TZOLOM 35
Kʼaru ttenqʼanq qe re xsikʼbʼal chiʼus li tqabʼaanu
Chiqajunilo tento tqasikʼ kʼaru tqabʼaanu. Li qabʼaanuhom naʼokenk saʼ li qayuʼam ut li qamiiwil rikʼin li Jehobʼa. Jun eetalil, tento tqakʼoxla bʼar toowanq, chanru tqataw li qatumin, ma toosumlaaq malaj inkʼaʼ. Wi naqakʼoxla chiʼus li tqabʼaanu sahaq saʼ qachʼool ut tqasahobʼresi ajwiʼ xchʼool li Jehobʼa.
1. Chanru truuq aatenqʼankil li Santil Hu re xkʼoxlankil chiʼus li taabʼaanu?
Naq yooqat chi xkʼoxlankil li kʼaru taabʼaanu, patzʼ re li Jehobʼa naq tatxtenqʼa ut il saʼ li Santil Hu kʼaru naxkʼoxla li Jehobʼa chirix li taawaj xbʼaanunkil (yaabʼasi Proverbios 2:3-6). Wank sut li Jehobʼa ak kixxaqabʼ junaq li chaqʼrabʼ chirix li naʼlebʼ aʼan. Wi joʼkan, li aajel ru aʼan naq tooʼabʼinq.
Ut wi maakʼaʼ junaq li chaqʼrabʼ saʼ li Santil Hu li tixye aawe kʼaru taabʼaanu? Usta joʼkan li Jehobʼa tatxbʼeresi «saʼ li bʼe tento taakʼam» (Isaías 48:17). Chanru tixbʼaanu? Rikʼin li naʼlebʼ li wank saʼ li Santil Hu. Ebʼ li naʼlebʼ li wank saʼ li Santil Hu naxchʼolobʼ chiʼus kʼaru naxkʼoxla ut narekʼa li Jehobʼa. Wank sut naq naqil junaq li eetalil saʼ li Santil Hu naqatzol kʼaru naxkʼoxla li Jehobʼa chirix junaq li naʼlebʼ. Wi naqataw ru kʼaru naxkʼoxla ut narekʼa li Jehobʼa tooruuq xsahobʼresinkil xchʼool rikʼin li qabʼaanuhom.
2. Kʼaru tento taakʼoxla naq taawaj xbʼaanunkil junaq li naʼlebʼ saʼ laayuʼam?
Li Santil Hu naxye: «Li wank xnaʼlebʼ naxkʼe reetal bʼar yo chi xik» (Proverbios 14:15). Aʼin naraj xyeebʼal naq tento taakʼe aahoonal re xkʼoxlankil kʼaru raj us xbʼaanunkil. Naq taatzʼili rix kʼoxla aʼin: «Kʼaru xnaʼlebʼ li Santil Hu naru twoksi? Bʼar wank rehebʼ li tixbʼaanu naq sa twekʼa wibʼ? Chanru tixchʼaʼajki malaj tixtenqʼa li junchʼol li tinbʼaanu? Ut li qʼaxal wank xwankil, ma tinsahobʼresi xchʼool li Jehobʼa?» (Deuteronomio 32:29).
Xkʼulubʼ li Jehobʼa xyeebʼal qe li kʼaru us ut li inkʼaʼ us. Naq naqanaw chiʼus li xchaqʼrabʼ, li xnaʼlebʼ ut naqayuʼami inkʼaʼ nokooxchʼiʼchʼiʼi li qachʼool ut li qakʼaʼuxl. Naqekʼa saʼ li qachʼool ut saʼ li qakʼaʼuxl ma us malaj inkʼaʼ us li yooko xbʼaanunkil (Romanos 2:14, 15). Chaabʼil toonaʼlebʼaq wi li qakʼaʼuxl ut li qachʼool naxtaw ru li us ut li inkʼaʼ us.
