanru nekeʼkʼoxlak. Li naʼlebʼ li wank chisaʼ qʼaxal truuq aatenqʼankil.
Ma naʼaatinak li Santil Hu chirixebʼ li kristiʼaan li xeʼraj kamk?
Kʼaru xraqal li Santil Hu truuq aatenqʼankil wi nakaakʼoxla xkamsinkil aawibʼ?
Kʼaru tooruuq xbʼaanunkil wi junaq li qamiiw inkʼaʼ chik naraj wank chi yoʼyo?
Kʼaru xnaʼlebʼ li Santil Hu truuq qatenqʼankil?
● Ye li nakaawekʼa.
Li naxye li Santil Hu: «Li tzʼaqal amiiw junelik narahok; saʼ xqʼehil junaq rahilal tatxtenqʼa joʼ junaq tzʼaqal asbʼej» (Proverbios 17:17, Li Santil Hu, Sociedad Bíblica de Guatemala, SBG).
Li naraj xyeebʼal: Naq wank kʼaru naxkʼe qakʼaʼuxl naʼajmank naq tooʼeʼxtenqʼa.
Abʼan maare sa taawekʼa aawibʼ wi taaye rehebʼ li junchʼol li nakaawekʼa ut aʼin tatxtenqʼa re naq taajal laakʼaʼuxl.
Yal xbʼaanunkil aʼin: Anaqwan ajwiʼ aatinan rikʼin junaq li kristiʼaan, maare junaq laakomon malaj junaq laawamiiw.a Joʼkan ajwiʼ naru taatzʼiibʼa li nakaawekʼa.
● Ayu rikʼin laj bʼanonel.
Li naxye li Santil Hu: «Inkʼaʼ nekeʼraj aj bʼanonel li kawebʼ, aʼebʼ bʼan li yaj nekeʼajok re» (Mateo 9:12, SBG).
Li naraj xyeebʼal: Naq yajo aajel ru naq tooxik rikʼin laj bʼanonel.
Wank sut ebʼ li kristiʼaan li nekeʼraj xkamsinkil ribʼ yajebʼ ut aʼin naxbʼaanu naq inkʼaʼ us teʼkʼoxlaq. Joʼ naq inkʼaʼ nokooxutaanak xyeebʼal naq wank xyajel li qajunxaqalil, inkʼaʼ ajwiʼ tooxutaanaq xyeebʼal naq yaj li qakʼaʼuxl. Ebʼ li yajel aʼin wank xbʼanol.
Yal xbʼaanunkil aʼin: Sikʼ saʼ junpaat xtenqʼ junaq laj bʼanonel li wank xnawom chirix aʼin.
● Misach saʼ aachʼool naq oxloqʼat chiru li Yos.
Li naxye li Santil Hu: «Ma inkʼaʼ tabʼiʼ nakʼayimank oobʼaq li kokʼ xul chi wiibʼ sentaaw? Ut maajun rehebʼ sachso saʼ xchʼool li Yos. [...] Mexxiwak bʼiʼ: qʼaxal terto eetzʼaq chiru naabʼalebʼ li kokʼ xul» (Lucas 12:6, 7, SBG).
Li naraj xyeebʼal: Qʼaxal oxloqʼat chiru li Yos.
Maare nakaawekʼa aawibʼ aajunes, abʼan moko joʼkan ta. Li Yos naxnaw kʼaru yookat xnumsinkil. Usta maare inkʼaʼ chik nakaawaj wank chi yoʼyo, li Yos naxkʼe xchʼool chaawix. Saʼ Salmo 51:19, SBG, naxye naq li Yos inkʼaʼ naxtzʼeqtaana «li nayotʼeʼk xchʼool ut naxkubʼsi ribʼ». Aʼin naxkʼutbʼesi chi tzʼaqal re ru naq li Yos nakatxra ut naraj naq laaʼat yoʼyoqat.
Yal xbʼaanunkil aʼin: Sikʼ ebʼ li naʼlebʼ saʼ li Santil Hu li naxkʼutbʼesi naq li Yos nakatxra. Jun eetalil, tzʼil rix li hu Laj Kʼaakʼalehom Ajl 3, 2018 Ma naxkʼe xchʼool li Yos chaawix?, li wank saʼ jw.org/kek.
● Tijon chiru li Yos.
Li naxye li Santil Hu: «Qʼaxtesihomaq saʼ ruqʼ li Yos chixjunil li kʼaʼuxl wiʼ eechʼool, xbʼaan naq Aʼan naʼilok eere» (1 Pedro 5:7, SBG).
Li naraj xyeebʼal: Li Yos naraj naq taaye re chixjunil li nakaawekʼa ut li naxkʼe aakʼaʼuxl.
Li Yos naru naxkʼe aawe li tuqtuukilal li naʼajmank chaawu ut li metzʼew re naq tat-elq chiʼubʼej (Filipenses 4:6, 7, 13). Chi joʼkaʼin li Yos naxtenqʼahebʼ li nekeʼjilok chixkʼatq (Salmo 55:23).
