XNUMTAAK LI CHʼAʼAJKILAL

3 | Kʼe aachʼool chirix laajunkabʼal

KʼAʼUT WANK XWANKIL?

Naabʼalebʼ li kristiʼaan inkʼaʼ chik nekeʼxkʼe xchʼool chirix li xjunkabʼal naq nanumtaak li chʼaʼajkilal.

Ebʼ li kristiʼaan nekeʼraj wank xjunes.
Ebʼ li sumsukebʼ kokʼaj xsaʼ nekeʼxchoqi ribʼ.
Ebʼ li naʼbʼej yuwaʼbʼej inkʼaʼ nekeʼxkʼe xchʼool malaj maakʼaʼ nekeʼraj re li nekeʼxkʼul li ralal xkʼajol.

Ma nakaanaw?

Naq wanko saʼ chʼaʼajkilal, qʼaxal us naq wanqebʼ qamiiw xbʼaan naq nokooʼeʼxtenqʼa re naq tkotzq li qakʼaʼuxl ut sa tqekʼa qibʼ.
Naq nanumtaak li xkʼaʼuxl li junkabʼal nekeʼxkʼul yalaq kʼaru li chʼaʼajkilal.
Ebʼ laakokʼal naru nekeʼchʼaʼajkiik xbʼaan li esil li nekeʼrabʼi chirix li maaʼusilal ut li rahilal.

Kʼaru tatruuq xbʼaanunkil?

Li Santil Hu naxye: «Li tzʼaqal amiiw junelik narahok; saʼ xqʼehil junaq rahilal tatxtenqʼa joʼ junaq tzʼaqal asbʼej» (Proverbios 17:17).

Aatinan rikʼin junaq laawamiiw li naxtaw aawu ut naxkʼe aachaabʼil naʼlebʼ. Xnawbʼal naq raarokat tatxtenqʼa chi xkuybʼal ut xqʼaxbʼal ru yalaq kʼaru li chʼaʼajkilal.

CHANRU XQʼAXBʼAL RU? Wiibʼ oxibʼ li naʼlebʼ

Re xkolbʼal laajunkabʼal naq wank li chʼaʼajkilal, bʼaanu ebʼ li naʼlebʼ aʼin

KʼE AACHʼOOL CHIRIX LAASUMLAJIK

Kʼe aachʼool chirix laasumlajik

Li Santil Hu naxye: «Qʼaxal us naq teʼkʼanjelaq wiibʼ poyanam chiru naq taakʼanjelaq junaq xjunes [...]. Ut wi li jun taatʼaneʼq, li jun chik tixwaklesi li rochbʼeen» (Eclesiastés 4:9, 10). Li sumsukebʼ tento teʼril ribʼ joʼ wiibʼ laj bʼatzʼunel li wankebʼ saʼ jun li chʼuut li wotz nekeʼkʼanjelak re elk chiʼubʼej, moko teʼril ta ribʼ joʼ jun li nabʼatzʼunk saʼ jalan chik li chʼuut li tento tixqʼax ru.

Meechoqi eeribʼ yal saʼ xkʼabʼaʼ naq wank eechʼaʼajkilal. Us bʼan texʼelq wi wank eekuyum.
Jun sut chiru li xamaan chexʼaatinaq chirix leechʼaʼajkilal. Meeqʼabʼa eeribʼ cheeribʼil eeribʼ, sikʼomaq bʼan chanru xtuqubʼankil ru li chʼaʼajkilal.
Sikʼomaq eehoonal re xbʼaanunkil li nawulak cheeru saʼ kabʼichal.
Cheejultika li kutan naq sa chaq eechʼool. Maare texruuq rilbʼal li jalam u re leesumlajik malaj junaq chik bʼarwiʼ wankex saʼ kabʼichal.

«Maare moko junelik ta juntaqʼeet nekeʼnaʼlebʼak li sumsukebʼ, abʼan aʼin moko naraj ta xyeebʼal naq inkʼaʼ nekeʼruuk kʼanjelak saʼ junajil. Naru teʼxbʼaanu junaq li naʼlebʼ saʼ kabʼichal ut xyalbʼal xqʼe re naq us t-elq» (Laj David).

KʼE AACHʼOOL CHIRIXEBʼ LAAWAMIIW

Kʼe aachʼool chirixebʼ laawamiiw

Maawoybʼeni naq kaʼajwiʼ laaʼat teʼxwaklesi aachʼool. Waklesi ajwiʼ xchʼoolebʼ laawamiiw. Wi taabʼaanu aʼin sa taawekʼa aawibʼ.
Rajlal kutan naru tat-aatinaq rikʼin junaq laawamiiw re xnawbʼal chanru wank.
Patzʼ rehebʼ laawamiiw kʼaru xeʼxbʼaanu re xnumsinkil junaq li chʼaʼajkilal joʼ li yookat xnumsinkil laaʼat.

«Ebʼ li chʼaʼajkilal chanchan jun li kawil habʼ. Naq li habʼ ut li iqʼ inkʼaʼ nakatxkanabʼ chi xtawbʼal laabʼe, ebʼ laawamiiw naru nakateʼxbʼeresi. Wank sut yal nakaawaj naq teʼxjultika aawe junaq li naʼlebʼ li ak nakaanaw. Ebʼ laawamiiw nakateʼxra ut nekeʼxnaw naq nakaarahebʼ ajwiʼ» (Li xNicole).

CHAATAW RUHEBʼ LAAWALAL AAKʼAJOL

Chaataw ruhebʼ laawalal aakʼajol

Li Santil Hu naxye: «Li junjunq seebʼaq xchʼool chi abʼink, chixkuyaq ribʼ chi aatinak» (Santiago 1:19). Maare ebʼ laakokʼal moko teʼxye ta aawe junaq li naʼlebʼ li naxkʼe xkʼaʼuxebʼ. Abʼanan, wi nakaakʼe aachʼool chi rabʼinkilebʼ moko tchʼaʼajkoʼq ta chiruhebʼ xyeebʼal li nekeʼxkʼoxla.

Cheetenqʼa leekokʼal re naq sa teʼaatinaq. Wiibʼ oxibʼ li kokʼal sa nekeʼrekʼa ribʼ chi aatinak naq yookebʼ chi bʼihajik malaj yookebʼ chi bʼeek maawaʼ naq nekeʼmineʼk ru chi aatinak.
Weent taabʼaanu re naq ebʼ laakokʼal moko junelik ta yooqebʼ rilbʼal li yibʼ aj esil.
Ye rehebʼ kʼaru yookat xbʼaanunkil re xkolbʼal li junkabʼal.
Xaqabʼ li taabʼaanu saʼ xhoonal junaq li chʼaʼajkilal ut kʼut chiruhebʼ laakokʼal chanru xbʼaanunkil.

«Kʼe aahoonal re aatinak rikʼinebʼ laakokʼal ut kanabʼ naq teʼxye aawe li nekeʼxkʼoxla, maare yookebʼ xkʼaʼuxl, xxiw malaj xjosqʼilebʼ ut maajiʼ nekeʼxye aawe. Seeraqʼi rehebʼ naq wank sut joʼkaʼin ajwiʼ nakaawekʼa aawibʼ ut ye rehebʼ li xaabʼaanu re naq sa taawekʼa aawibʼ» (Li xBethany).