Li Keʼkoleʼk saʼ li Bʼutʼihaʼ

NAQ keʼok chi naabʼaloʼk ebʼ li poyanam, li maak ut li maaʼusilal kixjekʼi ribʼ saʼ chixjunil li Ruuchichʼochʼ. Kaʼajwiʼ laj Enoc tana aj kʼanjel chiru li Yos saʼ xbʼeen li Ruuchichʼochʼ ut aʼan kikʼehok resil naq li Jehobʼa tixsach li maaʼusebʼ xnaʼlebʼ. Abʼan li esil yal kinumeʼk chirix xxikebʼ, ut li maaʼusilal kiʼok chi numtaak. Moko kaʼaj tawiʼ aʼin kikʼulmank, wankebʼ li anjel keʼxqʼet ajwiʼ ribʼ chiru li Jehobʼa, keʼxkanabʼ xnaʼaj saʼ choxa, keʼtibʼeloʼk ut keʼsumlaak rikʼin naabʼal chi ixq arin saʼ ruuchichʼochʼ. Saʼ xkʼabʼaʼ naq keʼxbʼaanu aʼin, ebʼ li ralal xkʼajol li keʼyoʼlaak jalanebʼ rilobʼaal, jwal najtebʼ roq, numtajenaqebʼ xmetzʼew, maaʼusebʼ xnaʼlebʼ; ut aʼanebʼ keʼkʼamok chaq re li kamsink. Ebʼ li ralal xkʼajol ebʼ li anjel aʼin nawbʼilebʼ ru joʼ nefilim. Kʼajoʼ kirahoʼk saʼ xchʼool li Yos naq li xyoobʼtesihom keʼmaaʼusoʼk xnaʼlebʼ!

Ak kamenaq chik laj Enoc naq kiwank jun chik li chaabʼil winq, aj Noe xkʼabʼaʼ. Laj Noe ut li xjunkabʼal keʼxkʼe xqʼe chi xsahobʼresinkil xchʼool li Yos. Saʼ jun kutan li Jehobʼa kixye naq tixkʼam chaq jun li Bʼutʼihaʼ re xsachbʼalebʼ li maaʼusebʼ xnaʼlebʼ. Abʼanan, inkʼaʼ kiraj naq teʼkamq ebʼ li xul chi moko laj Noe, laj kʼanjel chiru. Joʼkan naq, kixye re laj Noe naq tixyiibʼ jun li jukubʼ kabʼl malaj jun li nimla kaax yal rapro roq. Ut chisaʼ tixkol ribʼ laj Noe, li xjunkabʼal ut jalan jalanq xpaayil li xul. Laj Noe kixpaabʼ li Yos ut kixxaqabʼ li jukubʼ kabʼl chiru 40 malaj 50 chihabʼ. Ut chiruhebʼ li chihabʼ aʼin, laj Noe yook chaq ajwiʼ xkʼeebʼal «resil li tiikilal» (2 Pedro 2:5). Kixye rehebʼ li poyanam naq yook chaq chi nachʼok li Bʼutʼihaʼ, abʼan maaʼani kipaabʼank re. Naq kiwulak xqʼehil, laj Noe, li xjunkabʼal ut ebʼ li xul keʼok saʼ li jukubʼ kabʼl. Tojaʼ naq li Yos kixtzʼap li okebʼaal ut kichalk li habʼ.

Kibʼutʼunk chixjunil li Ruuchichʼochʼ xbʼaan naq kixkʼe li kawil habʼ chiru 40 kutan ut 40 qʼoqyink. Maajun rehebʼ li maaʼusebʼ xnaʼlebʼ keʼkoleʼk. Saʼ xnumikebʼ ru li po, li haʼ kiʼok chi kubʼeek ut li jukubʼ kabʼl kikanaak saʼ xbʼeen jun li kʼicheʼ. Laj Noe ut li xjunkabʼal keʼwank chiru jun chihabʼ saʼ li jukubʼ kabʼl. Naq keʼelk chirix kabʼl, laj Noe kimayejak chiru li Jehobʼa re xbʼanyoxinkil chiru naq kixkolebʼ. Li Yos kixbʼaanu jun li sumwank rikʼin laj Noe, kixye naq maajunwa chik tixsach li yuʼam rikʼin Bʼutʼihaʼ. Choʼq reetalil aʼin, kixtaqla chaq li kaqlaaqʼ malaj li xokiqʼabʼ. Ut naq ebʼ li poyanam teʼril li eetalil aʼin saʼ choxa teʼjultikoʼq rehebʼ li Raatin li Yos.

Ak kinumeʼk li Bʼutʼihaʼ naq li Yos kixkʼe jalan chik li chaqʼrabʼ. Kixkʼehebʼ xleseens chi xtzakankil xtibʼelebʼ li xul, abʼan inkʼaʼ teʼxtzaka li kikʼ. Kixye ajwiʼ rehebʼ naq teʼxjekʼi ribʼebʼ saʼ chixjunil li Ruuchichʼochʼ. Abʼanan, wankebʼ keʼxqʼet ribʼ chiru li chaqʼrabʼ aʼin, ut keʼxchʼutubʼ ribʼ saʼ jun chi tenamit ut keʼok xyiibʼankil jun li nimla ochoch li taqlanbʼilebʼ wiʼ xbʼaanebʼ laj Nemrod. Abʼan, li Yos kixram chiruhebʼ. Chanru kixbʼaanu? Li Yos kixbʼaanu naq ebʼ laj Babel malaj ebʼ laj Babilonia teʼoq chi aatinak saʼ jalan jalanq chi aatinobʼaal. Ut naq inkʼaʼ chik keʼxtaw ru kʼaru nekeʼxye chiribʼilebʼ ribʼ, keʼxjekʼi ribʼebʼ.

(Isinbʼil chaq saʼ Genesis tasal 6-11 ut saʼ Judas 14, 15.)