Yal xbʼaanunkil aʼin: Anaqwan ajwiʼ tijon chiru li Yos. Oksi li xkʼabʼaʼ li Jehobʼa ut ye re li nakaawekʼa (Salmo 83:18, La Biblia. Traducción del Nuevo Mundo, 2019 saʼ español). Tzʼaama re, naq tatxtenqʼa re naq tat-elq chiʼubʼej.
● Naʼlebʼa rix li naxyeechiʼi li Santil Hu choʼq re li kutan chalk re.
Li naxye li Santil Hu: «Li qoybʼenihom, aʼan kamaʼ jun li ankla [...], kaw ribʼ ut inkʼaʼ naʼeekʼank saʼ xnaʼaj» choʼq re li qayuʼam (Hebreos 6:19, SBG).
Li naraj xyeebʼal: Saʼ xkʼabʼaʼ li nakaawekʼa maare junpaat sa taawekʼa aawibʼ ut junpaat inkʼaʼ, chanchanat jun li jukubʼ li yalaq bʼar nakʼameʼk xbʼaan jun li kawil iqʼ. Abʼan li oybʼenihom li naxkʼe li Santil Hu chanchan jun li ankla li truuq aatenqʼankil re naq sa taawekʼa aawibʼ.
Li oybʼenihom aʼin moko yal xrahinkil ta junaq li naʼlebʼ li inkʼaʼ ttzʼaqloq ru, chalenaq bʼan saʼ li xyeechiʼom li Yos naq trisi chixjunil li nokooxrahobʼtesi (Apocalipsis 21:4).
Yal xbʼaanunkil aʼin: Taw xkomon li naʼlebʼ chirix li oybʼenihom li naxkʼe li Santil Hu saʼ li tzolom 5 re li hu Li chaabʼil esil li nachalk rikʼin li Yos.
● Bʼaanu junaq li naʼlebʼ li nawulak chaawu.
Li naxye li Santil Hu: «Li sahil chʼoolej aʼan chanchan li bʼan nakʼehok kawilal» (Proverbios 17:22, SBG).
Li naraj xyeebʼal: Xbʼaanunkil li nawulak chiqu nokooxtenqʼa re naq t-usaaq bʼayaq li qajunxaqalil ut li qakʼaʼuxl.
Yal xbʼaanunkil aʼin: Bʼaanu junaq li naʼlebʼ li ak nakaanaw naq nawulak chaawu. Jun eetalil, abʼi ebʼ li bʼich li naxbʼaanu naq sa taawekʼa aawibʼ, yaabʼasi junaq li naʼlebʼ li tixwaklesi aachʼool malaj sikʼ chanru rajsinkil aawu. Joʼkan ajwiʼ, sa taawekʼa aawibʼ naq taatenqʼahebʼ li junchʼol, usta bʼabʼay ajwiʼ li taabʼaanu (Hechos 20:35).
● Kʼe aachʼool chirix laakawilal.
Li naxye li Santil Hu: «Us naq tqatzol qibʼ chi xchʼolaninkil qibʼ re naq kawaqo» (1 Timoteo 4:8, Li Santil Hu, Wycliffe Bible Translators, Wy. Akʼ tzʼiibʼ).
Li naraj xyeebʼal: Naqataw rusilal naq naqakawresi li qajunxaqalil, nokoowark chiʼus ut naq naqatzeka li tzekemq li naxkawresi li qajunxaqalil.
Yal xbʼaanunkil aʼin: Ayu chi bʼeek usta taabʼaanu kaʼajwiʼ chiru oʼlaju kʼasal.
● Misach saʼ aachʼool naq li nakaawekʼa naru najalaak joʼ li nakʼulmank naq najalaak chixjunil saʼ li qayuʼam.
Li naxye li Santil Hu: «Inkʼaʼ nekenaw kʼaru teekʼul wulaj» (Santiago 4:14, SBG).
Li naraj xyeebʼal: Ebʼ li chʼaʼajkilal li naqakʼoxla naq maajunwa teʼtuqlaaq ru teʼosoʼq ajwiʼ.
Usta qʼaxal chʼaʼaj li yookat xnumsinkil anaqwan, maare wulaj tjalaaq. Joʼkan naq maakanabʼ xyalbʼal aaqʼe (2 Corintios 4:8). Ebʼ li chʼaʼajkilal li naxkʼe aakʼaʼuxl anaqwan saʼ xnumikebʼ li kutan tjalaaq, abʼan maakʼaʼ naru xbʼaanunkil wi taakamsi aawibʼ.
Yal xbʼaanunkil aʼin: Yaabʼasi saʼ li Santil Hu resil xyuʼamebʼ li qas qiitzʼin li xeʼchʼinaak xchʼool ut xeʼraj kamk. Kʼe reetal chanru naq saʼ xnumikebʼ li kutan keʼusaak li xyuʼam, wank sut joʼ inkʼaʼ nekeʼroybʼeni. Kʼe reetal wiibʼ oxibʼ li eetalil chirix aʼin.
