Chanru xtuqubʼankil ebʼ li chʼaʼajkilal

Naq jun li winq ut jun li ixq nasumlaak, nachalk li chʼaʼajkilal saʼ xbʼeenebʼ xbʼaan naq moko juntaqʼeet ta xkʼaʼuxebʼ, li reekʼahom malaj li xkʼirisinkilebʼ. Maare li chʼaʼajkilal nachalk saʼ xkʼabʼaʼ jalanebʼ chik.

Wank sut li sumsukebʼ nekeʼxkanabʼ naq li xnaʼ xyuwaʼ malaj ebʼ li xkomon teʼtuqubʼanq re ebʼ li xchʼaʼajkilal. Abʼan li Santil Hu naxye naq laaʼo tqasikʼ xyaalal (Mateo 5:23, 24). Wi nekeeyuʼami li naʼlebʼ li naxkʼe li Santil Hu, us texwanq.

1. AATINAN CHIRIX LI CHʼAʼAJKILAL

LI NAXYE LI SANTIL HU: «Wank xqʼehil li aatinak» (Eclesiastes 3:1, 7). Taakʼe aahoonal re aatinak chirix li chʼaʼajkilal; taaye re laasumʼaatin kʼaru nakaaweekʼa ut nakaakʼoxla chirix aʼin. Junelik taaye re li yaal (Efesios 4:25). Usta yooq aajosqʼil, matpleetik. Wi tatsumenq saʼ xyaalal, inkʼaʼ tnimanq ru li chʼaʼajkilal (Proverbios 15:4; 26:20).

Usta inkʼaʼ twulaq chaawu li naxye laasumʼaatin, maakanabʼ raatinankil saʼ tuulanil; xraabʼal ut roxloqʼinkil (Colosenses 4:6). Saʼ junpaat taatuqubʼ ru li chʼaʼajkilal, ut meekanabʼ raatinankil eeribʼ (Efesios 4:26).

NARU NAKAABʼAANU AʼIN:

• Sikʼ junaq li hoonal re naq texʼaatinaq chirix li chʼaʼajkilal

• Naq laasumʼaatin yooq chi aatinak, maachʼik aawibʼ. Twulaq xhoonal naq tat-aatinaq

2. ABʼI UT TAAW RU LI NAXYE

LI NAXYE LI SANTIL HU: «Chera eeribʼ cheribʼil eeribʼ chekʼoxla naq qʼaxal kaʼloqʼ oxloqʼebʼ leekomon» (Romanos 12:10). Aajel ru naq taatzol rabʼinkil ut xtawbʼal chanru nakʼoxlak laasumʼaatin. Joʼ naxye li Santil Hu: «Chetoqʼobʼa eeru cheribʼil eeribʼ, cherahaq leeras eeriitzʼin, chexʼuxtaananq u ut qʼunaqex» (1 Pedro 3:8; Santiago 1:19). Maabʼaanu aawibʼ naq yookat rabʼinkil. Wi naru, us raj naq taakanabʼ xbʼaanunkil laakʼanjel ut taakʼe aachʼool chi rabʼinkil laasumʼaatin, malaj taapatzʼ re ma naru texʼaatinaq joʼ wank. Wi nakaawil laasumʼaatin joʼ aawamiiw, inkʼaʼ tatpoʼq rikʼin saʼ junpaat (Eclesiastes 7:9).

NARU NAKAABʼAANU AʼIN:

• Abʼi laasumʼaatin usta inkʼaʼ twulaq chaawu li naxye

• Taw ru kʼaru tzʼaqal naraj xyeebʼal. Il chanru naʼaatinak ut li xyaabʼ xkux

3. MAAKANABʼ XKʼEEBʼAL AAQʼE

LI NAXYE LI SANTIL HU: «Us naʼelk li ani naxkʼe xchʼool chi kʼanjelak; aʼut li junes aatinak naxbʼaanu, wank saʼ nebʼaʼil» (Proverbios 14:23). Moko tzʼaqal ta naq teenaw chanru xtuqubʼankil leechʼaʼajkilal, tento bʼan teeyuʼami. Yaal naq chʼaʼaj xbʼaanunkil abʼan teetaw rusilal (Proverbios 10:4). Wi nekeekʼe eeqʼe saʼ wiibʼal, «qʼaxal us» texʼelq (Eclesiastes 4:9).

NARU NAKAABʼAANU AʼIN:

• Kʼoxla kʼaru teebʼaanu re xtuqubʼankil li chʼaʼajkilal

• Rajlal taatzʼil rix ma yookex chi usaak