Ebʼ li tzolom nekeʼxkʼul li santil musiqʼej

Ak xnumeʼk 10 kutan chalen naq li Jesus kisutqʼiik saʼ choxa. Tojaʼ naq, ebʼ li xtzolom xeʼxkʼul li santil musiqʼej. Ak xkutankil li Ninqʼe re li Pentecostes re li chihabʼ 33, ut ebʼ li poyanam re naabʼal chi naʼajej xeʼwulak Jerusalen chi xnimankil. Xeʼxchʼutubʼ ribʼ 120 tana li xtzolom li Jesus saʼ xkabʼ tasal jun li ochoch ut maakʼaʼ saʼ xchʼoolebʼ naq xkʼulmank jun li nimla naʼlebʼ. Chanchan ruqʼ raqʼ xaml kixkʼe ribʼ saʼ xjolom li junjunq chi tzolom, ut chixjunilebʼ keʼok chi aatinak saʼ jalan jalanq chi aatinobʼaal. Joʼkan ajwiʼ, kiʼabʼimank xyaabʼ jun li kawil iqʼ saʼ chixjunil li ochoch.

Ebʼ li poyanam li chalenaqebʼ saʼ jalan chik tenamit li xeʼwulak Jerusalen keʼrabʼi xyaabʼ li kawil iqʼ ut keʼaanilak chi ilok saʼ li ochoch re xnawbʼal kʼaru xkʼulmank. Jwal xeʼsachk xchʼool naq xeʼrabʼi ebʼ li tzolom chi aatinak saʼ jalan jalanq chi aatinobʼaal. Keʼxye: «Ebʼ aj Galilea li poyanam aʼin, chanru naq nekeʼruuk chi aatinak saʼebʼ li qaatinobʼaal?».

Tojaʼ naq laj Pedro ut ebʼ li junchʼol chi Apostol xeʼxaqliik chiru li komonil. Laj Pedro kixchʼolobʼ chiruhebʼ: «Laaʼex xeekamsi li Jesus, abʼan li Jehobʼa kixwaklesi chi yoʼyo. Anaqwan, li Jesus wank saʼ choxa saʼ xnim ruqʼ li Yos. Ut kixkʼe qe li santil musiqʼej li kixye chaq qe. Joʼkan naq yookex rilbʼal ut rabʼinkil ebʼ li sachbʼachʼoolej aʼin».

Sachsokebʼ keʼkanaak ebʼ li poyanam. Li raatin laj Pedro kixtochʼebʼ xchʼool, joʼkan naq, keʼxpatzʼ: «Kʼaru tento tqabʼaanu?». Aʼan kixye rehebʼ: «Yotʼomaq eechʼool, jalomaq eenaʼlebʼ ut kubʼsihomaq eehaʼ saʼ xkʼabʼaʼ li Jesus. Chirix chik aʼan, teekʼul ajwiʼ li maatan chirix li santil musiqʼej». Ut 3.000 tana li poyanam xeʼxsubʼ ribʼ saʼ haʼ saʼ li kutan aʼan. Chalen li hoonal aʼin, kiʼok chi tamk ebʼ li tzolom aran Jerusalen. Rikʼin li xtenqʼ li santil musiqʼej, ebʼ li Apostol xeʼok xxaqabʼankil xkomon ebʼ li chʼuut. Chi joʼkan, xeʼruuk xkʼutbʼal chiruhebʼ li tzolom chixjunil li taqlanbʼilebʼ wiʼ xbʼaan li Jesus.