Qawaklesihaq qachʼool chiqibʼil qibʼ saʼebʼ li chʼutam

1. Kʼaʼut nokootzʼaqonk saʼebʼ li chʼutam?

KʼAʼUT naq nokooxik saʼebʼ li chʼutam? Li xyaalal aʼan naq naqaj xloqʼoninkil ru li Jehobʼa (Sal. 26:12; 111:1). Nokooxik ajwiʼ saʼebʼ li chʼutam re xwaklesinkil qachʼool chiqibʼil qibʼ usta chʼaʼaj ebʼ li kutan aʼin (1 Tes. 5:11). Naq nokootzʼaqonk saʼebʼ li chʼutam yooko xbʼaanunkil li wiibʼ chi naʼlebʼ aʼin.

2. Joqʼe naru nokootzʼaqonk saʼebʼ li chʼutam?

² Rajlal xamaan wank qahoonal re tzʼaqonk saʼebʼ li chʼutam. Jun eetalil, saʼ xraqik xamaan naru nokootzʼaqonk naq natzolmank li hu Laj Kʼaakʼalehom. Saʼ li chʼutam saʼ xyanqil xamaan naru nokootzʼaqonk saʼ «Li tertokil pek», «Xtzolbʼal li Santil Hu saʼ li chʼuut» ut naq nabʼaanumank jalan chik li patzʼom.

3. a) Kʼaru naru tooxchʼaʼajki naq tqaj sumenk? b) Chanru nokooxtenqʼa Hebreos 10:24, 25?

³ Chiqajunilo naqaj xwaklesinkilebʼ xchʼool ebʼ li qahermaan ut xkʼebʼal xloqʼal li Jehobʼa naq naqakʼe li qasumehom. Naq nokoosumenk naqakʼul li chʼaʼajkilal joʼ aʼin: nachalk qaxiw, ut naq naqaj tzʼaqonk chi anchal qachʼool abʼan inkʼaʼ nekeʼxkʼe qasumenk. Saʼ li esilhu li kixtzʼiibʼa li apóstol Pablo choʼq rehebʼ laj hebreo, naqataw jun li naʼlebʼ li tooxtenqʼa. Laj Pablo kixye naq wank xwankil naq tqachʼutubʼ qibʼ ut chirix kʼaru tento tqakʼe qachʼool: «Qawaklesihaq […] qachʼool chiqibʼil qibʼ» (taayaabʼasi Hebreos 10:24, 25). Wi chʼolchʼo chiqu naq naru naqawaklesihebʼ xchʼool li junchʼol usta yal wiibʼ oxibʼ li aatin tqaye tqakʼutbʼesi li qapaabʼal, chi kamaʼan inkʼaʼ tchalq qaxiw naq tqataqsi li quqʼ. Ut wi inkʼaʼ nokooruuk chi sumenk joʼ chanru naqaj, sahaq saʼ qachʼool naq ebʼ li junchʼol teʼruuq xbʼaanunkil (1 Ped. 3:8).

4. Bʼar wank li oxibʼ chi naʼlebʼ li tqatzʼil rix saʼ li tzolom aʼin?

⁴ Saʼ li tzolom aʼin tqil chankiru tqakawresi qibʼ chiqibʼil qibʼ saʼ jun li chʼina chʼuut, bʼarwiʼ naru naq tootzʼaqonq naabʼal sut. Moqon chik tqil chanru naru naq tootzʼaqonq saʼ jun li nimla chʼuut, bʼarwiʼ naabʼalebʼ li hermaan nekeʼtzʼaqonk. Saʼ xraqik tqil, chanruhaq li qasumehom re naq tixwaklesi xchʼool ebʼ li hermaan.

