Ebʼ li esil li nekeʼxkawresi li qapaabʼal

Joʼ aj testiiw re li Jehobʼa naqakʼe qachʼool chirixebʼ li qechpaabʼanel (1 Pedro 2:17). Naabʼal qe naqekʼa qibʼ joʼ li xTannis, jun li qechpaabʼanel re Kenia. Aʼan naxye: «Jwal nawulak chiwu xnawbʼal li nekeʼxkʼul ebʼ li wechpaabʼanel saʼ chixjunil li ruuchichʼochʼ». Chanru naqanaw li yook chi kʼulmank? Naqanaw saʼ xkʼabʼaʼ li naʼaj «Li esil» li wank saʼ jw.org chalen chaq li chihabʼ 2013.

Saʼ li naʼaj aʼin nakʼemank li esil chirix li kabʼlak, li tenqʼank naq nakʼulmank junaq li rahilal ut jalan chik li kʼanjel li wank xwankil, joʼ naq naʼelk jun li akʼ Santil Hu. Naqataw ajwiʼ esil chirixebʼ li qechpaabʼanel li wankebʼ saʼ tzʼalam saʼ xkʼabʼaʼ li xpaabʼal. Joʼkan ajwiʼ, natawmank resil li xeʼxkʼul li qechpaabʼanel saʼ li nimla kʼanjel chirix li puktesink ut chirix li xnimankil li xkamik li Jesús. Ani nekeʼkʼubʼank re li esil? Ani nekeʼtzʼilok rix ut chanru nekeʼxkawresi ribʼ?

Li naʼlebʼ li inkʼaʼ naʼilmank naq nakʼubʼamank li esil

Li ofisiin li nakʼehok esil aʼan nakʼubʼank re «Li esil». Li ofisiin aʼin wank rubʼel xwankil li chʼuut li naril li chaqʼrabʼ ut li rahilal re li Nekeʼjolomink re Xmolam li Jehobʼa ut nekeʼtenqʼaak xbʼaan numenaq 100 li qechpaabʼanel, naabʼal rehebʼ aʼan nekeʼkʼanjelak saʼebʼ li rochoch. Ebʼ li qechpaabʼanel aʼin nekeʼxtzʼiibʼa, nekeʼxtzʼil rix, nekeʼjalok aatin malaj nekeʼxkʼanjela wiibʼ oxibʼ li eetalil. Nekeʼaatinak ajwiʼ rikʼinebʼ li wankebʼ xwankil, rikʼinebʼ li nekeʼkʼehok esil malaj rikʼinebʼ laj kʼutunel re li nimla tzolebʼaal. Joʼkan ajwiʼ, numenaq 80 ebʼ li naʼaj li nakʼehok esil, li wankebʼ saʼ li qamolam re chixjunil li ruuchichʼochʼ nekeʼtenqʼank saʼ li naʼaj aʼin.

Li ofisiin li nakʼehok esil nakʼanjelak rochbʼenebʼ li kokʼ chʼuut re li nekeʼkʼehok esil re xkʼubʼankil jun akʼ esil. Naq ebʼ li qechpaabʼanel nekeʼrabʼi junaq li naʼlebʼ li teʼruuq xkʼebʼal joʼ esil, nekeʼxtzʼil rix ut nekeʼxchʼutubʼ chixjunil li naʼajmank re naq tzʼaqalaq re ru. Re xbʼaanunkil, maare teʼxbʼaanu wiibʼ oxibʼ li patzʼok ut sumenk malaj teʼaatinaq rikʼin junaq li wank xnawom. Naq ak wank chik chixjunil li naʼlebʼ li naʼajmank, nekeʼxtzʼiibʼa, nekeʼxkʼubʼ ut nekeʼxyiibʼ li naʼajmank. Moqon nekeʼxkʼe ebʼ li jalam u ut nekeʼxtaqla re li chʼuut li naril li chaqʼrabʼ ut li rahilal re naq teʼril ma us.

