Jun li tasal hu li jalan chiruhebʼ li junchʼol

Saʼ enero 2021 li Nekeʼjolomink re Xmolam li Jehobʼa kixkʼe resil naq t-elq jun li akʼ tasal hu re xtzolbʼal li Santil Hu li naxkʼabʼaʼi Sahaq laachʼool!a Chanru xaawekʼa aawibʼ naq xaawabʼi li esil aʼin? Laj Matthew, li wank Canadá, naxye li kirekʼa: «Moko ninpaabʼ ta aʼin! Kʼajoʼ kisahoʼk linchʼool naq xwabʼi ebʼ li seeraqʼ ut xwil ebʼ li bʼideo li naxchʼolobʼ kʼaʼut naq xeʼxkʼubʼ li hu aʼin ut chanru kiʼoksimank rikʼin wiibʼ oxibʼ li kristiʼaan. Ak nawaj raj naq twanq wikʼin re rilbʼal ut roksinkil!».

Li hu aʼin naroksi jun akʼ naʼlebʼ re kʼehok tzolom, abʼan moko kaʼaj tawiʼ aʼin li xjalanil rikʼinebʼ li junchʼol chik chi tasal hu. Wi ak wank aawikʼin chi huhil, maare ak xaakʼe reetal naq wank xjalanil. Ma taawaj xnawbʼal kʼaru li xjalanil? Li xjalanil aʼan chanru kʼubʼanbʼil li tasal hu Sahaq laachʼool!

Jun li akʼ tasal hu li jalan chiruhebʼ li junchʼol

Li xpimal li hu. Re xyiibʼankil li hu Sahaq laachʼool!, kiʼajmank jun li hu li jwal pim ru. Kʼaʼut? Saʼ li hu aʼin wank numenaq 600 li jalam u, naxqʼax kachʼin chik ma 10 sut li wank chisaʼ li tasal hu Kʼaru tzʼaqal naxchʼolobʼ li Santil Hu? Joʼkan ajwiʼ, wank li naʼaj bʼarwiʼ maakʼaʼ li aatin ut li jalam u chisaʼ. Ebʼ li wiibʼ chi naʼlebʼ aʼin naxkʼam chaq jun chʼaʼajkilal. Naq jay li hu, wank sut nakʼutunk bʼayaq li jalam u saʼ li jun chik perel. Re naq inkʼaʼ tkʼulmanq aʼin, ebʼ li qechpaabʼanel li nekeʼril li naʼlebʼ li naʼelk chi huhil saʼ Wallkill (Nueva York), keʼroksi kaahibʼ li hu li ak naʼoksimank saʼ li naʼaj bʼarwiʼ naʼisimank chi huhil li hu. Naq ak xbʼaanumank aʼin, li chʼuut li naril li naxkawresi li qapaabʼal re li Nekeʼjolomink re Xmolam li Jehobʼa kixye naq t-oksimanq li hu li moko jay ta ru. Li hu aʼin 16% terto xtzʼaq chiru li naʼoksimank rajlal. Usta joʼkan, aʼin naxbʼaanu naq li nekeʼroksi li tasal hu Sahaq laachʼool!, re tzolok inkʼaʼ teʼxik xchʼool chirix li jalam u li wank saʼ li jun chik perel.

Li rix li hu. Li rix li hu Sahaq laachʼool!, jalan chiruhebʼ li junchʼol chik chi tasal hu xbʼaan naq kiʼoksimank jun li hu li jwal chaabʼil. Moko nalemtzʼunk ta li rix joʼebʼ li junchʼol chik chi tasal hu, re naq chi joʼkan chʼinaʼus t-ilmanq li jalam u. Joʼkan ajwiʼ moko saʼ junpaat ta tpejeʼq usta rajlal naʼoksimank. Abʼanan, li xtzʼaq naru nataqeʼk oobʼ sut chiru li rix li tasal hu li nalemtzʼunk. Joʼkan naq ebʼ li qamolam xeʼkʼanjelak saʼ junajil re xsikʼbʼal li rix li tasal hu li kubʼenaq xtzʼaq.

Joʼkan bʼiʼ, wi terto xtzʼaq, kʼaʼut kiʼoksimank aʼin? Jun li hermaan li nakʼanjelak rikʼinebʼ li nekeʼril li naʼlebʼ li naʼelk chi huhil naxchʼolobʼ chiqu: «Saʼ xkʼabʼaʼ naq li tasal hu aʼin t-oksimanq rajlal, naʼajmank naq tyiibʼamanq chiʼus re naq tixkuy». Laj Eduardo, li nakʼanjelak saʼ li ofisiin li narisi li naʼlebʼ chi huhil saʼ li qamolam re Brasil, naxye: «Naxsahobʼresi li qachʼool xnawbʼal naq li qamolam yook roksinkil li kʼaʼaq re ru li jwal chaabʼil re xyiibʼankil li tasal hu re naq inkʼaʼ tpejeʼq saʼ junpaat ut yook ajwiʼ roksinkil chiʼus li tenqʼ tumin».

