Rajlal kutan chi miyon ebʼ li kristiʼaan raachisa natzʼaqlok li xtuminebʼ re wulak saʼ xraqik li po. Ut ebʼ li chʼaʼajkilal li nakʼulmank saʼ ruuchichʼochʼ naxbʼaanu naq tchʼaʼajkoʼq li wanjik. Kʼaʼut?
Naq nanumtaak li chʼaʼajkilal saʼ junaq li naʼaj, naterqʼuk xtzʼaq li tzekemq ut li ochoch.
Raachisa xtawbʼal li kʼanjel ut moko us ta nekeʼtojok.
Li hiik, li kaqsut-iqʼ malaj jalan chik li rahilal naxjukʼ ebʼ li kʼayibʼaal, ebʼ li ochoch malaj jalan chik li kʼaʼaq re ru li wank rehebʼ li qas qiitzʼin. Aʼin naru naxbʼaanu naq teʼkanaaq saʼ nebʼaʼil.
Ma nakaanaw?
Wi nakaawoksi chiʼus laatumin, ak kawresinbʼilat naq tchalq junaq li chʼaʼajkilal.
Jultikaq aawe naq li tumin ut li junkabʼlal naru nakubʼeek xtzʼaq.
Jultika naq li sahil chʼoolejil ut li junajil saʼ laajunkabʼal moko taataw ta rikʼin tumin.
Kʼaru tatruuq xbʼaanunkil?
Li Santil Hu naxye: «Wi wank qatzekemq ut qabʼaatal, kʼojkʼooq qachʼool rikʼin aʼan» (1 Timoteo 6:8).
Wi sa qachʼool moko naraj ta xyeebʼal naq wank qe chixjunil li naqaj, sa bʼan qachʼool saʼ xkʼabʼaʼ naq wank qe li naʼajmank. Qʼaxal aajel wiʼ chik ru xjultikankil aʼin naq maakʼaʼ qatumin.
Maare aajel ru xjalbʼal wiibʼ oxibʼ li naʼlebʼ saʼ laayuʼam re naq sahaq saʼ laachʼool. Wi li nakaasach naxqʼax ru li nakaakʼul, tatkanaaq chi maakʼaʼ chik aatumin.