TZOLOM 23
Naq tkubʼeeq aahaʼ taakʼul naabʼal li osobʼtesihom
Li Jesús kixye naq ebʼ li tzʼaqal aj paabʼanel tento teʼkubʼeeq xhaʼ (yaabʼasi Mateo 28:19, 20). Abʼan, kʼaru li kubʼihaʼ? Ut, kʼaru tento tixbʼaanu junaq li kristiʼaan li naraj naq tkubʼeeq xhaʼ?
1. Kʼaru li kubʼihaʼ?
Li aatin kubʼihaʼ chalenaq saʼ li aatinobʼaal griego li naraj xyeebʼal «subʼeʼk» saʼ haʼ. Naq kikubʼeek xhaʼ li Jesús kisubʼeʼk saʼ li nimaʼ Jordán tojaʼ naq kiʼelk chaq «saʼ li haʼ» (Marcos 1:9, 10). Joʼ kixbʼaanu li Jesús joʼkan ajwiʼ nekeʼkubʼeek xhaʼ ebʼ li tzʼaqal aj paabʼanel.
2. Kʼaru naxkʼutbʼesi junaq li kristiʼaan li nakubʼeek xhaʼ?
Naq junaq nakubʼeek xhaʼ naxkʼutbʼesi naq ak xqʼaxtesi li xyuʼam re li Jehobʼa. Kʼaru naraj xyeebʼal xqʼaxtesinkil laayuʼam re li Jehobʼa? Aʼin nabʼaanumank naq nakattijok chiru li Jehobʼa aajunes naq toj maajiʼ nakubʼeek aahaʼ ut nakaaye re naq kaʼajwiʼ chiru aʼan tatkʼanjelaq. Nakaaye re naq kaʼajwiʼ aʼan taaloqʼoni ru ut taakʼe chiʼubʼej saʼ laayuʼam li rajom. Joʼkan ajwiʼ nakaakʼulubʼa xbʼaanunkil li naxye li Jesús: «Wi ani naraj intaaqenkil, mixra ribʼ, [...] chinxtaaqehaq» (Mateo 16:24). Saʼ xkʼabʼaʼ li qʼaxtesink ibʼ ut li kubʼihaʼ junaq li kristiʼaan naru nawank saʼ amiiwil rikʼin li Jehobʼa ut rikʼinebʼ li rechpaabʼanel.
3. Kʼaru tento tixbʼaanu junaq li qas qiitzʼin li toj maajiʼ nakubʼeek xhaʼ?
Naq toj maajiʼ nakubʼeek aahaʼ aajel ru naq taanaw ru chiʼus li Jehobʼa ut taakawresi laapaabʼal (yaabʼasi Hebreos 11:6). Naq yooq chi kʼiik laapaabʼal ut laanawom qʼaxal taara li Jehobʼa. Aʼin tixbʼaanu naq t-aalaq saʼ laachʼool aatinak chirix li yookat xtzolbʼal ut xyuʼaminkil li xchaqʼrabʼ li Yos (2 Timoteo 4:2; 1 Juan 5:3). Naq junaq li kristiʼaan nawank «joʼ chanru xkʼulubʼ li Qaawaʼ» naru naxqʼaxtesi li xyuʼam chiru li Jehobʼa ut tkubʼeeq xhaʼ (Colosenses 1:9, 10).a
QASIKʼAQ XCHAMAL LI NAʼLEBʼ
Qilaq kʼaru tooruuq xtzolbʼal chirix li xkubʼihaʼ li Jesús ut chanru truuq junaq li kristiʼaan xkawresinkil ribʼ re xbʼaanunkil li naʼlebʼ aʼin li jwal wank xwankil.
4. Kʼaru naqatzol chirix li xkubʼihaʼ li Jesús
Re xnawbʼal xkomon li naʼlebʼ chirix li xkubʼihaʼ li Jesús, cheeyaabʼasi Mateo 3:13-17. Moqon chexʼaatinaq chirix ebʼ li patzʼom aʼin:
Ma toj neneʼ malaj kʼuulaʼal chaq li Jesús naq kikubʼeek xhaʼ?
Chanru kikubʼeek xhaʼ li Jesús? Ma yal xeʼxrachrachi bʼayaq li haʼ saʼ xjolom?
Naq kikubʼeek xhaʼ li Jesús kixtikibʼ li nimla kʼanjel li qʼaxtesinbʼil saʼ ruqʼ xbʼaan li Yos. Cheeyaabʼasi Lucas 3:21-23 ut Juan 6:38 ut chexʼaatinaq chirix li patzʼom aʼin:
Naq ak xkubʼeek xhaʼ, kʼaru li kʼanjel kixkʼe chiʼubʼej li Jesús?
