Li Jesus nasutqʼiik saʼ choxa

Li Jesus kixchʼutubʼ ribʼ rikʼinebʼ li xtzolom aran Galilea. Kixkʼe rehebʼ jun li taql li wank xwankil: «Ayuqex ut kʼehomaqebʼ choʼq intzolom ebʼ li poyanam re chixjunil ebʼ li tenamit. Kʼutumaq chiruhebʼ chixjunil li xinkʼut cheeru ut teesubʼebʼ saʼ haʼ». Chirix chik aʼan kixye rehebʼ: «Jultikoʼq eere, junelik wanqin eerikʼin».

Naq ak xwakliik wiʼ chik chi yoʼyo, chiru 40 kutan li Jesus kixkʼut ribʼ chiru chi siʼeent rehebʼ li xtzolom aran Galilea ut Jerusalen. Kixkʼut chiruhebʼ li naʼlebʼ li wank tzʼaqal xwankil ut kixbʼaanu naabʼal li sachbʼachʼoolej. Tojaʼ naq, jun sut aj chik kixchʼutubʼ ribʼ rikʼinebʼ li Xʼapostol saʼ li tzuul Olivo. Li Jesus kixye rehebʼ: «Mexʼelk Jerusalen. Meekanabʼ roybʼeninkil li xyeechiʼom li Yuwaʼbʼej».

Ebʼ li xtzolom inkʼaʼ peʼ keʼxtaw ru li kiraj xyeebʼal li Jesus, joʼkan naq, keʼxpatzʼ re: «Ma ok aawe choʼq awabʼej saʼ Israel?». Li Jesus kixsumehebʼ: «Li Jehobʼa toj maajiʼ naraj naq tinʼoq choʼq awabʼej. Abʼan chi seebʼ teekʼul li santil musiqʼej li tixkʼe eewankil, ut laaʼexaq lintestiiw. Joʼkan naq, ayuqex chi puktesink aran Jerusalen, Judea, Samaria ut toj saʼ xnajtil ebʼ li tenamit».

Tojaʼ naq, kitaqeʼk saʼ choxa, ut jun li choql kimuqunk re. Ebʼ li xtzolom keʼkanaak chi ilok taqeʼk, abʼan kimuqunk.

Ebʼ li tzolom keʼelk saʼ li tzuul Olivo ut xkohebʼ wiʼ chik Jerusalen. Ebʼ li wankebʼ aran kʼaynaqebʼ xchʼutubʼankil ribʼebʼ ut tijok saʼ jun rehebʼ li naʼaj re hilank li wank saʼ xtaqeʼqil junaq li ochoch. Yookebʼ roybʼeninkil naq li Jesus toj tixye rehebʼ kʼaru chik teʼxbʼaanu.