Ma naʼaatinak li Santil Hu chirixebʼ li kristiʼaan li xeʼraj kamk?
Heeheʼ. Li Santil Hu naʼaatinak chirix wiibʼ oxibʼ li kristiʼaan li keʼxye naq nekeʼraj kamk. Li Yos inkʼaʼ kipoʼk rikʼinebʼ, kixtenqʼahebʼ bʼan. Aʼan ajwiʼ truuq aatenqʼankil.
Laj Elías
● Ani chaq laj Elías? Usta aʼan chaq jun propeet li maakʼaʼ naxxuwa, wank sut kichʼinaak xchʼool. Saʼ Santiago 5:17, Wy. Akʼ tzʼiibʼ, naxye naq «li propeet Elías, aʼan yal winq joʼ laaʼo».
● Kʼaʼut kiraj kamk? Saʼ jun kutan laj Elías kirekʼa ribʼ xjunes, kixuwak ut kixkʼoxla naq maakʼaʼ naʼok wiʼ. Joʼkan naq kixtzʼaama: «At Qaawaʼ! Us raj wi tinaakʼe chi kamk» (1 Reyes 19:4, SBG).
● Kʼaru kitenqʼank re? Laj Elías kixte xchʼool chiru li Yos ut kixye re kʼaru narekʼa. Chanru kitenqʼaak? Li Jehobʼa kixkʼutbʼesi chiru naq naxkʼe xchʼool chirix ut kixkʼut ajwiʼ chiru li xwankilal. Kixchʼolobʼ ajwiʼ re naq oxloqʼ chiru ut kixkʼe ani t-iloq re.
Yaabʼasi xkomon li naʼlebʼ chirix laj Elías: 1 Reyes 19:2-18.
Laj Job
● Ani chaq laj Job? Aʼan jun winq qʼaxal bʼihom, nim li xjunkabʼal ut junelik kikʼanjelak chiru li Jehobʼa.
● Kʼaʼut kiraj kamk? Laj Job maakʼaʼ saʼ xchʼool naq kichalk naabʼal li rahilal saʼ xbʼeen. Kixtzʼeq chixjunil li xjunkabʼlal, chixjunilebʼ li ralal xkʼajol keʼkamk ut kichapeʼk xbʼaan jun li yibʼ aj yajel. Abʼan moko kaʼaj tawiʼ aʼin kixkʼul, keʼxqʼabʼa naq aʼan wank re naq yook xkʼulbʼal chixjunil aʼin. Laj Job maakʼaʼ chik naraj xnawbʼal chirix li xyuʼam joʼkan naq kixye: «Inkʼaʼ chik nawaj wank chi yoʼyo» (Job 7:16, SBG).
● Kʼaru kitenqʼank re? Laj Job kiʼaatinak rikʼin li Jehobʼa ut kiʼaatinak ajwiʼ rikʼin jalan chik li qas qiitzʼin (Job 10:1-3). Kiwaklesiik xchʼool xbʼaan laj Elihú, li ramiiw, aʼan kitenqʼank re naq jalan tnaʼlebʼaq chirix li yook xkʼulbʼal. Abʼan li qʼaxal wank xwankil aʼan naq laj Job kixkʼulubʼa naq li Yos tbʼeresinq re ut kixkʼulubʼa ajwiʼ li xtenqʼ.
Yaabʼasi xkomon li naʼlebʼ chirix laj Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Laj Moisés
● Ani chaq laj Moisés? Aʼan li kikʼamok bʼe chiru li tenamit Israel ut jun li propeet li maajunwa kixtzʼeqtaana li Yos.
● Kʼaʼut kiraj kamk? Naabʼal li kʼanjel tenebʼanbʼil saʼ xbʼeen laj Moisés, kʼajoʼ naq nekeʼxwechʼ rix joʼkan naq kilubʼk. Joʼkan naq kixtzʼaama re li Yos: «Qʼaxal us naq taawisi linyuʼam» (Números 11:11, 15, SBG).
● Kʼaru kitenqʼank re? Li Yos kixsikʼ ani ttenqʼanq re, re naq chi joʼkan inkʼaʼ chik ttawaaq.
Yaabʼasi xkomon li naʼlebʼ chirix laj Moisés: Números 11:4-6, 10-17.
a Wi inkʼaʼ nakatruuk risinkil saʼ laajolom naq nakaawaj xkamsinkil aawibʼ ut maaʼani junaq laakomon malaj laawamiiw li truuq aatenqʼankil saʼ li hoonal aʼan, naru nakatbʼoqok saʼ li naʼaj bʼarwiʼ nekeʼxtenqʼa li kristiʼaan li naraj xkamsinkil ribʼ.