Kʼaru naxkʼul junaq li kristiʼaan naq ak kamenaq chik?

Li naxsume li Santil Hu

Li Santil Hu naxye: «Li yoʼyookebʼ nekeʼxnaw naq teʼkamq, aʼut li kamenaqebʼ maakʼaʼ nekeʼxnaw» (Eclesiastés 9:5, Li Santil Hu, Sociedad Bíblica de Guatemala, SBG; Salmo 146:4). Joʼkan naq, naq nakamk junaq li kristiʼaan maakʼaʼ chik nakanaak chi yoʼyo. Ebʼ li kamenaq maakʼaʼ chik nekeʼxkʼoxla, maakʼaʼ chik nekeʼxbʼaanu ut maakʼaʼ chik nekeʼrekʼa.

«Pojtzʼ tatsutqʼiiq wiʼ chik»

Li Yos kixchʼolobʼ re li xbʼeen winq, aʼ laj Adán, li tixkʼul naq tkamq. Naq laj Adán kixqʼet ribʼ, li Yos kixye re: «Pojtzʼ okenaqat chaq ut pojtzʼ tatsutqʼiiq wiʼ chik» (Génesis 3:19, SBG). Maakʼaʼ chaq xyuʼam laj Adán naq toj maajiʼ nayobʼtesiik xbʼaan li Yos «rikʼin xpojtzʼil li chʼochʼ» (Génesis 2:7, SBG). Naq kikamk laj Adán, kisutqʼiik wiʼ chik joʼ pojtzʼ ut maakʼaʼ chik kikanaak chi yoʼyo.

Joʼkan ajwiʼ nakʼulmank saʼebʼ li qakutan. Naq li Santil Hu naʼaatinak chirix ebʼ li kristiʼaan ut ebʼ li xul, naxye aʼin: «Saʼ pojtzʼ elenaqebʼ chixjunil, ut pojtzʼ teʼsutqʼiiq wiʼ chixjunilebʼ» (Eclesiastés 3:19, 20, SBG).

Moko rikʼin ta li kamk naraqeʼk chixjunil

Li Santil Hu rajlal naxjuntaqʼeeta li kamk rikʼin li wark (Salmo 13:4; Juan 11:11-14; Hechos 7:60). Jun li kristiʼaan li kamenaq chi wark inkʼaʼ naxnaw li yook chi kʼulmank saʼ li xsutam. Joʼkan ajwiʼ nakʼulmank rikʼinebʼ li kamenaq, maakʼaʼ chik nekeʼxnaw. Abʼan, li Santil Hu naxkʼut naq li Yos truuq xwaklesinkilebʼ wiʼ chik chi yoʼyo ebʼ li kamenaq ut tixkʼe wiʼ chik xyuʼamebʼ (Job 14:13-15). Moko rikʼin ta li kamk naraqeʼk chixjunil choʼq rehebʼ li teʼwakliiq wiʼ chik chi yoʼyo.