Li Jesus naʼaatinak rikʼin jun li ixq chire li bʼekbʼilhaʼ

Ak xnumeʼk li Paswa naq li Jesus ut ebʼ li xtzolom keʼsutqʼiik Galilea. Naq yookebʼ chi xik keʼnumeʼk Samaria ut keʼkanaak chixkʼatq li tenamit Sicar, saʼ li xbʼekbʼilhaʼ laj Jacob. Li Jesus kikanaak chi hilank aran naq ebʼ li xtzolom xkohebʼ saʼ li tenamit chi xloqʼbʼal li tzakahemq.

Kiwulak jun li ixq chi risinkil xhaʼ, ut li Jesus kixye re: «Kʼe bʼayaq wukʼaʼ». Li ixq kixye re: «Kʼaʼut nakat-aatinak wikʼin wi laaʼin aj Samaria? Ebʼ laj Judiiy inkʼaʼ nekeʼraatina ebʼ laj Samaria». Li Jesus kixye: «Wi nakaanaw raj anihin, taapatzʼ raj aahaʼ we, ut tinkʼe raj aawe xhaʼil li yuʼam». Li ixq kixpatzʼ re: «Kʼaru nakaawaj xyeebʼal? Wi maakʼaʼ rikʼin kʼaru taawisi aahaʼ». Li Jesus kixsume: «Li t-ukʼuq re li haʼ li tinkʼe laaʼin maajunwa chik tchaqiq re». Li ixq kixye: «Kʼe we li haʼ aʼin, qaawaʼ».

Moqon chik, li Jesus kixye: «Bʼoq chaq laabʼeelom». Aʼan kixye: «Maakʼaʼ inbʼeelom». Li Jesus kixye: «Yaal, xbʼaan naq oobʼ aabʼeelom ak xwank ut moko sumsuukat ta rikʼin li winq li wank aawikʼin». Aʼan kixye: «Nawil naq laaʼat propeet. Lintenamit naxye naq tooruuq xloqʼoninkil li Yos saʼ li tzuul aʼin, abʼan ebʼ laj Judiiy nekeʼxye naq kaʼajwiʼ tqaloqʼoni li Yos saʼ Jerusalen. Laaʼin ninkʼoxla naq li Sikʼbʼil Ru tchalq tixkʼut chiqu chanru xloqʼoninkil li Yos». Tojaʼ naq, li Jesus kixye jun li aatin li maajunwa xyehom chaq: «Laaʼin li Sikʼbʼil Ru».

Li ixq xkoho saʼ aanil ut kixye rehebʼ laj Samaria: «Chanchan naq xintaw li Sikʼbʼil Ru. Naxnaw chixjunil linyuʼam. Kimqex ut ilomaq». Joʼkan naq, xkohebʼ rikʼin saʼ li bʼekbʼilhaʼ re rabʼinkil li xkʼutum li Jesus.

Tojaʼ naq, ebʼ laj Samaria keʼxye re li Jesus naq tkanaaq rikʼinebʼ. Ut wiibʼ kutan kikanaak saʼ li tenamit aʼin ut naabʼal li naʼlebʼ kixkʼut chiruhebʼ, ut naabʼalebʼ keʼpaabʼank re. Tojaʼ naq, keʼxye re li ixq: «Anaqwan naq xqabʼi li winq aʼin, chʼolchʼo chiqu naq aʼan tzʼaqal laj kolol re li ruuchichʼochʼ».