Chanru nekeʼxkʼe li tzolok chirix li Santil Hu ebʼ laj testiiw re li Jehobʼa?
Ebʼ laj testiiw re li Jehobʼa naru nakateʼxtenqʼa re xtzolbʼal kʼaru naxkʼut li Santil Hu. Xtzolbʼal li Santil Hu tatxtenqʼa saʼebʼ li naʼlebʼ aʼin:
Xtawbʼal li sahil chʼoolejil saʼ laayuʼam.
Wanq choʼq ramiiw li Yos.
Xtzolbʼal li naxyeechiʼi li Yos saʼ li kutan chalk re.
Tqataw xsumenkil ebʼ li patzʼom li nabʼaanumank chirix li tzolok:
Wi tinkʼulubʼa xtzolbʼal li Santil Hu, ma tento tinʼoq choʼq aj testiiw re li Jehobʼa?
Wi ak xintzol li Santil Hu rikʼinebʼ laj Testiiw, ma tinruuq wiʼ chik chi tzolok?
Ma wank jun li naʼlebʼ re xtzolbʼal li Santil Hu chi maaʼani ttzoloq we?
Chanru naʼuxmank li tzolok?
Li natzolok aawe tixkʼut chaawu jalan jalanq li naʼlebʼ li naxkʼut li Santil Hu. Naq yooqat xtzolbʼal li tasal hu Sahaq laachʼool! taatzol kʼaru naxkʼut li Santil Hu ut kʼaru rusilal tatruuq xtawbʼal. Wi taawaj xnawbʼal xkomon, il li bʼideo aʼin.
Ma tojbʼil li tzolok?
Inkʼaʼ. Ebʼ laj testiiw re li Jehobʼa nekeʼxbʼaanu joʼ kixye li Jesús rehebʼ li xtzolom: «Chi maatan xekʼul, ut chi maatan ajwiʼ teekʼe» (Mateo 10:8, Li Santil Hu, Sociedad Bíblica de Guatemala). Wi taawaj li hu Sahaq laachʼool! ut li Santil Hu tqakʼe aawe chi sibʼil.
Jarubʼ hoor nabʼayk li tzolok?
Wank 60 li tzolom. Laaʼat yaal aawe chanru tattzoloq. Wankebʼ nekeʼxtzol jun li tzolom chiru li xamaan ut junchʼol chik nekeʼxtzol wiibʼ malaj oxibʼ li tzolom.
Bʼar tintikibʼ?
1. Nujtesi li hu re xpatzʼbʼal aatzolbʼal. Kaʼajwiʼ tqoksi li naʼajmank re aatinak aawikʼin.
2. Laj Testiiw li ttzoloq aawikʼin tatxbʼoq. Tixchʼolobʼ chaawu chanru nabʼaanumank li tzolok ut naru naxsume wiibʼ oxibʼ laapatzʼom.
3. Laaʼat ut li ttzoloq aawikʼin teekʼe eeribʼ saʼ aatin. Naru nakattzolok saʼ laawochoch, saʼ selular, saʼ bʼideollamaad malaj jalan chik li naʼlebʼ. Naru nakattzolok chiru jun hoor malaj joʼ chanru naxkʼe ribʼ chaawu.
Ma tinruuq rilbʼal chanru nabʼaanumank?
Heeheʼ. Nujtesi li hu re xpatzʼbʼal aatzolbʼal. Naq li ttzoloq aawe tatxbʼoq, ye re naq kaʼajwiʼ taawaj rilbʼal ma twulaq chaawu xtzolbʼal li Santil Hu malaj inkʼaʼ. Chi joʼkan teeroksi li hu Sahaq laachʼool! bʼarwiʼ natawmank oxibʼ ajwiʼ li tzolom.
Wi tinkʼulubʼa xtzolbʼal li Santil Hu, ma tento tinʼoq choʼq aj testiiw re li Jehobʼa?
Inkʼaʼ. Ebʼ laj testiiw re li Jehobʼa nekeʼwulak chiru xkʼutbʼal li Santil Hu chiruhebʼ li qas qiitzʼin, ut maaʼani nekeʼxmin ru re naq t-oq choʼq aj Testiiw. Nekeʼxchʼolobʼ saʼ tuulanil li naxkʼut li Santil Hu ut chʼolchʼo chiruhebʼ naq ebʼ li qas qiitzʼin yaalebʼ re kʼaru teʼxpaabʼ (1 Pedro 3:15).
Ma tinruuq roksinkil Linsantil Hu?
Heeheʼ, naru nakaawoksi li Santil Hu li nawulak chaawu. Usta ebʼ laj testiiw re li Jehobʼa naqoksi li Traducción del Nuevo Mundo li moko chʼaʼaj ta xtawbʼal ru ut tzʼaqal re ru, naqanaw naq naabʼalebʼ nekeʼwulak chiru roksinkil li Santil Hu li kʼaynaqebʼ wiʼ.
Ma truuq wochbʼeninkil anihaq naq tintzoloq?
Heeheʼ. Naru nakateʼrochbʼeni ebʼ laawamiiw malaj ebʼ laakomon.
Wi ak xintzol li Santil Hu rikʼinebʼ laj Testiiw, ma tinruuq wiʼ chik chi tzolok?
Heeheʼ. Maare qʼaxal wiʼ chik twulaq chaawu xbʼaan naq kijalaak wiibʼ oxibʼ li naʼlebʼ re xtenqʼankilebʼ li kristiʼaan saʼebʼ li qakutan. Naʼoksimank naabʼal chik li eetalil ut bʼideo chiru li naʼoksimank chaq junxil.
Ma wank jun li naʼlebʼ re xtzolbʼal li Santil Hu chi maaʼani ttzoloq we?
Heeheʼ. Usta wankebʼ nekeʼwulak chiru tzolok rikʼin li xtenqʼ jalan chik, junchʼol chik nekeʼwulak chiru tzolok saʼ junesal. Saʼ li naʼlebʼ «Li tenqʼ re xtzolbʼal li Santil Hu» wank wiibʼ oxibʼ li naʼlebʼ li tatxtenqʼa. Aʼin wiibʼ oxibʼ rehebʼ:
Ebʼ li bʼideo: Wiibʼ oxibʼ li kʼutum. Saʼebʼ li bʼideo aʼin naxchʼolobʼ li xkʼutum li Santil Hu.
Li Santil Hu naxsume ebʼ li patzʼom. Saʼebʼ li tzolom aʼin wank jalan jalanq li patzʼom li naxsume li Santil Hu.
Textos bíblicos explicados. Aran taataw xyaalalil wiibʼ oxibʼ xraqal li Santil Hu li nawbʼil ru.