Li xjukubʼ kabʼl laj Noe

Saʼ xnumik ru li chihabʼ, kinabʼaloʼk li poyanam saʼ Ruuchichʼochʼ. Naabʼalebʼ inkʼaʼ usebʼ xnaʼlebʼ. Keʼwank ajwiʼ anjel keʼmaaʼusoʼk xnaʼlebʼ. Keʼxkanabʼ li xnaʼajebʼ saʼ choxa ut keʼchalk saʼ Ruuchichʼochʼ. Ma nakaanaw kʼaru aj e? Re naq teʼtibʼeloʼq joʼ winq ut teʼsumlaaq rikʼinebʼ li ixq.

Ebʼ li anjel aʼin keʼwank xkokʼal rikʼinebʼ li ixq. Naq keʼok chi nimank ebʼ li kokʼal aʼin, kiʼok chi numtaak xmetzʼewebʼ ut nekeʼsakʼok, ut nekeʼxrahobʼtesi ebʼ li poyanam. Li Jehobʼa inkʼaʼ kixkanabʼ naq yooq chi kʼulmank aʼin. Joʼkan naq kixkʼoxla xsachbʼalebʼ li maaʼusebʼ xnaʼlebʼ rikʼin jun li Bʼutʼihaʼ, jun li kawil habʼ li kixnujobʼresi chixjunil li Ruuchichʼochʼ.

Abʼan kiwank jun li winq chaabʼil xnaʼlebʼ. Xbʼaan naq naxra chaq li Jehobʼa. Li xkʼabʼaʼ aʼan Noe. Li winq aʼin wank jun rixaqil ut oxibʼ ralal: laj Sem, laj Cam ut laj Jafet. Li junjunq chi ralal wank rixaqil. Li Jehobʼa kixye re laj Noe naq tixyiibʼ jun li jukubʼ kabʼl, aʼin jun li nimla kaax re cheʼ li naru nawank saʼ xbʼeen haʼ. Chi joʼkan, laj Noe ut li xjunkabʼal teʼkoleʼq naq tchalq li Bʼutʼihaʼ. Joʼkan ajwiʼ, li Jehobʼa kixye re, naq tixchʼik naabʼal li xul saʼ li jukubʼ kabʼl re naq teʼkoleʼq ajwiʼ.

Laj Noe kiʼok xyiibʼankil saʼ junpaat li jukubʼ kabʼl. Aʼan ut li xjunkabʼal keʼbʼayk tana 50 chihabʼ xyiibʼankil, ut keʼxbʼaanu joʼ chanru kixye chaq li Jehobʼa rehebʼ. Chiruhebʼ li chihabʼ aʼan, laj Noe kixye rehebʼ li poyanam naq tchalq jun li Bʼutʼihaʼ, abʼan maaʼani kipaabʼank re.

Tojaʼ naq kiwulak xkutankil re naq teʼoq saʼ li jukubʼ kabʼl. Ma nakaawaj xnawbʼal kʼaru kikʼulmank chirix chik aʼan?