Li chʼaʼajkilal li kitawmank xbʼaan li COVID-19

Xqatikibʼ risinkil chi huhil li tasal hu Sahaq laachʼool!, saʼ marzo 2021 naq yook li nimla yajel COVID-19, joʼkan naq xqataw wiibʼ oxibʼ li chʼaʼajkilal. Saʼ xkʼabʼaʼ naq tzʼaptzʼoko, li naʼaj bʼarwiʼ naʼisimank chi huhil ebʼ li hu inkʼaʼ chik kixkʼulubʼa ebʼ li hermaan li nekeʼchalk chi tenqʼank chi moko keʼruuk xbʼoqbʼal jalan chik ebʼ li hermaan re naq teʼchalq Betel. Joʼkan naq, saʼ wiibʼ oxibʼ li naʼaj moko wankebʼ ta naabʼal ebʼ li hermaan re kʼanjelak ut jalan chik ebʼ li naʼaj kitzʼapmank xbʼaan li chaqʼrabʼ li kixkʼe li awabʼej.

Chanru xeʼqʼaxmank ru ebʼ li chʼaʼajkilal? Naq naru chik risinkil li hu chi huhil kipatzʼmank rehebʼ li yookebʼ chi kʼanjelak saʼ jalan chik ebʼ li naʼaj aran Betel naq naru teʼtenqʼanq jarubʼaq kutan re risinkil chi huhil li tasal hu. Laj Joel, li nakʼanjelak rikʼinebʼ li nekeʼril li naʼlebʼ li naʼelk chi huhil, naxye: «Li xchaabʼil naʼlebʼ ut naq nekeʼraj xtzolbʼal akʼ kʼanjel kixbʼaanu naq tooruuq xbʼaanunkil li kʼanjel li wank chiqu».

Usta xtawmank naabʼal li chʼaʼajkilal, ak xʼisimank chi huhil chi miyon ebʼ li tasal hu Sahaq laachʼool!, re xbʼaanunkil aʼin kiʼoksimank naabʼal li kʼaʼaq re ru joʼ li kʼanjelobʼaal re risinkil chi huhil, li rix, li hu, li xbʼonol ut li xlatzbʼal. Saʼ li xbʼeen 5 po naq ak kiʼisimank chi huhil ebʼ li tasal, kisachmank numenaq 2.3 miyon re dólar re xloqʼbʼal li kʼaʼaq re ru. Re naq moko naabʼal ta tsachmanq, kaʼajwiʼ yook chi isimank li tasal hu li aajel ru chiru li chʼuut.

«Chaabʼil chanru kʼubʼanbʼil»

Chanru nekeʼrekʼa ribʼ ebʼ laj kʼutunel ut ebʼ li nekeʼtzolok naq nekeʼroksi li akʼ tasal hu re tzolok? Laj Paul, jun li qechpaabʼanel re Australia, naxye: «Qʼaxal nasahoʼk inchʼool roksinkil li tasal hu aʼin re xtzolbʼalebʼ li kristiʼaan. Jwal chaabʼil xbʼaan naq chisaʼ wank ebʼ li naʼlebʼ chi tzʼaqal re ru, ebʼ li patzʼom, ebʼ li bʼideo, ebʼ li jalam u, li kaaxukuut ut ebʼ li naʼlebʼ li naru naxbʼaanu li yook chi tzolok. Chaabʼil chanru kʼubʼanbʼil, rikʼin nawaj xtzolbʼal wibʼ joʼ jun chaabʼil aj kʼutunel».

Jun li natzolok chirix li Santil Hu li wank Estados Unidos, naxye: «Kʼajoʼ nawulak chiwu li akʼ tasal hu. Ebʼ li jalam u nikineʼxtenqʼa chi xtawbʼal ru li naʼlebʼ li wank xwankil ut ebʼ li bʼideo naxtochʼ inchʼool ut nikineʼxtenqʼa chi xbʼaanunkil li kʼaru nintzol». Li kristiʼaan aʼin nawulak saʼebʼ li chʼutam ut natzolok wiibʼ sut chiru li xamaan.

Toj naʼajmank risinkil chi huhil chi miyon ebʼ li tasal hu saʼ jalan chik ebʼ li aatinobʼaal. Joʼkan naq, li Nekeʼjolomink re Xmolam li Jehobʼa kixkʼulubʼa naq t-isimanq saʼ 710 chi aatinobʼaal, 340 numenaq li xkʼihal chiru li kiʼisimank wiʼ li tasal hu Kʼaru tzʼaqal naxchʼolobʼ li Santil Hu?

Bʼar nachalk li tumin re xbʼaanunkil chixjunil aʼin? Saʼ li tenqʼ tumin li nakʼemank saʼ chixjunil li ruuchichʼochʼ. Naabʼal rehebʼ li tenqʼ aʼin nakʼemank saʼ donate.jw.org. Qʼaxal naqabʼanyoxi leetenqʼ tumin. Xbʼaan aʼin nokooruuk risinkil ebʼ li tasal hu choʼq rehebʼ li qas qiitzʼin li nekeʼraj xnawbʼal ru li Jehobʼa ut xtawbʼal li junelik yuʼam (Salmo 22:27).