5. Yal aaqʼe re naq tkubʼeeq aahaʼ
Saʼ xtiklajik maare tatxuwaq chi xkʼoxlankil naq taaqʼaxtesi laayuʼam re li Jehobʼa ut tkubʼeeq aahaʼ. Abʼan wi laaʼat nakaatzol xkomon laanaʼlebʼ chirix li Jehobʼa ut taanaw ru chiʼus t-alaaq saʼ laachʼool xqʼaxtesinkil laayuʼam chiru ut xkubʼsinkil aahaʼ. Re xnawbʼalebʼ ru wiibʼ oxibʼ li kristiʼaan li xeʼxbʼaanu aʼin, cheerilaq li BʼIDEO.
Cheeyaabʼasi Juan 17:3 ut Santiago 1:5 ut chexʼaatinaq chirix li patzʼom aʼin:
Kʼaru ttenqʼanq re junaq li kristiʼaan re naq tixkawresi ribʼ re naq tkubʼeeq xhaʼ?
Naq naqaqʼaxtesi li qayuʼam re li Jehobʼa naqaye naq kaʼajwiʼ chiru aʼan tookʼanjelaq.
Naq nakubʼeek qahaʼ naqakʼutbʼesi chiruhebʼ li junchʼol naq ak xqaqʼaxtesi li qayuʼam chiru li Jehobʼa.
6. Naq nakubʼeek xhaʼ junaq li kristiʼaan naʼokenk saʼ xtenamit li Jehobʼa
Naq nakubʼeek qahaʼ nokooʼok chi wank saʼ xtenamit li Jehobʼa li chanchan jun li junkabʼal li wank saʼ junajil ut saʼ sahil chʼoolejil. Maakʼaʼ naxye bʼar chalenaqo malaj li qawanjik juntaqʼeet li qapaabʼal ut naqayuʼami li xchaqʼrabʼ li Yos. Cheeyaabʼasi Salmo 25:14 ut 1 Pedro 2:17 ut chexʼaatinaq chirix li patzʼom aʼin:
Joʼ xqil saʼebʼ li raqal, kʼaru rusilal naqataw naq nakubʼeek qahaʼ?
WIIBʼ OXIBʼ NEKEʼXYE: «Joʼ li toj maajiʼ kawresinbʼilin re naq tkubʼeeq inhaʼ».
Usta joʼkan nakaakʼoxla, ma nakaaye naq naru taabʼaanu saʼ junaq kutan?
LI AK XQATZOL
Li Jesús kixye naq ebʼ li tzʼaqal aj paabʼanel tento teʼkubʼeeq xhaʼ. Re naq taabʼaanu aʼin xbʼeenwa tento taapaabʼ li Jehobʼa chi anchal aachʼool, taayuʼami li xchaqʼrabʼ ut taaqʼaxtesi laayuʼam chiru.
Qajultikaq
Kʼaru li kubʼihaʼ ut kʼaʼut jwal wank xwankil?
Chanru naxkʼaama ribʼ xqʼaxtesinkil laayuʼam chiru li Jehobʼa rikʼin li kubʼihaʼ?
Kʼaru tento tixbʼaanu junaq li kristiʼaan naq toj maajiʼ naxqʼaxtesi li xyuʼam chiru li Jehobʼa ut nakubʼeek xhaʼ?
SIKʼ XKOMON LI NAʼLEBʼ
Tzol kʼaru li kubʼihaʼ ut wiibʼ oxibʼ li naʼlebʼ li moko chʼolchʼo ta li nekeʼxye chirix.
Tzʼil rix wiibʼ oxibʼ li naʼlebʼ li tatxtenqʼa re naq tkubʼeeq aahaʼ.
«Wi nakaara li Jehobʼa ut nakatbʼanyoxink chiru taakubʼsi aahaʼ» (Laj Kʼaakʼalehom, marzo 2020)
Tzol chirix jun li winq li kixnaʼlebʼa rix chiʼus naq tkubʼeeq xhaʼ.
«Moko xeʼxmin ta chiwu xpaabʼankil li yaal» (Laj Kʼaakʼalehom, 1 re febrero 2013)
Kʼe reetal kʼaʼut aajel ru naq taayal aaqʼe re naq tkubʼeeq aahaʼ ut kʼaru taabʼaanu re xkawresinkil aawibʼ.
«Ma tento naq tkubʼeeq inhaʼ?» (Li nekeʼxpatzʼ ebʼ li saaj. Xsumenkil [tasal 2], tzolom 37)
a Wi junaq li kristiʼaan ak kubʼenaq xhaʼ saʼ junaq chik li paabʼal aajel ru naq tkubʼeeq wiʼ chik xhaʼ. Kʼaʼut? Xbʼaan naq saʼ li xʼiklees moko xtzol ta li yaal li wank saʼ li Santil Hu (chaawil Hechos 19:1-5 ut li tzolom 13).