Li wankebʼ xtumin nekeʼxtenqʼa ebʼ li junchʼol

Ebʼ laj testiiw re li Jehobʼa nekeʼxbʼaanu li kʼanjel ut nekeʼxtaqla li tenqʼ saʼ numenaq 200 chi tenamit ut teep. Abʼan kaʼajwiʼ 35 rehebʼ aʼin nekeʼruuk xtojbʼal li nasachmank saʼebʼ li xchʼuut. Joʼkan naq, kʼaru nakʼulmank saʼebʼ li junchʼol chik chi naʼajej?

Li Nekeʼjolomink re Xmolam li Jehobʼa nekeʼxtzʼil rix li puktesink ut li naʼajmank saʼ li qapaabʼal. Naʼoksimank chi chaabʼil li tenqʼ tumin. Wi jun rehebʼ li qamolam naxkʼul naabʼal li tumin, li xtzʼaqobʼ naxtaqla saʼ jun chik li qamolam li naʼajmank chiru. Rikʼin aʼin nekeʼxkʼam rehebʼ rikʼin li xbʼeen aj paabʼanel. Aʼanebʼ nekeʼroksi li tenqʼ aʼin re xtenqʼankilebʼ li rechpaabʼanel li wankebʼ saʼ rajbʼal ru ut «chi joʼkan juntaqʼeet» wankebʼ (2 Corintios 8:14, Li Santil Hu, Sociedad Bíblica de Guatemala).

Chanru nekeʼrekʼa ribʼ li hermaan li nekeʼxkʼul li tenqʼ li nekeʼxkʼe jun chik li qamolam? Jun eetalil, saʼ Tanzania li xyijachil li tenamit kachʼin chik ma nekeʼxnumsi li kutan rikʼin 2 dólar, kiʼoksimank li tenqʼ tumin re xyiibʼankil li Chʼutlebʼaal Kabʼl li wank Mafinga. Ebʼ li hermaan keʼxye: «Chalen naq keʼxyiibʼ li qachʼutlebʼaal kabʼl, naabʼal chik nekeʼwulak saʼebʼ li chʼutam. Naqabʼanyoxi chiru li xmolam li Jehobʼa ut ebʼ li qahermaan xbʼaan li tenqʼ. Anaqwan saʼ jun li chʼinaʼusil naʼajej naqaloqʼoni ru li Jehobʼa».

Saʼ xkʼabʼaʼ li yajel COVID-19, wankebʼ li qahermaan saʼ Sri Lanka li moko tzʼaqal ta xtzakahemqebʼ. Saʼ xyanqebʼ wank li hermaan Imara Fernando ut laj Enosh, li xchʼina yum. Abʼan, saʼ xkʼabʼaʼ li tenqʼ li nachalk saʼ jalan chik tenamit keʼxkʼul li tenqʼ li naʼajmank chiruhebʼ. Moqon keʼxtzʼiibʼa jun li hu li naxye: «Naqabʼanyoxi chiruhebʼ li qahermaan li xeʼxkʼutbʼesi chiqu li xrahom chiruhebʼ li kutan aʼin. Kʼajoʼ nasahoʼk saʼ qachʼool wank saʼ li junkabʼal aʼin ut yooko chi tijok re naq li Jehobʼa tixtenqʼahebʼ li hermaan saʼ rosoʼjikebʼ li kutan aʼin».

Maakʼaʼ naxye bʼar wankebʼ li qahermaan, chixjunilebʼ sahebʼ saʼ xchʼool chi xwotzbʼal li kʼaru rehebʼ. Jun eetalil, laj Enosh, kixyiibʼ jun li xchʼina kaax re xkʼebʼal chisaʼ li xtenqʼ re xtaqlankil choʼq rehebʼ li junkabʼal li wankebʼ saʼ rajbʼal ru. Li xGuadalupe Álvarez nakʼehok ajwiʼ chi anchal xchʼool. Wank saʼ jun li teep re México bʼarwiʼ li xkʼihalil li poyanam moko rajlal ta nekeʼxkʼul xtojbʼal ut wiibʼ oxibʼ ajwiʼ us bʼayaq xtojbʼalebʼ. Usta joʼkan, aʼan natenqʼank joʼ naxkʼe ribʼ chiru. Li xGuadalupe naxye: «Ninbʼanyoxi chiru li Jehobʼa li xchaabʼilal ut li xrahom. Ninnaw naq li ninkʼe laaʼin ut ebʼ li nekeʼxkʼe li junchʼol tkʼanjelaq chiruhebʼ li hermaan li ra wankebʼ».

Kʼajoʼ nekeʼsahoʼk saʼ xchʼool ebʼ li qamolam chi xtaqlankil li tenqʼ tumin. Laj Anthony Carvalho, li naʼokenk saʼ li chʼuut li naril li qamolam re Brasil, naxye: «Chiru naabʼal chihabʼ jalan chik li molam xooʼeʼxtenqʼa rikʼin tumin. Xbʼaan aʼin li qakʼanjel yook chi kʼiik. Anaqwan nokooruuk chik xtenqʼankilebʼ li qahermaan. Ebʼ li hermaan re Brasil nekeʼxnaw naq li puktesink nabʼaanumank saʼ chixjunil li ruuchichʼochʼ ut nekeʼraj tenqʼank».

Kʼaru teʼxbʼaanu ebʼ laj Testiiw re xtenqʼankilebʼ li xhermaan li wankebʼ saʼ rajbʼal ru? Jwal us naq teʼxkʼe li tenqʼ tumin choʼq re li kʼanjel saʼ chixjunil li ruuchichʼochʼ ut inkʼaʼ xtaqlankil saʼ junaq chik li qamolam. Naru teekʼe li tenqʼ tumin saʼ li kaax li wank saʼ li Chʼutlebʼaal Kabʼl bʼarwiʼ naxye «Li kʼanjel saʼ chixjunil li ruuchichʼochʼ» malaj saʼ donate.jw.org. Qʼaxal loqʼ chixjunil li tenqʼ tumin.