CHANRU TQAWAKLESI QACHʼOOL CHIQIBʼIL QIBʼ SAʼ JUN LI CHʼINA CHʼUUT

5. Kʼaru tooruuq xbʼaanunkil re xwaklesinkil qachʼool chiqibʼil qibʼ wi moko naabʼalo ta saʼ li chʼutam?

⁵ Saʼ jun li chʼuut malaj saʼ jun li chʼina chʼuut, moko naabʼalebʼ ta li hermaan nekeʼruuk chi tzʼaqonk re xtenqʼankil li yook chi bʼeresink re li chʼutam. Wank sut li hermaan aʼin tento troybʼeni ani tixtaqsi li ruqʼ. Aʼin naru naxbʼaanu naq tchalq aawara saʼ li chʼutam. Ut moko tixwaklesi ta aachʼool. Kʼaru tooruuq xbʼaanunkil? Ajʼooq qu re naq junelik yooqo chi tzʼaqonk. Chi kamaʼan tqawaklesihebʼ xchʼool li junchʼol re naq teʼtzʼaqonq.

6, 7. Kʼaru tatruuq xbʼaanunkil re naq inkʼaʼ tchalq aaxiw?

⁶ Kaʼajwiʼ xkʼoxlankil tzʼaqonk saʼ li chʼutam naxkʼe xxiwebʼ naabʼal li hermaan. Wi joʼkan nakaakʼul, kʼaru tatruuq xbʼaanunkil? Kʼaʼut inkʼaʼ nakaasikʼ aatenqʼ re rilbʼal chanru naq inkʼaʼ tchalq aaxiw re xwaklesinkilebʼ xchʼool li junchʼol re naq teʼsumenq?

⁷ Li truuq aatenqʼankil aʼan xtzʼilbʼal rix wiibʼ oxibʼ li naʼlebʼ li wank saʼ li hu Laj Kʼaakʼalehom.b Jun rehebʼ li naʼlebʼ aʼan xkawresinkil aawibʼ (Prov. 21:5). Naq taanaw chiʼus li teʼaatinaq wiʼ saʼ li chʼutam moko tchʼaʼajkoʼq ta chaawu xtaqsinkil aawuqʼ. Jun chik li naʼlebʼ li tatruuq xbʼaanunkil aʼan naq yal saʼ wiibʼ oxibʼ chi aatin taaye laasumenk (Prov. 15:23; 17:27). Moko tchalq ta aaxiw wi yal nakaaye wiibʼ oxibʼ chi aatin. Moko tchʼaʼajkoʼq ta chiruhebʼ li hermaan xtawbʼal ru wi laasumenk moko najt ta roq, abʼan wi taaye kʼiila aatin inkʼaʼ teʼxtaw ru. Wi saʼ laachʼool kiʼelk chaq laasumenk ebʼ li junchʼol teʼxkʼe reetal naq xaakawresi aawibʼ chiʼus ut nakaataw ru li yook chi tzolmank.

8. Kʼaru narekʼa li Jehobʼa naq naqayal qaqʼe chi sumenk?

⁸ Kʼaru tatruuq xbʼaanunkil wi ak yookat xbʼaanunkil wiibʼ oxibʼ li naʼlebʼ li xaayaabʼasi abʼan toj nachalk aaxiw? Jultikaq aawe naq oxloqʼ chiru li Jehobʼa naq nakaayal aaqʼe chi tzʼaqonk saʼebʼ li chʼutam (Luc. 21:1-4). Abʼan inkʼaʼ naxpatzʼ qe li inkʼaʼ tooruuq xbʼaanunkil (Filip. 4:5). Joʼkan naq il li tatruuq xbʼaanunkil, yuʼami ut tzʼaama re li Jehobʼa naq tixkʼe aatuqtuukilal. Maare saʼ xtiklajik li tatruuq xbʼaanunkil aʼan sumenk rikʼin wiibʼ oxibʼ chi aatin.

