Li tenqʼ li kikʼemank chiru li COVID-19

Saʼ marzo 2020 li nimla molam chirix li kawilal kixye resil li nimla yajel COVID-19, moko naabʼalebʼ ta xeʼxkʼoxla naq li nimla yajel aʼin tixrahobʼtesi chiru numenaq jun chihabʼ ebʼ li kristiʼaan. Saʼ xkʼabʼaʼ li nimla yajel chi miyon ebʼ li kristiʼaan, saʼ xyanqebʼ aʼin wankebʼ naabʼalebʼ laj testiiw re li Jehobʼa li xeʼyajerk, xeʼrahoʼk xchʼool ut xeʼmaakʼaʼoʼk xtumin. Chanru xeʼxkʼubʼ ribʼ ebʼ laj Testiiw re xtenqʼankil ebʼ li rechpaabʼanel saʼ li nimla rahilal aweʼ?

Xeʼtenqʼaak li xeʼxkʼul rahilal

Rikʼin li xtenqʼ li chʼuut li naril li chaqʼrabʼ ut li rahilal re li Nekeʼjolomink re Xmolam li Jehobʼa xkʼubʼamank numenaq 950 li chʼuut re tenqʼank chiru li nimla yajel COVID-19. Wank sut ebʼ li chʼuut xeʼxkʼubʼ tenqʼank saʼebʼ li tenamit ut junchʼol chik ebʼ laj Testiiw xeʼxkʼulubʼa li tenqʼ li xeʼyeechiʼiik re xbʼaanebʼ li awabʼej. Ut joʼkan ajwiʼ ebʼ li chʼuut re tenqʼank xeʼxkʼubʼ ribʼ re tenqʼank chiʼus.

Jun eetalil, qilaq chanru li xwanjikebʼ li qas qiitzʼin re Paraguay. Jun li preens naxye naq saʼ xkʼabʼaʼ li nimla yajel kimaakʼaʼoʼk li xtuminebʼ li kristiʼaan li wankebʼ Paraguay joʼkan naq chʼaʼaj chiruhebʼ xloqʼbʼal xtzekemq. Abʼan li chʼuut li natenqʼank re Paraguay ak kixtikibʼ xjekʼinkil li tzekemq re wiibʼ xamaan. Li karton li xeʼxkʼul maare 30 dólar xtzʼaq, chisaʼ wank li tzekemq, li kʼaʼaq re ru li nakʼanjelak re xsaabʼesinkil li ochoch ut re xsaabʼesinkil ribʼebʼ, aʼin choʼq re li junkabʼal bʼarwiʼ wankebʼ kaahibʼ.

Kʼaru nekeʼxbʼaanu ebʼ laj tenqʼ re xkolbʼal ribʼebʼ chiru li COVID-19 ut re xkolbʼal rix ebʼ junchʼol? Nekeʼroksi li xtzʼapbʼal rehebʼ ut nekeʼxnajtobʼresi ribʼ rikʼinebʼ li poyanam. Nekeʼxkʼe ajwiʼ reetal naq ebʼ li nekeʼxkʼayi li tzekemq nekeʼkʼanjelak saʼ jun li naʼajej li saq ru. Joʼkan ajwiʼ nekeʼril naq ebʼ li nekeʼchʼeʼok re li tzekemq nekeʼroksi li xkolbʼal ribʼebʼ chiru li yajel, nekeʼxmes, nekeʼxsaabʼesi li xbʼelebʼaal chʼiichʼ ut nekeʼxsaabʼesi chiʼus bʼarwiʼ nekeʼxkʼula li tzekemq. Ut li nekeʼxjekʼi li tzekemq moko nekeʼnachʼok ta rikʼinebʼ li hermaan.

Natzʼilmank rix chanru roksinkil chiʼus li tenqʼ tumin

Saʼ enero 2021 li chʼuut li naril li chaqʼrabʼ ut li rahilal xeʼxkʼubʼ roksinkil numenaq 25 miyon chi dólar re xtenqʼankilebʼ li xeʼxkʼul rahilal xbʼaan li COVID-19. Ebʼ li qamolam ut ebʼ li chʼuut re tenqʼank seebʼ xkʼaʼuxebʼ chi roksinkil li tenqʼ ut nekeʼxbʼaanu li wank saʼ ruqʼebʼ re xsikʼbʼal li tzekemq li moko terto xtzʼaq. Jun eetalil, saʼ li tenamit Chile ebʼ li hermaan li kawresinbʼilebʼ re tenqʼank xeʼraj xloqʼbʼal 1,653 liibʼr li kenq. Abʼan li xtzʼaq li kenq kiterqʼuuk chiru jun po. Ebʼ li qechpaabʼanel xeʼxkʼulubʼa xloqʼbʼal li kenq chi terto xtzʼaq. Abʼan wiibʼ hoor xnumik laj kʼay kixye rehebʼ naq jalan chik laj loqʼonel kixqʼaxtesi li ak kixloqʼ. Joʼkan naq laj kʼay kixye rehebʼ naq tixkʼe rehebʼ joʼ chanru kixkʼayi li kenq saʼ li po kinumeʼk, moko terto ta keʼxtoj.

