TZOLOM 34
Chanru tqakʼutbʼesi re li Jehobʼa naq naqara?
Ma nakaawekʼa naq xatjilok chixkʼatq li Yos chalen naq xat-ok xtzolbʼal li Santil Hu? Ma twulaq raj chaawu naq tchaabʼiloʼq laaʼamiiwil rikʼin? Misach saʼ laachʼool naq li Jehobʼa naril wi nakaara ut aʼan ajwiʼ tatxra ut tatxtenqʼa. Chanru tatruuq xkʼutbʼesinkil naq nakaara li Jehobʼa?
1. Chanru naqakʼutbʼesi re li Jehobʼa naq naqara?
Naq nokooʼabʼink chiru naqakʼutbʼesi naq naqara (yaabʼasi 1 Juan 5:3). Abʼan li Jehobʼa maaʼani naxpuʼersi ru, re naq t-abʼinq chiru. Laaʼo bʼan yaal qe ma tooʼabʼinq malaj inkʼaʼ. Kʼaʼut? Xbʼaan naq li Jehobʼa naraj naq tqapaabʼ «chi anchal qachʼool» (Romanos 6:17). Aʼin naraj xyeebʼal naq nakat-abʼink chiru xbʼaan naq nakaara, moko xbʼaan ta naq puʼersinbʼil aawu. Li tasal 3 ut 4 re li hu aʼin tatxtenqʼa re xkʼutbʼesinkil naq nakaara li Jehobʼa rikʼin wiibʼ li naʼlebʼ: xbʼaanunkil li nawulak chiru ut xtzʼeqtaanankil li xikʼ naril.
2. Kʼaʼut wank sut nachʼaʼajkoʼk chiqu xkʼutbʼesinkil re li Jehobʼa naq naqara?
«Numtajenaq li rahilal nekeʼxkʼul li tiikebʼ xchʼool» (Salmo 34:20). Chiqajunilo naqayal qaqʼe xbʼaan naq laaʼo aj maak. Joʼkan ajwiʼ wank sut namaakʼaʼo qatumin, naqakʼul li rahilal malaj jalan chik li chʼaʼajkilal. Maare saʼ li hoonal aʼan nachʼaʼajkoʼk chiqu xbʼaanunkil li naraj li Jehobʼa. Naru ajwiʼ naq saʼ junpaat tqaqʼet qibʼ chiru. Abʼan naq nokooʼabʼink chiru li Jehobʼa yooko xkʼutbʼesinkil naq qʼaxal naqara chiru yalaq kʼaru chik. Wi tiik qachʼool rikʼin tiikaq ajwiʼ xchʼool qikʼin ut maajunwa tooxkanabʼ (yaabʼasi Salmo 4:4).
QASIKʼAQ XCHAMAL LI NAʼLEBʼ
Tzol kʼaʼut naqasahobʼresi xchʼool li Jehobʼa naq nokooʼabʼink chiru ut kʼaru tqabʼaanu re naq inkʼaʼ tqatzʼeqtaana.
3. Laj Tza yook aaqʼabʼankil
Li Santil Hu naxye naq laj Tza kixqʼabʼa laj Job ut chixjunilebʼ li kristiʼaan li nekeʼraj xloqʼoninkil ru li Jehobʼa. Cheeyaabʼasi Job 1:1, 6-2:10 ut chexʼaatinaq chirix ebʼ li patzʼom aʼin:
Kʼaʼut kixye laj Tza naq naʼabʼink laj Job chiru li Jehobʼa? (Teeril Job 1:9-11).
Chirix kʼaru xooxqʼabʼa laj Tza? (Teeril Job 2:4).
Cheeyaabʼasi Job 23:11, 12 ut chexʼaatinaq chirix li patzʼom aʼin:
Chanru kixkʼutbʼesi laj Job naq relik chi yaal naxra li Jehobʼa?
Laj Job kixkʼut naq naxra li Jehobʼa naq kiwank saʼ tiikilal chiru.
