Ebʼ li Apostol lnkʼaʼ Keʼxuwak chi Puktesink

AK LAJEEBʼ kutan xtaqeʼjik li Jesus saʼ choxa, naq ebʼ laj Judiiy keʼxnima li Pentecostes saʼ li chihabʼ 33, maare 120 li xtzolom li Jesus keʼxchʼutubʼ ribʼ Jerusalen saʼ jun li ochoch. Tojaʼ naq keʼrabʼi jun li nimla iqʼ ut ebʼ li tzolom keʼok chi aatinak saʼebʼ li aatinobʼaal li maawaʼ rehebʼ. Keʼxkʼul aʼin xbʼaan naq li Yos kixtaqla li xsantil musiqʼej saʼ xbʼeenebʼ.

Naabʼalebʼ li poyanam li keʼkʼulunk saʼ li ninqʼe chalenaqebʼ saʼ jalan jalanq chi tenamit. Sachsookebʼ xchʼool keʼkanaak naq ebʼ li xtzolom li Jesus keʼok chi aatinak rikʼinebʼ saʼebʼ li raatinobʼaal. Re xchʼolobʼankil chiruhebʼ li yook chi kʼulmank, laj Pedro kixjultika rehebʼ naq li propeet Joel kixye chaq naq li Yos tixhoy li xsantil musiqʼej saʼ xbʼeenebʼ li xmoos re naq teʼruuq xbʼaanunkil xninqal ru naʼlebʼ (Joel 2:28, 29). Ebʼ li sachbʼachʼoolej aʼin keʼxkʼutbʼesi naq saʼ xbʼeen li xtzolom li Jesus wank li rusilal li Yos ut maawaʼ saʼ xbʼeenebʼ laj Israel. Chalen chaq saʼ li chihabʼ aʼin, ebʼ li keʼraj xloqʼoninkil li Yos tento teʼxpaabʼ li Kriist.

Ebʼ li xikʼ keʼilok chaq re li Kriist, keʼok xrahobʼtesinkil ebʼ li xtzolom. Saʼ jun kutan, wiibʼ oxibʼ rehebʼ li tzolom keʼchʼikeʼk saʼ tzʼalam ut saʼ li qʼoqyink ajwiʼ aʼin, jun li anjel kirisihebʼ ut kixye rehebʼ naq inkʼaʼ teʼxkanabʼ puktesink. Naq kisaqew, keʼok saʼ li rochoch li Yos ut keʼok chi aatinak chirix li Jesus. Ebʼ laj kʼamol bʼe saʼebʼ li paabʼal keʼchalk xjosqʼil ut keʼok xyeebʼal rehebʼ li tzolom naq teʼxkanabʼ puktesink. Ebʼ li Apostol chi maakʼaʼebʼ xxiw keʼxye: «Xbʼeen xbʼeen tento xpaabʼankil li Yos, ut inkʼaʼ ebʼ li winq» (Hechos 5:28, 29).

Ebʼ li xikʼ nekeʼilok chaq inkʼaʼ keʼxkanabʼ xrahobʼtesinkilebʼ, keʼxkʼe bʼan xtzʼaqobʼ li xrahilalebʼ. Ebʼ laj Judiiy li keʼxqʼabʼa laj Esteban, keʼxkamsi chi pek. Laj Saulo re Tarso wank chaq saʼ xyanqebʼ li keʼilok re chanru keʼxkamsi laj Esteban. Laj Saulo xikʼ yook chaq rilbʼalebʼ laj paabʼanel. Ak xkʼulmank aʼin naq laj Saulo xkoho Damasco re xchʼikbʼalebʼ laj paabʼanel saʼ tzʼalam. Toj yook ajwiʼ chi xik naq li xsaqenk li Yos kimutzʼobʼresink re. Tojaʼ naq kiʼaatinaak: «At Saúl, at Saúl, kʼaʼut [...] xikʼ yookat chi wilbʼal?». Sachso kikanaak, ut kixye: «Anihat». Ut kiyeheʼk re: «Laaʼin li Jesus» (Hechos 9:3-5).

Ak oxibʼ kutan xkʼulbʼal aʼin, naq li Jesus kixtaqla laj Ananias, jun rehebʼ li xtzolom, re naq tixkʼe chi ilok laj Saulo. Laj Saulo kisubʼeʼk saʼ haʼ ut kiʼok xpuktesinkil li chaabʼil esilal chi anchal xchʼool. Moqon chik kinawmank ru joʼ li Apostol Pablo ut kixbʼeeni naabʼal li naʼajej.

Saʼ xtiklajik, ebʼ li xtzolom li Jesus kaʼajwiʼ keʼxpuktesi li Xʼawabʼejilal li Yos rehebʼ laj Judiiy ut ebʼ laj Samaria. Abʼan saʼ jun kutan, jun li anjel kixkʼut ribʼ chiru laj Cornelio li nakʼamok chaq bʼe saʼ xyanqebʼ laj puubʼ re Roma re naq tixtaqla xbʼoqbʼal li Apostol Pedro. Laj Cornelio naxpaabʼ chaq li tzʼaqal Yos. Laj Pedro kixkʼam chirix wiibʼ oxibʼ rehebʼ li xtzolom li Jesus ut kixpuktesi li chaabʼil esilal re laj Cornelio ut re li xjunkabʼal. Naq li Apostol yook chi aatinak rikʼinebʼ, keʼok xkʼulbʼal li santil musiqʼej. Ut naq keʼxkʼul aʼin laj Pedro kixye naq teʼsubʼeʼq saʼ haʼ saʼ xkʼabʼaʼ li Jesus. Chalen chaq saʼ li kutan aʼin, yalaq ani, maakʼaʼ naxye bʼar chalenaq, truuq xtawbʼal li junelik yuʼam. Ut li chaabʼil esilal tpuktesimanq saʼ chixjunil li Ruuchichʼochʼ.

(Isinbʼil chaq saʼ Hechos 1:1–11:21.)