CHANRU TQAWAKLESI QACHʼOOL CHIQIBʼIL QIBʼ SAʼ JUN LI NIMLA CHʼUUT

9. Kʼaru li chʼaʼajkilal naru nawank saʼ jun li nimla chʼuut?

⁹ Wi saʼ laachʼuut wankebʼ naabʼal laj puktesinel maare jalan chik li chʼaʼajkilal nakaakʼul. Maare naabʼal sut inkʼaʼ nakattzʼaqonk xbʼaan naq naabʼalebʼ li qahermaan nekeʼraj sumenk. Qakʼoxlaq chirix li kixkʼul li xDanielle, nawulak chiru tzʼaqonk saʼebʼ li chʼutam.c Choʼq re, tzʼaqonk saʼ li chʼutam wank xwankil xbʼaan naq chi kamaʼan naxloqʼoni ru li Jehobʼa, naxwaklesihebʼ xchʼool li junchʼol ut nakanaak saʼ xchʼool li naxkʼut li Santil Hu. Abʼan naq kiʼok chi tenqʼank saʼ jun li nimla chʼuut, inkʼaʼ chik mas nasumenk ut wank sut moko natzʼaqonk ta. Aʼan naxye: «Nachalk injosqʼil. Xwekʼa naq chanchan tawiʼ naq xeʼxmaqʼ jun linkʼanjel. Naq inkʼaʼ chik nekexkʼehat chi tzʼaqonk nakat-ok xkʼoxlankil naq yal nekeʼraj naq nekeʼxbʼaanu».

10. Kʼaru tatruuq xbʼaanunkil re naq tatruuq chi tzʼaqonk saʼ li chʼutam?

¹⁰ Ma xaawekʼa joʼ kirekʼa li xDanielle? Wi joʼkan nakaakʼul maare xaakʼoxla naq inkʼaʼ chik tattzʼaqonq ut kaʼajwiʼ tat-abʼinq. Abʼan michʼinaak aachʼool. Kʼaru tatruuq xbʼaanunkil re naq tatruuq chi sumenk? Ma kawresi jun ajwiʼ laasumenk. Chi kamaʼan wi inkʼaʼ tattzʼaqonq saʼ xbʼeen raqal re li hu Laj Kʼaakʼalehom naru nakattzʼaqonk saʼebʼ li xkomon. Naq nakaatzol li hu Laj Kʼaakʼalehom, kʼe reetal chanru naxchap ribʼ li junjunq chi raqal rikʼin li naʼlebʼ li naxjolomi li tzolom. Chi kamaʼan wank kʼaru tatruuq xyeebʼal. Jun chik li naʼlebʼ li tatruuq xbʼaanunkil aʼan xkawresinkil jun li sumenk saʼebʼ li raqal li naʼaatinak chirix li xchamal li naʼlebʼ li wank saʼ li Santil Hu (1 Cor. 2:10). Xbʼaan naq chʼaʼaj xchʼolobʼankil moko naabʼalebʼ ta nekeʼxtaqsi li ruqʼ re tzʼaqonk. Abʼan, wi toj maajiʼ nakattzʼaqonk saʼ li chʼutam usta ak xaabʼaanu ebʼ li naʼlebʼ li xaawil saʼ naabʼal li chʼutam? Naq toj maajiʼ natiklaak li chʼutam aatinan rikʼin li hermaan li naxbʼeresi li tzolom ut ye re kʼaru li patzʼom taawaj xsumenkil.

11. Joʼ naxye Filipenses 2:4, kʼaru tooruuq xbʼaanunkil?

¹¹ (Taayaabʼasi Filipenses 2:4). Li Jehobʼa kixmusiqʼa li apóstol Pablo re naq tixye rehebʼ laj paabʼanel naq teʼxkʼe xchʼool chirixebʼ li junchʼol. Chanru tooruuq xyuʼaminkil li naʼlebʼ aʼin saʼebʼ li chʼutam? Xjultikankil naq ebʼ li junchʼol nekeʼraj ajwiʼ tzʼaqonk.

12. Bʼar wank jun chik li naʼlebʼ li naru naxwaklesi xchʼool ebʼ li qechpaabʼanel saʼebʼ li chʼutam? (Chaawil li jalam u).

