Qoqsihaq li folleto Li tooruuq xtzolbʼal saʼ li Raatin li Yos re naq tqatikibʼ seeraqʼik
1. Bʼar wank li akʼ kʼanjelobʼaal choʼq re li puktesink?
1 Tojeʼ xqakʼul li folleto Li tooruuq xtzolbʼal saʼ li Raatin li Yos. Maare xqakʼe reetal naq chi chʼuut wank ebʼ li raqal li Santil Hu chirix jalan jalanq li naʼlebʼ ut kʼubʼanbʼil joʼ li tasal hu Razonamiento, joʼkan naq jwal tooxtenqʼa re naq tqatikibʼ aatinak. Chanru tooruuq roksinkil li folleto naq tqakʼubʼ junaq li eetalil choʼq re li puktesink?
2. Chanru tooruuq roksinkil li folleto Li tooruuq xtzolbʼal saʼ li Raatin li Yos saʼ li puktesink?
2 Jun li eetalil, naru nakaawoksi li patzʼom 8 ut taaye: «Naq xooʼaatinak rikʼinebʼ laawechkabʼal xqakʼe reetal naq naabʼalebʼ nekeʼxpatzʼ ma li Yos nakʼamok chaq re li rahilal. [Saʼ naabʼal chi naʼajej ebʼ li qas qiitzʼin nekeʼwulak chiru rilbʼal naq li patzʼom wank saʼ li folleto.] Ut laaʼat kʼaru nakaakʼoxla? [Kanabʼ naq tsumenq.] Li Santil Hu naxsume aʼin chi tzʼaqal re ru». Chirix chik aʼan taawil ut taachʼolobʼ jun malaj wiibʼ oxibʼ li raqal li Santil Hu li wank chi tzʼiibʼanbʼil. Wi nawulak chiru li yookat xyeebʼal, taakʼut chiru li 20 chi patzʼom li wank saʼ li xbʼeen perel ut taaye re ma naraj naq tatsutqʼiiq saʼ jun chik kutan re aatinak chirix junaq chik li naʼlebʼ. Taayeechiʼi ajwiʼ re jun rehebʼ li tasal hu li naqoksi re xtzolbʼalebʼ li qas qiitzʼin ut taaye ajwiʼ re, naq chisaʼ li hu wank xkomon li naʼlebʼ li yookex wiʼ chi aatinak.
3. Chanru tooruuq roksinkil li akʼ folleto re naq tqatikibʼ aatinak rikʼinebʼ li qas qiitzʼin li nekeʼxpaabʼ li Yos abʼan inkʼaʼ nekeʼxpaabʼ li Santil Hu?
3 Ebʼ li patzʼom 4 ut 13 toj saʼ 17 naru nakʼanjelak re xpuktesinkil li chaabʼil esilal saʼebʼ li naʼaj bʼarwiʼ ebʼ li qas qiitzʼin li nekeʼxpaabʼ li Yos abʼan inkʼaʼ nekeʼxpaabʼ li Santil Hu. Naru nakaawoksi li patzʼom 17, ut maare taaye: «Yooko chi ulaʼanink junpaataq re xtenqʼankilebʼ li junkabʼal xbʼaan naq wank naabʼal li chʼaʼajkilal. Kʼaru nakaaye? [Kanabʼ naq tsumenq.] Naabʼal rehebʼ li sumsukebʼ nekeʼwulak chiru li chaabʼil aatin aʼin: Li ixaqilbʼej chiroxloqʼi li xbʼeelom. [Moko aajel ta ru naq taaye naq li raqal aʼin isinbʼil chaq saʼ Efesios 5:33. Wi yookat chi aatinak rikʼin junaq ixq, naru nakaakʼut chiru li naxye saʼ Efesios 5:28.] Ma nakaakʼoxla naq li naʼlebʼ aʼin naxtenqʼahebʼ li sumsukebʼ?».
4. Kʼaru taabʼaanu wi ak xatraqeʼk chi aatinak rikʼin junaq li qas qiitzʼin li naxpaabʼ li Yos abʼan inkʼaʼ naxpaabʼ li Santil Hu?
4 Wi ak xatraqeʼk chi aatinak, taaye re li qas qiitzʼin joqʼe tatsutqʼiiq re xkʼebʼal xtzʼaqobʼ li naʼlebʼ li yookex wiʼ chi aatinak. Ut naq tatsutqʼiiq, naru nekeʼtzʼil rix jun chik li raqal li Santil Hu li wank saʼ li patzʼom li ak xeetzʼil. Naq tixkʼe ribʼ chaawu, taachʼolobʼ chiru naq li chaabʼil naʼlebʼ li yookat xchʼolobʼankil isinbʼil saʼ li Santil Hu. Taakʼoxla chiʼus chirix kʼaru xexʼaatinak ut li naxkʼoxla chirix li Santil Hu, tojaʼ naq taayeechiʼi re jun li tasal hu li twulaq chiru. (Chaawil li hu Li Qakʼanjel Chirix li Yos re Diciembre 2013, perel 3-6.)