TZOLOM 44
Ma naxkʼulubʼa li Yos chixjunilebʼ li ninqʼe?
Li Jehobʼa naraj naq tqayal xsahil li qayuʼam ut naq joqʼeqil tqabʼaanu junaq li ninqʼe. Abʼan, ma nawulak chiru chixjunilebʼ li ninqʼe? Chanru tooruuq xkʼutbʼal naq naqara li Jehobʼa ut naqakʼe saʼ ajl li narekʼa?
1. Kʼaʼut naq moko chixjunilebʼ ta li ninqʼe naxkʼulubʼa li Jehobʼa?
Maare tsachq saʼ laachʼool chi xtzolbʼal naq wankebʼ li ninqʼe moko naxchap ta ribʼ rikʼin li naxye li Santil Hu. Malaj chalenaq saʼebʼ li bʼalaqʼil paabʼal, saʼ li qʼehink ut li tuulak malaj saʼ li kʼutum naq wank kʼaru nakanaak chi yoʼyo naq nokookamk. Wankebʼ chik nekeʼxchap ribʼ rikʼin li bʼalaqʼil naʼlebʼ li nekeʼxpaabʼ ut nekeʼxbʼaanu li winq malaj saʼ li suʼeert (Isaías 65:11, TNM). Joʼkan naq wank xyaalal naq li Jehobʼa kixye aʼin rehebʼ laj kʼanjel chiru: «Elenqex saʼ xyanqebʼ ut [...]. Meechʼeʼ li kʼaʼaq re ru tzʼajn ru» (2 Corintios 6:17).a
2. Kʼaru naxkʼoxla li Jehobʼa chirixebʼ li ninqʼe bʼarwiʼ nekeʼxnima ru junaq li kristiʼaan?
Li Jehobʼa kixye qe naq miqakʼam qe rikʼinebʼ li kristiʼaan li nekeʼxkʼojobʼ «xchʼool chirix li winq» xbʼaan naq aʼin jun li raʼal (yaabʼasi Jeremías 17:5). Wankebʼ li ninqʼe bʼarwiʼ nekeʼxnima ruhebʼ li awabʼej, ebʼ li soldaad, reetalil li tenamit malaj xkutankil li tenamit (1 Juan 5:21). Junchʼol chik nekeʼxnima li xmolam ebʼ li awabʼej malaj junaq li kutan li xaqabʼanbʼil xbʼaan junaq li kristiʼaan. Chan tawiʼ ru narekʼa ribʼ li Jehobʼa wi naqakʼe xloqʼal junaq li kristiʼaan malaj molam li moko naxyuʼami ta li naxye?
3. Kʼaru li yibʼ aj bʼaanuhom naxbʼaanu naq moko chaabʼilaq ta junaq li ninqʼe?
Li Santil Hu naxtzʼeqtaana li «naxrahi li tzʼejwalej, […] num ukʼak num waʼak» ut «kalaak» (1 Pedro 4:3). Saʼ wiibʼ oxibʼ li ninqʼe ebʼ li kristiʼaan nekeʼxbʼaanu li yibʼ aj naʼlebʼ. Wi junelik naqaj wank choʼq ramiiw li Jehobʼa tento tqatzʼeqtaana ebʼ li tzʼiʼbʼeetalil naʼlebʼ aʼin.
QASIKʼAQ XCHAMAL LI NAʼLEBʼ
Qilaq chanru tatruuq xsahobʼresinkil xchʼool li Jehobʼa naq tatninqʼehiq.
4. Mat-okenk saʼ junaq li ninqʼe bʼarwiʼ inkʼaʼ nekeʼroxloqʼi li Jehobʼa
Cheeyaabʼasi Efesios 5:10 ut chexʼaatinaq chirix ebʼ li patzʼom aʼin:
Kʼaru tento wanq saʼ qachʼool naq tooninqʼehiq?
Kʼaru li ninqʼe nekeʼxbʼaanu saʼ laateep?
Ma nawulak tawiʼ chiru li Jehobʼa?
Jun eetalil, ma xaakʼoxla junsutaq kʼaru naxye li Yos chirix xninqʼehinkil xkutankil laayoʼlajik? Saʼ li Santil Hu maabʼar naxye naq li keʼxloqʼoni ru li Jehobʼa keʼxninqʼehi chaq li xkutankil li xyoʼlajik, abʼan naʼaatinak chirix wiibʼ li kristiʼaan li inkʼaʼ nekeʼxloqʼoni ru li Jehobʼa li keʼxbʼaanu aʼin. Cheeyaabʼasi Génesis 40:20-22 ut Mateo 14:6-10. Moqon chexʼaatinaq chirix ebʼ li patzʼom aʼin:
Kʼaru xjuntaqʼeetalil li wiibʼ chi ninqʼe aʼin?
Naq ak xaawil li naxye li raqal kʼaru nakaakʼoxla, kʼaru tawiʼ narekʼa li Jehobʼa chirix xninqʼehinkil xkutankil li qayoʼlajik?
Usta joʼkan maare nakaakʼoxla: «Ma yaal tawiʼ naq li Jehobʼa tixkʼe saʼ xchʼool wi tinninqʼehi linyoʼlajik malaj tinxik saʼ jun li ninqʼe li inkʼaʼ nawulak chiru?». Cheeyaabʼasi Éxodo 32:1-8. Moqon cheerilaq li BʼIDEO ut chexʼaatinaq chirix ebʼ li patzʼom aʼin:
Kʼaʼut tento naq chʼolchʼooq chiqu li nawulak chiru li Jehobʼa?
Chanru naqabʼaanu aʼin?
Chanru tqanaw kʼaru li ninqʼe inkʼaʼ nawulak chiru li Yos?