Abʼanan, naq ebʼ li hermaan xkohebʼ xxokbʼal li kenq laj kʼay moko kiraj ta chik xkʼebʼal rehebʼ. Kixqʼabʼaʼebʼ naq moko junaqik ta nekeʼxjekʼi rehebʼ li qas qiitzʼin, nekeʼxbʼaanu bʼan joʼ nekeʼxbʼaanu jalanebʼ chik li chʼuut. Jun li hermaan kitijok saʼ jas ut moqon chik kixye re laj kʼay naq kitzʼilmank rix re xnawbʼal ani naʼajmank naq ttenqʼaaq. Ebʼ li hermaan xeʼxchʼolobʼ ajwiʼ chiru naq kikʼubʼamank li tzekemq kikʼemank ajwiʼ saʼ ajl li xwanjikebʼ li junjunq chi hermaan li yookebʼ xnumsinkil rahilal. Joʼkan naq saʼ li tzekemq li kikʼubʼamank kikʼemank li aajel ru choʼq re li junjunq chi junkabʼal. Ut kiyeemank re naq li tenqʼ ut li tumin li nekeʼxkʼul ebʼ laj testiiw re li Jehobʼa yal nakʼemank chi sibʼil. Joʼkan naq li winq sachso xchʼool kikanaak ut moko kaʼaj tawiʼ kixkʼulubʼa xkʼayinkil rehebʼ, kixsi bʼan rehebʼ 882 liibʼr li kenq saʼ li jun chik po.

«Nekeʼxra ribʼ chi tzʼaqal»

Li xLusu aʼan jun li hermaan li ak cheek chik ut malkaʼan li wank rikʼin oobʼ li xkomon aran Liberia. Saʼ jun eqʼla naq yookebʼ chi waʼak ut xtzʼilbʼal rix li xraqal li Santil Hu re rajlal kutan, li ri li xLusu li wank wuqubʼ chihabʼ re kixkʼe reetal naq maakʼaʼebʼ chik xtzekemq. Joʼkan naq kixye: «Anaqwan kʼaru tqatzeka?». Li xnaʼchin kixkʼojobʼ xchʼool ut kixye re naq ak kitijok chiru li Jehobʼa re xpatzʼbʼal xtenqʼ ut chʼolchʼo chiru naq aʼan tixkʼe rehebʼ li aajel ru. Ut saʼ ajwiʼ li ewu aʼan ebʼ li cheekel winq keʼxbʼoq li xLusu ut xeʼxye re naq naru naxik xxokbʼal bʼayaq xtzekemq. Aʼan naxye: «Li wi naxye naq chʼolchʼo chiru naq li Jehobʼa naxsume li tij xbʼaan naq kixsume lintij».

Jun li ixq li wank República Democrática del Congo ut chixkʼatq wank jun li junkabʼal aj Testiiw. Naq kixkʼe reetal naq ebʼ laj Testiiw yookebʼ xkʼebʼal xtzekemq ebʼ li rechpaabʼanel, kixye: «Naq tnumeʼq li nimla yajel aʼin tooʼoq choʼq aj testiiw re li Jehobʼa xbʼaan naq aʼanebʼ nekeʼxkʼe xchʼool chirixebʼ li rechpaabʼanel naq yookebʼ xnumsinkil junaq li rahilal». Joʼkan naq li xbʼeelom kixye re: «Ma tat-oq choʼq aj testiiw re li Jehobʼa yal xbʼaan jun bʼools chi arros?». Aʼan kixye re: «Inkʼaʼ, moko xbʼaan ta aʼan. Abʼan li bʼools chi arros aʼin naxkʼutbʼesi naq aʼanebʼ nekeʼxra ribʼ chi tzʼaqal».

Saʼ xkʼabʼaʼ li tenqʼ tumin li nekeekʼe, ebʼ laj testiiw re li Jehobʼa xeʼruuk xtenqʼankil saʼ junpaat ebʼ li rechpaabʼanel saʼ li nimla yajel aʼin. Naqabʼanyoxi eere li tenqʼ tumin li nekeekʼe rikʼin ebʼ li naʼlebʼ li wank saʼ donate.jw.org.