¹² Qakʼehaq jun eetalil li tooxtenqʼa xtawbʼal ru. Peʼyaal naq yookat chi aatinak rikʼinebʼ laawamiiw nakaakʼe xhoonal naq teʼaatinaq xbʼaan naq nakaawaj rabʼinkilebʼ. Joʼkan ajwiʼ nakʼulmank saʼ li qachʼutam. Naqaj naq ebʼ li qechpaabʼanel teʼtzʼaqonq joʼ naxkʼe ribʼ chiruhebʼ. Li naxwaklesi xchʼool ebʼ li qechpaabʼanel aʼan naq tqakanabʼ naq teʼtzʼaqonq saʼebʼ li chʼutam (1 Cor. 10:24). Qilaq kʼaru tqabʼaanu re naq naabʼal teʼtzʼaqonq saʼebʼ li chʼutam.

13. Kʼaru tooruuq xbʼaanunkil re naq ebʼ li junchʼol teʼruuq chi tzʼaqonk?

¹³ Jun chik li naʼlebʼ aʼan naq moko nimaq ta roq li qasumenk. Chi kamaʼan naabʼalebʼ naru nekeʼtzʼaqonk. Ebʼ li cheekel winq ut ebʼ li hermaan li junxil nekeʼok saʼ li yaal naru nekeʼxkʼe li eetalil chirix aʼin. Joʼkan, wi moko kʼiila aatin ta taaye, maaye chixjunil li xninqal ru naʼlebʼ. Xbʼaan naq wi taaye chixjunil li wank saʼ li raqal maakʼaʼ chik naru teʼxye li junchʼol. Saʼ li raqal aʼin naʼaatinak chirix wiibʼ li naʼlebʼ: yal wiibʼ oxibʼ chi aatin taaye ut maaye chixjunil xninqal ru naʼlebʼ. Wi xeʼxkʼe aawe li xbʼeen sumenk saʼ li raqal, us raj naq taaye jun ajwiʼ xnimal ru naʼlebʼ.

14. Kʼaru tqajultika chirix jarubʼ sut naqaj tzʼaqonk? (Chaawil ebʼ li jalam u).

¹⁴ Kʼutbʼesi laarahom naq taakʼoxla jarubʼ sut taataqsi laawuqʼ. Wi naqataqsi li quqʼ kokʼaj xsaʼ, li yook chi xbʼeresinkil li kʼanjel maare trekʼa naq tento tixkʼe li qasumenk, usta ebʼ li junchʼol toj maajiʼ nekeʼtzʼaqonk. Joʼkan ajwiʼ ebʼ li junchʼol maare teʼxkʼoxla naq maakʼaʼ aj e naq teʼtzʼaqonq (Ecl. 3:7).

15. a) Chanru toonaʼlebʼaq wi inkʼaʼ xooruuk chi tzʼaqonk saʼ li chʼutam? b) Kʼaru tixkʼe reetal li tixbʼeresi li kʼanjel? (Chaawil li kaaxukuut «Chanru xbʼeresinkil li kʼanjel patzʼok ut sumenk»).

¹⁵ Naq naabʼal ebʼ li hermaan nekeʼxtaqsi li ruqʼ re tzʼaqonk, maare inkʼaʼ mas tooruuq chi sumenk. Ut maare inkʼaʼ xooruuk chi sumenk saʼ li chʼutam. Yaal maare aʼin tixbʼaanu naq trahoq saʼ qachʼool abʼan michʼinaak qachʼool (Ecl. 7:9).

16. Kʼaru tooruuq xbʼaanunkil re xwaklesinkilebʼ xchʼool li xeʼtzʼaqonk?

¹⁶ Usta inkʼaʼ xootzʼaqonk saʼ li chʼutam joʼ chanru naqaj, us raj naq tqakʼe qachʼool chi rabʼinkil li xsumenkil ebʼ li junchʼol ut naq ak xraqeʼk li chʼutam naru naqawaklesi ebʼ xchʼool. Maare li xaaye re li hermaan, naru naxwaklesi xchʼool joʼ chan raj ru xaabʼaanu naq xatsumenk (Prov. 10:21). Naq naqaye li chaabʼil aatin choʼq rehebʼ li hermaan naqawaklesihebʼ xchʼool.