QASIKʼAQ XCHAMAL LI NAʼLEBʼ
Qatzʼilaq rix chiʼus chanru nokooxtenqʼa li xnaʼlebʼ li Santil Hu ut li qachʼool ut li qakʼaʼuxl naq naqaj xbʼaanunkil junaq li naʼlebʼ saʼ li qayuʼam.
3. Kanabʼ naq li Santil Hu tatxbʼeresi
Chanru nokooxtenqʼa li xnaʼlebʼ li Santil Hu rikʼin li naqaj xbʼaanunkil saʼ li qayuʼam? Cheerilaq li BʼIDEO ut chexʼaatinaq chirix ebʼ li patzʼom aʼin:
Kʼaru li maatan kixkʼe qe li Jehobʼa?
Kʼaʼut naq kixkʼe qe li maatan aʼin?
Kʼaru kixkʼe qe li Jehobʼa re naq tooruuq xsikʼbʼal chiʼus li tqabʼaanu saʼ li qayuʼam?
Re rilbʼal jun xnaʼlebʼ li Santil Hu, cheeyaabʼasi Efesios 5:15, 16 ut chexʼaatinaq chirix chanru roksinkil chiʼus li kutan re...
... rilbʼal xsaʼ li Santil Hu wulaj wulaj.
... xchaabʼilobʼresinkil aanaʼlebʼ joʼ bʼeelomej, ixaqilbʼej, naʼbʼej yuwaʼbʼej malaj alal kʼajolbʼej.
... naq junelik wanqat saʼebʼ li chʼutam.
4. Kʼaytesi laachʼool ut laakʼaʼuxl re naq tatnaʼlebʼaq chiʼus
Moko chʼaʼaj ta xnawbʼal kʼaru tqabʼaanu naq saʼ li Santil Hu wank jun li chaqʼrabʼ chirix li naqaj xbʼaanunkil. Abʼan, wi maakʼaʼ? Cheerilaq li BʼIDEO ut chexʼaatinaq chirix li patzʼom aʼin:
Kʼaru kixbʼaanu li hermaan re xkʼaytesinkil li xkʼaʼuxl re xbʼaanunkil li us ut chi joʼkan tixsahobʼresi xchʼool li Jehobʼa?
Kʼaʼut naq moko usta naq jalan chik tixye qe kʼaru tqabʼaanu? Cheeyaabʼasi Hebreos 5:14 ut chexʼaatinaq chirix ebʼ li patzʼom aʼin:
Usta sa raj naq teʼxye qe kʼaru tqabʼaanu, kʼaʼut us naq laaʼo tqanaw raj kʼaru xbʼaanunkil?
Kʼaru ttenqʼanq qe chi xkʼaytesinkil li qakʼaʼuxl re naq tqanaw kʼaru us ut inkʼaʼ us xbʼaanunkil saʼ li qayuʼam?
Li qakʼaʼuxl ut li qachʼool nokooxbʼeresi saʼ li qayuʼam joʼ jun li eetalil li nokooxtenqʼa re xtawbʼal qabʼe.
5. Oxloqʼaq chiqu li nekeʼrekʼa ebʼ li junchʼol
Saʼ xkʼabʼaʼ naq jalano moko juntaqʼeet ta nokoonaʼlebʼak. Chanru naqakʼutbʼesi naq naqoxloqʼi li nekeʼrekʼa li junchʼol? Qilaq wiibʼ li eetalil.
1: Jun li hermaan li nawulak chiru xbʼonbʼal ribʼ naqʼaxon saʼ jun li chʼuut bʼarwiʼ naabʼalebʼ li hermaan inkʼaʼ nekeʼwulak chiru aʼin.
Cheeyaabʼasi Romanos 15:1 ut 1 Corintios 10:23, 24 ut chexʼaatinaq chirix ebʼ li patzʼom aʼin:
Kʼaru truuq raj xbʼaanunkil li hermaan naq tril li raqal aʼin? Kʼaru raj taabʼaanu wi wankat rikʼin junaq li kristiʼaan li naxtochʼ xchʼool junaq li naʼlebʼ li moko naxtochʼ ta laachʼool?