Naqakʼutbʼesi naq naqara li Jehobʼa naq tiik qachʼool chiru.
4. Chaasahobʼresi xchʼool li Jehobʼa
Cheeyaabʼasi Proverbios 27:11 ut chexʼaatinaq chirix ebʼ li patzʼom aʼin:
Kʼaru narekʼa li Jehobʼa naq nakat-abʼink chiru ut chaabʼil laanaʼlebʼ? Kʼaʼut?
5. Maatzʼeqtaana li Jehobʼa
Li qarahom chirix li Jehobʼa naxbʼaanu naq tooʼaatinaq chirix rikʼinebʼ li junchʼol. Xbʼaan naq tiik li qachʼool chiru naqabʼaanu usta tchʼaʼajkoʼq chiqu. Cheerilaq li BʼIDEO ut chexʼaatinaq chirix ebʼ li patzʼom aʼin:
Ma nachʼaʼajkoʼk chaawu aatinak chirix laapaabʼal rikʼinebʼ li junchʼol?
Kʼaru kitenqʼank re laj Grayson re xqʼaxbʼal ru li xxiw?
Moko nachʼaʼajkoʼk ta chiqu abʼink chiru li Jehobʼa naq naqara li nawulak chiru ut naqatzʼeqtaana li xikʼ naril. Cheeyaabʼasi Salmo 97:10 ut chexʼaatinaq chirix ebʼ li patzʼom aʼin:
Joʼ xaatzol, kʼaru nawulak chiru li Jehobʼa ut kʼaru xikʼ naril?
Chanru tatruuq xraabʼal li chaabʼilal ut xtzʼeqtaanankil li maaʼusilal?
6. Us nokooʼelk wi nokooʼabʼink chiru li Jehobʼa
Qʼaxal chaabʼil abʼink chiru li Jehobʼa. Cheeyaabʼasi Isaías 48:17, 18 ut chexʼaatinaq chirix ebʼ li patzʼom aʼin:
Ma nakaapaabʼ naq li Jehobʼa naxnaw kʼaru us choʼq qe? Kʼaʼut nakaakʼoxla chi joʼkan?
Chanru yook aatenqʼankil xtzolbʼal li Santil Hu ut xnawbʼal ru li Jehobʼa, li tzʼaqal Yos?
WIIBʼ OXIBʼ NEKEʼXYE: «Maakʼaʼ naraj re li Yos li ninbʼaanu».
Kʼaru li raqal taawoksi re xkʼutbʼesinkil naq li naqabʼaanu naru naxsahobʼresi malaj naxrahobʼtesi xchʼool li Jehobʼa?
LI AK XQATZOL
Nakaakʼutbʼesi naq nakaara li Jehobʼa naq nakat-abʼink chiru ut inkʼaʼ nakaatzʼeqtaana usta wanq aachʼaʼajkilal.
Qajultikaq
Kʼaru nakaatzol rikʼin laj Job?
Chanru taakʼutbʼesi naq nakaara li Jehobʼa?
Kʼaru ttenqʼanq aawe re naq maajunwa ttzʼeqtaana li Jehobʼa?
SIKʼ XKOMON LI NAʼLEBʼ
Tzol chanru tiikaq aachʼool chiru li Jehobʼa ut chiru li chʼuut.
Tzol xkomon laanaʼlebʼ chirix li xooxqʼabʼa wiʼ laj Tza.
«Laj Job inkʼaʼ kixtzʼeqtaana li Yos» (Li Santil Hu ut li naʼlebʼ li wank chisaʼ, tasal 6)
Tzol chanru naq ebʼ li kokʼal nekeʼxkʼutbʼesi ajwiʼ naq nekeʼxra li Jehobʼa.
Tzol chanru jun li saaj naru naxkol ribʼ chiru li mineʼk u re naq inkʼaʼ tixtzʼeqtaana li Jehobʼa.