EBʼ LI NAʼLEBʼ RE XWAKLESINKIL QACHʼOOL CHIQIBʼIL QIBʼ

17. a) Kʼaru teʼruuq xbʼaanunkil li naʼbʼej yuwaʼbʼej? b) Joʼ naxkʼut li bʼideo, bʼar wank li kaahibʼ chi naʼlebʼ re xkawresinkil jun li sumenk? (Chaawil ajwiʼ li xyaalal).

¹⁷ Kʼaru chik tooruuq xbʼaanunkil re xwaklesinkil qachʼool chiqibʼil qibʼ saʼebʼ li chʼutam? Wi wankebʼ laakokʼal naru taatenqʼahebʼ re naq teʼxkawresi jun li sumenk aʼ yaal jarubʼ chihabʼ wankebʼ re (Mat. 21:16). Wank sut saʼ li chʼutam natzolmank li naʼlebʼ li chʼaʼaj aatinak chirix joʼ li chʼaʼajkilal saʼ li sumlajik ut li muxuk ibʼ. Abʼanan wank sut naq wank wiibʼ oxibʼ li raqal bʼarwiʼ naru teʼtzʼaqonq ebʼ li kokʼal. Joʼkan ajwiʼ naru taatenqʼahebʼ laakokʼal kʼaʼut naq inkʼaʼ teʼruuq chi sumenk rajlal sut naq nekeʼxtaqsi li ruqʼ. Wi taachʼolobʼ aʼin chiruhebʼ laakokʼal inkʼaʼ teʼchʼinaaq xchʼool naq moko teʼxkʼe ta xsumenk ut jalan chik ttzʼaqonq (1 Tim. 6:18).d

18. Kʼaru tooruuq xbʼaanunkil re naq inkʼaʼ tooʼaatinaq kaʼajwiʼ chiqix naq nokoosumenk? (Proverbios 27:2).

¹⁸ Chiqajunilo naru naqakawresi li sumenk li naru naxwaklesi xchʼool ebʼ li qechpaabʼanel ut tixkʼe xloqʼal li Jehobʼa (Prov. 25:11). Wank sut naru naqaye saʼ wiibʼ oxibʼ chi aatin li xqakʼul saʼ li qayuʼam abʼan mooʼaatinak kaʼajwiʼ chiqix (taayaabʼasi Proverbios 27:2; 2 Cor. 10:18). Aatinaqo bʼan chirix li Jehobʼa, li Santil Hu ut li xmolam (Apoc. 4:11). Wi li xpatzʼom jun li raqal naxbʼaanu naq tqaye li xqakʼul saʼ li qayuʼam, us naq tqabʼaanu. Saʼ li jun chik raqal tqataw jun li eetalil.

19. a) Kʼaru tkʼulmanq wi naqakʼoxla ebʼ li junchʼol saʼebʼ li chʼutam? (Romanos 1:11, 12). b) Kʼaʼut nawulak chaawu tzʼaqonk saʼebʼ li chʼutam?

¹⁹ Usta maakʼaʼ junaq li chaqʼrabʼ chirix chanru tootzʼaqonq saʼebʼ li chʼutam, chixjunilo tqayal qaqʼe re naq li tqaye tixwaklesi xchʼool ebʼ li junchʼol. Choʼq rehebʼ wiibʼ oxibʼ naraj xyeebʼal naq naru nekeʼtzʼaqonk naabʼal sut. Ut choʼq rehebʼ li junchʼol naraj xyeebʼal naq sahaqebʼ saʼ xchʼool rikʼin naq nekeʼsumenk junsutaq saʼebʼ li chʼutam ut sahaqebʼ saʼ xchʼool naq wankebʼ junchʼol chik li nekeʼraj sumenk. Wi saʼ li chʼutam naqakʼoxla rixebʼ li junchʼol, chiqajunilo naru naqawaklesi qachʼool chiqibʼil qibʼ (taayaabʼasi Romanos 1:11, 12).