2: Jun li hermaan naxnaw naq moko maak ta rukʼbʼal bʼayaq li haʼ li nakaltesink, abʼan aʼan moko naʼukʼak ta. Saʼ jun kutan nabʼoqeʼk saʼ jun li ninqʼe ut naril wiibʼ oxibʼ li hermaan li yookebʼ chi ukʼak.
Cheeyaabʼasi Eclesiastés 7:16 ut Romanos 14:1, 10 ut chexʼaatinaq chirix ebʼ li patzʼom aʼin:
Kʼaru truuq raj xbʼaanunkil li hermaan naq tril li raqal aʼin? Kʼaru taabʼaanu wi ebʼ li junchʼol nekeʼxbʼaanu junaq li naʼlebʼ li moko nakaabʼaanu ta laaʼat?
Li tatxtenqʼa re naq chaabʼil tatnaʼlebʼaq?
1. Patzʼ re li Jehobʼa naq tatxtenqʼa chi xnawbʼal kʼaru taabʼaanu (Santiago 1:5).
2. Sikʼ xkomon aanaʼlebʼ saʼ li Santil Hu ut saʼebʼ li qatasal hu li tatxtenqʼa chi xnawbʼal kʼaru li chaabʼil naʼlebʼ taayuʼami. Naru ajwiʼ tateʼxtenqʼa ebʼ li hermaan li kawebʼ xpaabʼal.
3. Kʼoxla chanru taawekʼa aawibʼ rikʼin li taabʼaanu ut chanru aʼin tixsahobʼresi malaj tixchʼaʼajki xchʼool ebʼ li junchʼol.
WIIBʼ OXIBʼ NEKEʼXYE: «Laaʼat tatruuq xbʼaanunkil li nakaawaj. Kʼa aakʼas chirix li nekeʼxye ebʼ li junchʼol!».
Kʼaʼut aajel ru naq tqakʼoxla li narekʼa li Jehobʼa ut ebʼ li junchʼol?
LI AK XQATZOL
Chaabʼil tatnaʼlebʼaq wi xbʼeenwa taatzʼil rix li naxkʼoxla li Jehobʼa chirix li taabʼaanu ut wi tixsahobʼresi malaj tixchʼaʼajki li xchʼool ebʼ li junchʼol.
Qajultikaq
Kʼaru taabʼaanu re naq laabʼaanuhom tixsahobʼresi xchʼool li Jehobʼa?
Chanru taakʼaytesi laachʼool ut laakʼaʼuxl chi xnawbʼal kʼaru li us ut li inkʼaʼ us?
Kʼaru tatruuq xbʼaanunkil re naq oxloqʼaq chaawu li nekeʼrekʼa ebʼ li junchʼol?
SIKʼ XKOMON LI NAʼLEBʼ
Chanru naq li nakaasikʼ xbʼaanunkil saʼ laayuʼam tixkawubʼresi laaʼamiiwil rikʼin li Jehobʼa?
«Oxloqʼi li Jehobʼa rikʼin laabʼaanuhom» (Laj Kʼaakʼalehom, 15 re abril 2011)
Taw ru chiʼus chanru nokooxqʼus li Jehobʼa.
Tzol kʼaru kitenqʼank re jun li winq li kichʼaʼajkoʼk chiru xsikʼbʼal li tixbʼaanu saʼ li xyuʼam.
Tzol chanru tqasahobʼresi xchʼool li Jehobʼa usta maakʼaʼ junaq li chaqʼrabʼ chirix junaq li naʼlebʼ.
«Ma junelik naʼajmank junaq xchaqʼrabʼ li Santil Hu?» (Laj Kʼaakʼalehom, 1 re diciembre 2003)