Li seeraqʼ saʼ li tzuul

Naq kixsikʼ ebʼ li 12 chi Apostol, li Jesus kikubʼeek saʼ li tzuul ut xkoho bʼarwiʼ chʼutchʼukebʼ naabʼal li poyanam. Chalenaqebʼ chaq Galilea, Judea, Tiro, Sidon, Siria ut saʼ junpakʼal li nimaʼ Jordan. Keʼxkʼam chaq ebʼ li yaj malaj li nekeʼrahobʼtesiik xbʼaanebʼ li maaʼus aj musiqʼej, ut li Jesus kixkʼirtasihebʼ chixjunil. Tojaʼ naq kichunlaak saʼ xtaqʼahil li tzuul ut kiʼok chi aatinak rikʼinebʼ li poyanam. Kixye rehebʼ li tento tqabʼaanu wi naqaj wank choʼq ramiiw li Yos. Tento tqakʼe reetal naq naʼajmank naq li Jehobʼa tooxbʼeresi ut tento tqatzol xraabʼal. Abʼan inkʼaʼ tooruuq xraabʼal li Yos wi inkʼaʼ naqarahebʼ li poyanam. Tento naq chaabʼilaq ut tiikaq qabʼaanuhom rikʼin chixjunilebʼ, joʼ ajwiʼ rikʼinebʼ li xikʼ nekeʼilok qe.

Li Jesus kixye: «Moko kaʼaj tawiʼ taara ebʼ laawamiiw, taara ajwiʼ ebʼ li xikʼ nekeʼilok aawe ut taakuyebʼ xmaak chi anchal laachʼool. Ut wi ani nachʼaʼajkoʼk aawikʼin, ayu saʼ junpaat xpatzʼbʼal xkuybʼal aamaak. Taawilebʼ li junchʼol joʼ chanru nakaawaj naq tateʼril».

Li Jesus kixkʼe ajwiʼ li chaabʼil naʼlebʼ chirix li kʼaru qe. Kixye: «Jwal us wank choʼq ramiiw li Jehobʼa chiru naabʼal li tumin. Xbʼaan naq jun laj elqʼ truuq relqʼankil laatumin, abʼan maaʼani truuq relqʼankil laaʼamiiwil rikʼin li Jehobʼa. Joʼkan naq, mixik aakʼaʼuxl chirix laatzakahemq, laawukʼaʼ malaj laatiqibʼankil. Kʼe reetal ebʼ li kokʼ xul li nekeʼrupupik. Li Yos junelik narilebʼ re naq wanq xtzakahemqebʼ. Usta yook aakʼaʼuxl, moko tnajtoʼq ta ru laayuʼam. Jultikoʼq aawe: li Jehobʼa junelik naxnaw li nakaawaj saʼ laayuʼam».

Ebʼ li poyanam maajunwa rabʼihomebʼ chaq naq junaq winq kiʼaatinak joʼ li Jesus. Ebʼ li nekeʼkʼamok bʼe saʼ li paabʼal inkʼaʼ keʼxkʼut aʼin chiruhebʼ. Kʼaʼut chaabʼil kikʼutuk chaq li Jesus? Xbʼaan naq chixjunil li kixkʼut chaq chalenaq rikʼin li Jehobʼa.