Ebʼ li bʼich nokooʼeʼxtenqʼa chi jilok chixkʼatq li Yos

Ebʼ li bʼich aʼan jun maatan li nachalk rikʼin li Jehobʼa. Naxbʼaanu naq toonaʼlebʼaq chiʼus, naxwaklesi ut naxsahobʼresi qachʼool. Aʼan aʼin li naqekʼa naq naqabʼi ebʼ li bʼich joʼ li wank saʼ JW Broadcasting®. Ebʼ li bʼich aʼin naxbʼaanu naq toojiloq chixkʼatq li Jehobʼa.

Chalen li chihabʼ 2014 kikʼubʼamank numenaq 70 ebʼ li bʼich, jun rehebʼ aʼin natawmank saʼ numenaq 500 chi aatinobʼaal. Maare nakaakʼoxla: «Chanru nakʼubʼamank ebʼ li bʼich aʼin? Ani nekeʼkʼubʼank re?».

Li kʼanjel li inkʼaʼ naʼilmank

Li chʼuut li naril li natzolmank re li Nekeʼjolomink re Xmolam li Jehobʼa, li xaqabʼanbʼilebʼ chirix li bʼich, li xyaabʼ kuxej ut bʼideo nekeʼxkʼubʼ ebʼ li bʼich joʼ li natawmank saʼ JW Broadcasting ut jalan chik. Li xaqabʼanbʼilebʼ chirix li bʼich aʼanebʼ 13 li hermaan li nekeʼxkʼubʼ, nekeʼxtzʼiibʼa, nekeʼril li yaabʼ kuxej ut jalan chik li kʼanjel li naʼajmank. Joʼkan ajwiʼ li chʼuut li naril li natzolmank kixkʼulubʼa naq ebʼ li hermaan re chixjunil li ruuchichʼochʼ, teʼtenqʼanq saʼebʼ li rochoch re naq truuq chi bʼaanumank li kʼanjel aʼin. Saʼ xyanqebʼ aʼin wankebʼ li nekeʼtzʼiibʼak, nekeʼwajbʼak ut nekeʼbʼichank. Ebʼ li hermaan aʼin nekeʼxkubʼsi ribʼ ut inkʼaʼ nekeʼxsikʼ naq teʼnimaaq ru.

Chanru nakʼubʼamank ebʼ li bʼich? Li chʼuut li naril li natzolmank xbʼeenwa, naxsikʼ bʼar wank xraqal li Santil Hu li t-elq wiʼ chaq li bʼich ut chanru trekʼasihebʼ xchʼoolebʼ li teʼabʼinq re. Ebʼ li hermaan li xaqabʼanbʼilebʼ chirix li bʼich nekeʼxsikʼ ani teʼyiibʼanq re li xsonil ut li teʼkʼubʼanq re li xtzʼiibʼ. Moqon chik nekeʼxxok chan raj ru tkanaaq re naq tril li chʼuut li naril li natzolmank re naq teʼxye li nekeʼxkʼoxla chirix li bʼich. Chirix chik aʼan, ebʼ li xaqabʼanbʼilebʼ chirix li bʼich nekeʼxyiibʼ li naʼajmank ut nekeʼxxok joʼ chanru tkanaaq. Ebʼ li bʼich wank sut naxokmank saʼebʼ li qamolam malaj saʼ jalan chik ebʼ li ochoch.

Re xtzʼiibʼankil ut xxokbʼal ebʼ li bʼich, ebʼ li hermaan nekeʼroksi jalan jalanq li naʼlebʼ joʼ li kʼanjelobʼaal re xxokbʼal li xyaabʼ kuxej ut ebʼ li tzʼiibʼ li natawmank saʼ li ulul chʼiichʼ. Joʼkan ajwiʼ naʼajmank jalan chik li kʼanjelobʼaal joʼebʼ li bʼosiin, li micrófono ut jalan chik. Li junjunq chi micrófono maare 100 malaj 1,000 dólar xtzʼaq. Saʼ li chihabʼ 2020 xsachmank 116,000 dólar re xloqʼbʼal li kʼanjelobʼaal bʼarwiʼ naxokmank li xyaabʼ kuxej.