Ma naxqʼet li naxye li Santil Hu? Re xnawbʼal aʼin tzʼil rix bʼar chalenaq li ninqʼe.
Ma naxnima ru junaq li kristiʼaan, molam malaj reetalil li tenamit? Maaʼani chik naqakʼe xloqʼal kaʼajwiʼ li Jehobʼa ut chʼolchʼo chiqu naq aʼan trisi chixjunil li chʼaʼajkilal li wank saʼ ruuchichʼochʼ.
Ma teʼxbʼaanu junaq li naʼlebʼ li inkʼaʼ twulaq chiru li Jehobʼa? Tento naq tqatzʼeqtaana li muxuk ibʼ.
5. Tenqʼahebʼ li junchʼol re naq teʼroxloqʼi li nakaapaabʼ
Naq ebʼ li junchʼol yooqebʼ aapuʼersinkil re naq tat-okenq saʼ jun li ninqʼe li inkʼaʼ nawulak chiru li Jehobʼa, maare tchʼaʼajkoʼq chaawu xyeebʼal «inkʼaʼ». Ye chi chʼolchʼo ru li taabʼaanu, abʼan aatinan saʼ xyaalal ut saʼ tuulanil. Re xnawbʼal li kixbʼaanu jun li kristiʼaan li kixnumsi li chʼaʼajkilal aʼin, cheerilaq li BʼIDEO.
Cheeyaabʼasi Mateo 7:12 ut chexʼaatinaq chirix ebʼ li patzʼom aʼin:
Joʼ naxye li raqal aʼin, ma taaye raj re junaq laakomon li maawaʼ aj paabʼanel naq inkʼaʼ tixbʼaanu junaq li ninqʼe?
Chanru taakʼut chiruhebʼ laajunkabʼal naq nakaarahebʼ usta inkʼaʼ tatwanq rikʼinebʼ saʼ jun li ninqʼe?
6. Li Jehobʼa naraj naq sahaq saʼ li qachʼool
Li Jehobʼa naraj naq tooʼukʼaq ut toowaʼaq rikʼin li qajunkabʼal ut ebʼ li qamiiw chi sa saʼ qachʼool. Cheeyaabʼasi Eclesiastés 8:15 ut chexʼaatinaq chirix li patzʼom aʼin:
Chanru naxkʼut li raqal aʼin naq li Jehobʼa naraj naq sahaq saʼ li qachʼool?
Li Jehobʼa naraj naq ebʼ laj kʼanjel chiru teʼbʼatzʼunq ut sahaqebʼ saʼ xchʼool saʼ komonil. Cheerilaq BʼIDEO re rilbʼal chanru naʼilmank aʼin saʼebʼ li nimla chʼutam bʼarwiʼ nekeʼtzʼaqonk naabʼal li tenamit.
Cheeyaabʼasi Gálatas 6:10 ut chexʼaatinaq chirix ebʼ li patzʼom aʼin:
Ma aajel ru naq tooninqʼehinq re xsahobʼresinkil xchʼool ebʼ li kristiʼaan?
Chanru taawaj kʼehok maatan, ma saʼ xkʼabʼaʼ naq tenebʼanbʼil saʼ aabʼeen malaj xbʼaan naq xʼalaak saʼ laachʼool?
Naabʼalebʼ laj Testiiw wank sut nekeʼxkʼubʼ jun li ninqʼe choʼq rehebʼ li xkokʼal ut nekeʼxkʼehebʼ xmaatan. Wi wank aakokʼal, kʼaru tatruuq xbʼaanunkil re naq sahaqebʼ saʼ xchʼool?
WIIBʼ OXIBʼ NEKEʼXYE: «Maakʼaʼ naxye bʼar chalenaq li ninqʼe, li wank xwankil aʼan naq toowanq saʼ komonil rikʼin li qajunkabʼal ut ebʼ li qamiiw».
Kʼaru nakaaye?
LI AK XQATZOL
Li Jehobʼa naraj naq toowanq saʼ komonil rikʼin li qajunkabʼal ut ebʼ li qamiiw, abʼan naxye naq tqatzʼeqtaana ebʼ li ninqʼe li inkʼaʼ nawulak chiru.
Qajultikaq
Kʼaru ebʼ li patzʼom tento tqatzʼil rix re xnawbʼal kʼaru ebʼ li ninqʼe inkʼaʼ naxkʼulubʼa li Jehobʼa?
Chanru tqatenqʼa li qajunkabʼal ut ebʼ li qamiiw re naq teʼxtaw ru kʼaʼut inkʼaʼ nokootzʼaqonk saʼ junaq li ninqʼe?
Chanru naqanaw naq li Jehobʼa naraj naq sahaq saʼ qachʼool?
SIKʼ XKOMON LI NAʼLEBʼ
Tzol chirix ebʼ li ninqʼe li inkʼaʼ nekeʼxbʼaanu ebʼ laj paabʼanel.
Tzol kaahibʼ li naʼlebʼ li naxkʼut kʼaʼut li Jehobʼa inkʼaʼ naxkʼulubʼa naq tqaninqʼehi xkutankil li qayoʼlajik.
Kʼe reetal chanru ebʼ li kokʼal tiikebʼ xchʼool chiru li Jehobʼa saʼ xqʼehil ebʼ li ninqʼe.
Chi miyon ebʼ laj Testiiw inkʼaʼ nekeʼxnima li ralankil, ma sahebʼ saʼ xchʼool?
«Qʼaxal wiʼ chik us li xeʼxtaw» (Laj Kʼaakʼalehom, 1 re diciembre 2012)
a Chaawil xyaalalil li naʼlebʼ 5 re rilbʼal kʼaru tatruuq xbʼaanunkil naq tateʼxbʼoq saʼ junaq li ninqʼe.