LI NEKEʼXPATZʼ EBʼ LI SAAJ
Kʼaʼut us wulak saʼebʼ li chʼutam li nabʼaanumank saʼebʼ li Chʼutlebʼaal Kabʼl?
Ebʼ laj testiiw re li Jehobʼa nekeʼxchʼutubʼ ribʼ wiibʼ sut chiru li xamaan saʼ li naʼaj li nekeʼxkʼabʼaʼi Chʼutlebʼaal Kabʼl. Kʼaru nekeʼxbʼaanu aran? Kʼaru rusilal taataw wi tatwulaq saʼebʼ li chʼutam aʼan?
Kʼaru nabʼaanumank saʼ jun li Chʼutlebʼaal Kabʼl?
Li Chʼutlebʼaal Kabʼl aʼan jun li naʼaj bʼarwiʼ nakʼutmank chanru xyuʼaminkil li naʼlebʼ li natawmank saʼ li Santil Hu. Ebʼ li chʼutam li nabʼaanumank aran tateʼxtenqʼa re:
Xtzolbʼal li yaal chirix li Yos.
Xtawbʼal xyaalal ebʼ li naʼlebʼ li yook chi kʼulmank saʼebʼ li qakutan.
Xchaabʼilobʼresinkil laanaʼlebʼ.
Xtawbʼal ebʼ li tzʼaqal amiiw.
Ma nakaanaw? Ebʼ laj testiiw re li Jehobʼa nekeʼchʼutlaak saʼebʼ li naʼaj li naxkʼabʼaʼi «Chʼutlebʼaal Kabʼl Rehebʼ laj Testiiw re li Jehobʼa» bʼarwiʼ nekeʼxkʼe xwankil li Xʼawabʼejilal li Yos (Mateo 6:9, 10; 24:14; Lucas 4:43).
Kʼaʼut us raj naq tatwulaq saʼebʼ li chʼutam?
Li nayeemank aran tatxtenqʼa. Li naʼlebʼ li natzʼilmank rix saʼebʼ li xchʼutam ebʼ laj testiiw re li Jehobʼa chalenaq saʼ li Santil Hu ut tatxtenqʼa chi xtawbʼal «li chaabʼil naʼlebʼ» (Proverbios 4:5, Li Santil Hu, Sociedad Bíblica de Guatemala). Aʼin naraj xyeebʼal naq li Santil Hu truuq aatenqʼankil re naq us tatnaʼlebʼaq saʼ laayuʼam. Joʼ ajwiʼ naxsume wiibʼ oxibʼ li patzʼom li jwal wank xwankil joʼ aʼin:
Aʼin wiibʼ oxibʼ li xkʼabʼaʼ li seeraqʼ li nakʼemank saʼ xraqik li xamaan:
Kʼaʼut tento tqakanabʼ naq li Santil Hu tooxbʼeresi?
Ani naru nokooxtenqʼa naq wanko saʼ rahilal?
Kʼaru yook xbʼaanunkil li Xʼawabʼejilal li Yos chiqix?
«Jun li wechtzolom kiwulak saʼ jun li qachʼutam. Kichunlaak rikʼin linjunkabʼal ut xqawotz rikʼin ebʼ li tasal hu. Moqon kixye we naq kisach xchʼool chi rilbʼal naq naabʼalebʼ nekeʼtzʼaqonk naq naʼuxk li patzʼok. Ut kixye ajwiʼ naq saʼ li xʼiklees maakʼaʼ ebʼ li kʼanjelobʼaal re tzolok joʼ wank qe laaʼo» (Brenda).
Ma nakaanaw? Sibʼil li ok saʼebʼ li Chʼutlebʼaal Kabʼl ut inkʼaʼ napatzʼmank tumin.
Ebʼ li kristiʼaan li taanawebʼ ru teʼxwaklesi aachʼool. Li Santil Hu naxye naq jun xyaalal kʼaʼut naq ebʼ laj paabʼanel nekeʼxchʼutubʼ ribʼ aʼan re xwaklesinkilebʼ xchʼool chiribʼilebʼ ribʼ (Hebreos 10:24, 25). Jwal nawaklesink chʼoolej rilbʼal naq wankebʼ kristiʼaan li nekeʼxkʼe xchʼool chirix li Yos ut chirix ebʼ li junchʼol saʼ li ruuchichʼochʼ aʼin bʼarwiʼ li xkʼihalil ebʼ li kristiʼaan kaʼajwiʼ nekeʼxsikʼ li us choʼq rehebʼ.
«Wank sut ra inchʼool ut lubʼlukin naq naraqeʼk li kutan, abʼan ebʼ li nekeʼwulak saʼ li Chʼutlebʼaal Kabʼl nekeʼxwaklesi inchʼool. Ut naq ninsutqʼiik saʼ li wochoch sa chik linchʼool ut kawresinbʼilin choʼq re li jun chik kutan» (Elisa).
Ma nakaanaw? Saʼ chixjunil li Ruuchichʼochʼ wank numenaq 120,000 chi chʼuut rehebʼ laj testiiw re li Jehobʼa ut numenaq 60,000 li naʼaj bʼarwiʼ naʼuxk ebʼ li chʼutam. Rajlal chihabʼ nakabʼlamank kachʼin chik ma 1,500 chi Chʼutlebʼaal Kabʼl, xbʼaan naq yook chi kʼiik li xkʼihalil li kristiʼaan li nekeʼwulak saʼebʼ li chʼutam.a
a Wi nakaawaj xnawbʼal bʼar wank jun li naʼaj bʼarwiʼ naʼuxk li chʼutam, sikʼ saʼ «Ebʼ li chʼutam rehebʼ laj Testiiw re li Jehobʼa» ut pitzʼ bʼarwiʼ naxye «Sikʼ li nachʼ chaakʼatq».