Kʼaru nabʼaanumank re naq moko naabʼal ta chik tsachmanq? Ebʼ li hermaan moko nekeʼkʼanjelak ta chik arin Betel rikʼinebʼ li xaqabʼanbʼilebʼ chirix li bʼich, napatzʼmank bʼan li xtenqʼ ebʼ li hermaan li nekeʼkʼanjelak saʼ rochoch. Joʼkan ajwiʼ, moko nekeʼwank ta chik naabʼal li hermaan arin re wajbʼak, nakʼubʼamank bʼan li xson li bʼich saʼebʼ li ulul chʼiichʼ.

«Ebʼ li bʼich kʼajoʼ nikinxtenqʼa»

Ebʼ li hermaan kʼajoʼ nekeʼwulak chiru rabʼinkil ebʼ li bʼich. Jun eetalil, li xTara, li wank Alemania, naxye: «Naq yook inkʼaʼuxl, ebʼ li bʼich naxkʼojobʼ inchʼool. Ut naq nawabʼi saʼ li waatinobʼaal, nawekʼa naq li Jehobʼa chanchan tawiʼ yook inqʼalunkil». Laj Dimitri, li wank Kazajistán, naxye: «Nawulak chiwu rabʼinkil ebʼ li bʼich ut inkʼaʼ naxkʼe inkʼaʼuxl li naxye, xbʼaan naq ninnaw naq naxchap ribʼ rikʼin li Santil Hu. Joʼkan ajwiʼ, ebʼ li bʼich nikinxtenqʼa re naq junelik yooqin xkʼebʼal inchʼool chirix linkʼanjel saʼ li xtenamit li Jehobʼa».

Li xDelia, li wank Sudáfrica, naxye li narekʼa chirix ebʼ li bʼich: «Ebʼ li bʼich kʼajoʼ nikineʼxtenqʼa. Naq ra inchʼool malaj wank junaq linchʼaʼajkilal, junelik wank junaq li bʼich li nawulak saʼ xhoonalil. Wank sut, kaʼajwiʼ nawabʼi li xsonil, ak sa chik nawekʼa wibʼ».

Wiibʼ oxibʼ rehebʼ li bʼich aʼin jwal nawulak chiruhebʼ li hermaan. Laj Lerato, li wank ajwiʼ Sudáfrica, naxye: «Ebʼ li bʼich Nachʼ wank chaq! ut Saʼ li akʼ ruuchichʼochʼ naxbʼaanu naq tinkʼoxla rix li kutan naq twil wiʼ chik ru linnaʼ. Rajlal naq nawabʼi li bʼich, nawil chanru linnaʼ yook chi chalk saʼ aanil re inqʼalunkil».

Wank jun li bʼich li kitenqʼank re jun li saaj, li wank Sri Lanka. Aʼan naxye: «Laj kʼutunel xinxkʼe saʼ xutaan chiruhebʼ li wechtzolom xbʼaan naq laaʼin aj testiiw re li Jehobʼa. Saʼ xkʼabʼaʼ linxiw maakʼaʼ xinruuk xyeebʼal. Naq xinwulak saʼ li wochoch, linnaʼ kixye we naq twabʼi li bʼich Fuerte tú serás. Li bʼich aʼin xinxtenqʼa chi xkʼebʼal reetal naq tento tinsikʼ xkomon innaʼlebʼ ut tinkʼubʼ wibʼ re naq tinnaw kʼaru xyeebʼal. Wulajaq chik, xinʼaatinak rikʼin laj kʼutunel. Kixkʼe xchʼool chi wabʼinkil ut kixye naq anaqwan naxtaw chik ru linpaabʼal. Qʼaxal ninbʼanyoxi re li xmolam li Jehobʼa naq naxkʼubʼ ebʼ li bʼich li naxwaklesi qachʼool».

Bʼar nachalk li tumin re xbʼaanunkil chixjunil ebʼ li bʼich aʼin? Saʼ li tenqʼ tumin li nakʼemank saʼ li kʼanjel re chixjunil li ruuchichʼochʼ rikʼin li jalan jalanq chi naʼlebʼ li natawmank saʼ donate.jw.org. Qʼaxal naqabʼanyoxi naq nekeʼxkʼehok chi anchal eechʼool.