Nekeʼbʼanyoxink

Kʼaru nekeʼxye li qechpaabʼanel chirix li naʼaj «Li esil»? Li xCheryl, jun li qechpaabʼanel li wank Filipinas, naxye: «Nawulak chiwu xtikibʼankil li kutan rikʼin rilbʼal li esil chirix li qamolam ut chirixebʼ li qechpaabʼanel».

Naabʼalebʼ nekeʼxkʼe reetal li xjalanil li esil li naʼelk saʼ jw.org rikʼin jalan chik ebʼ li esil. Li xTatiana, li wank Kazajistán, naxye: «Jwal oxloqʼ chiwu li esil li wank saʼ jw.org xbʼaan naq tzʼaqal yaal ut paabʼajel. Moko tikʼtiʼ ta li naxye». Li xʼAlma, jun li qechpaabʼanel li wank México, naxye: «Junes yibʼru aj esil li naʼilmank saʼ li kaaxmu, abʼan li esil li wank saʼ li qanaʼaj nawaklesink chʼoolej».

Li naʼaj «Li esil» moko kaʼaj tawiʼ naxye qe li esil chi tzʼaqal re ru, naxkawresi ajwiʼ li qapaabʼal. Laj Bernard, li wank Kenia, naxye: «Bʼanyox re li esil aʼin, anaqwan nekeʼwil chik li wechpaabʼanel joʼ injunkabʼal aʼ yaal bʼar wankebʼ. Naq nintijok ninruuk xyeebʼal re li Jehobʼa li xkʼabʼaʼebʼ ut aatinak rikʼin chirix li naʼajmank chiruhebʼ». Li xBybron, jun hermaan li wank ajwiʼ Kenia, naxye: «Qʼaxal nasahoʼk inchʼool rilbʼal jun li akʼ naʼlebʼ bʼarwiʼ naxye naq xʼisimank saʼ jalan chik aatinobʼaal li Santil Hu! Aʼin naxjultika chiwu naq li Jehobʼa kʼajoʼ naq nokooxra».

Ebʼ li esil chirixebʼ li hermaan li nekeʼrahobʼtesiik xbʼaan li xpaabʼal nawaklesink ajwiʼ chʼoolej. Li xJackline, li wank ajwiʼ Kenia, naxye: «Naʼlebʼak chirix li xkawilalebʼ xchʼool naxkawresi linpaabʼal. Junelik ninsikʼ li naʼlebʼ li kitenqʼank rehebʼ re xkuybʼal. Xintzol ajwiʼ naq ebʼ li naʼlebʼ li kitenqʼank rehebʼ li hermaan re xqʼaxbʼal ru li rahobʼtesink aʼan li tijok, li bʼichank malaj xtzolbʼal li Santil Hu».

Li xBeatriz, jun li hermaan li wank Costa Rica, naxbʼanyoxi li esil li kiʼisimank chirixebʼ li kaqsut-iqʼ ut jalan chik li rahilal: «Li qamolam saʼ junpaat naxtenqʼahebʼ li hermaan li keʼxkʼul rahilal. Chaabʼil ut chi anchalebʼ xchʼool nekeʼxbʼaanu. Aʼin naxkʼutbʼesi chiwu naq aʼin li xmolam li Jehobʼa».

Qʼaxal naqabʼanyoxi naq saʼ jw.org wank li naʼaj «Li esil»! Saʼ xkʼabʼaʼ ebʼ li esil aʼin, naqanaw li nekeʼxkʼul ebʼ li hermaan saʼ chixjunil li ruuchichʼochʼ. Abʼan inkʼaʼ raj tooruuq xnawbʼal aʼin wi inkʼaʼ raj teekʼe li tenqʼ tumin, naabʼal re aʼin nakʼemank saʼ donate.jw.org. Jwal naqabʼanyoxi eere naq nekextenqʼank chi anchal leechʼool.